1, 2. (a) Engkai la menukah ngajari anak-anak gelah erkiniteken man Jahwe, janah cara kai ngenca si banci berhasil? (b) Empat hal kai si nandangi sibahas?

I PRANCIS, lit sekalak perbulangen ras ndehara ngatakenca, ”Kami erkiniteken man Jahwe, tapi e labo ertina anak kami pe erkiniteken ka. Kiniteken la banci iwarisken. La banci mis turah kiniteken anak kami.” Sekalak turang senina i Australia nulis, ”Peturah kiniteken i bas diri anakta banci saja jadi tentangen si seh kal sulitna.” Nina ka, ”Banci jadi, siakap enggo sijabap penungkun anakta seh asa ia puas. Tapi, i bas pudi wari, isungkunna ka penungkunen si seri! Erkiteken lalap ia merhat meteh, jabapen si gundari lenga tentu pagi erban ia puas.” Asum anak-anak reh belinna, melala orang tua erpengakap maka perlu ijelaskenna mulihi terbagesen topik si seri. Janah, kepeken perlu igunaken orang tua erbage cara guna ngajari anakna engkelengi Jahwe.

² Selaku orang tua banci saja kam nungkun, ’Tuhu-tuhu banci nge kuajari anakku gelah terus engkelengi ras ngelayani Jahwe kenca ia dewasa?’ Situhuna, kerina kita la banci  ngelakoken enda sisada. (Jeremia 10:23) Perlu sipindo penampat Jahwe. Melala enggo isikapkenNa petunjuk. Adi bage, uga kam banci nampati anakndu? (1) Perlu tuhu-tuhu itandaindu ia. (2) Ajarken kai si igejapkenndu kerna Jahwe. (3) Gunaken anding-andingen. (4) Pindo kesah si badia janah sabarlah man anakndu.

3. Uga orang tua banci ngusih Jesus i bas ngajari ajar-ajarna?

³ Rusur isungkuni Jesus ajar-ajarna kerna kai si iteki kalak e. (Matius 16:13-15) Banci usihndu ia. Sanga ngerana-ngerana ntah pe erdahin ras anakndu, sungkuni pendapatna janah pediat ia nuriken uga perasanna. Lit nge si isangsikenna? Sekalak turang senina si umurna 15 tahun i Australia ngatakenca, ”Rusur bapa ngerana ras aku kerna kinitekenku janah babana aku rukur. Isungkunna, ’Kai nina Pustaka?’ ’Tek nge kam man ayat e?’ ’Engkai kam tek?’ Atena gelah kujabap alu kata-kataku sendiri, labo terjeng ngulihi kata-kata bapa ras nande. Sanga aku reh galangna, arus reh ulina jabapenku.”

4. Engkai arus kam sabar janah ijabapndu penungkunen anakndu? Ban contohna.

⁴ Adi la mis iteki anakndu ajaren tertentu i bas Pustaka, sabarlah. Sampati ia gelah banci ijabapna sendiri kai si isangsikenna. Nina sekalak bapa, ”Ula sepeleken penungkunun anakta janah ula salihken topik rananna adi segan kam jabapsa.” Adi nungkun anakndu, e situhuna mejile. E ertina merhat ia meteh terbuen. Jesus pe melala nungkun sanga kitik denga. (Oge Lukas 2:46.) Nina sekalak anak perana i Denmark, ”Sanga kukataken aku sangsi maka agama kami e benar, orang tuaku tetap tenang. Padahal situhuna aru ate kalak e man bangku. Ijabapna kerina penungkunenku i bas Pustaka si Badia nari.”

5. Aminna gia sekalak anak teridah erkiniteken man Jahwe, kai si perlu ilakoken orang tua?

⁵ Perlu tuhu tuhu itandaindu anakndu. Ula iakapndu ia erkiniteken man Jahwe erkiteken ia erberita ras pulung. Uga perasanna man Jahwe, janah kai pendapatna kerna Pustaka? Usahakenlah ndarami lit ntah lang si banci erban monce kinitekenna man Jahwe. Cakapken kerna Jahwe tep-tep wari sanga kena ras. Totoken anakndu, ntah sanga kena ras-ras ertoto ntah pe sanga kam ertoto sisada.

6. Engkai orang tua perlu rusur mpelajari kerna Jahwe ras Pustaka?

⁶ Enterem kalak meriah iakapna megiken Jesus erkiteken ikelengina Jahwe ras tuhu tuhu itandaina Pustaka. Janah igejapkenna ka maka Jesus ngekelengi ia. Emaka, tuhu-tuhu ibegikenna ia. (Lukas 24:32; Johanes 7:46) Bage ka pe, adi iidah anakndu kam engkelengi Jahwe, ia pe banci erlajar engkelengi Jahwe. (Oge Ulangen 6:5-8; Lukas 6:45.) Emaka, teruslah pelajari Pustaka, janah rusurlah oge publikasinta. Pelajari terbuen kerna tinepa Jahwe. (Matius 6:26, 28) Reh rembakna kam ras Jahwe, reh buena si banci iajarkenndu man anak-anakndu.—Lukas 6:40.

7, 8. Uga anakndu banci ndatken manfaat i bas pemetehndu nari kerna Jahwe? (b) Ban contoh kerna kai si ilakoken piga-piga orang tua.

⁷ Katawari pe turiken man anakndu kai si nggo ipelajarindu kerna Jahwe. Labo ngenca paksa nikapken perpulungen ntah pe kebaktin jabu. Enda me si ilakoken  sada keluarga i bas Amerika Serikat sanga iidahna lit si mejile i bas alam ntah pe ipanna pangan si ntabeh mis ihubungkenna ras Jahwe. Nina, ”Iingetken kami man anak kami maka keleng ate Jahwe man banta, janah kerina si iberekenNa nggo isikapkenNa alu mehuli.” I Afrika Selatan, sada perbulangen ras ndehara rusur nuriken kerna tinepa man dua anakna sanga kalak enda ku juma. Contohna, iturikenna uga hebatna sada biji si dungna jadi sinuan-sinuan. Nina, ”Iusahaken kami kal gelah iergai anak kami kegeluhen ras tinepa Dibata si luar biasa.”

⁸ Sekalak bapa i Australia ibabana anakna si umurna kira-kira sepuluh tahun ku museum. Ije, isampatina anakna gelah reh mbagesna kinitekenna alu ngenehen bukti-bukti maka Jahwe me Si Nepa. Nina, ”Nen kami rubia-rubia lawit si nai si lanai lit gundari, eme amonit ras tribolit si gedang. Jengang kal kami ngidahsa perban seh kal jilena. Bentukna luar biasa janah bagin-bagin tubuhna lengkap, bali bagi rubia-rubia si lit i bas jamanta. Adi memang mahluk si sederhana banci erevolusi jadi la sederhana, engkai maka rancangen rubia-rubia si nai nggo luar biasa janah lengkap? Enda tuhu-tuhu pelajaren si meherga man bangku janah kuturiken enda man anakku.”

9. Kai gunana make anding-andingen? Ban contohna.

⁹ Rusur igunaken Jesus anding-andingen. Iajarina hal-hal si penting arah cerita ntah pe contoh. Sanga iajarindu anak-anakndu alu anding-andingen, pasti ibayangkenna. Banci iukurina, iangkaina janah iingetna kai si iajarindu. Contohna, sekalak nande i Jepang ersura-sura gelah dua anakna erlajar maka cara Jahwe nepa udara i doni enda ncidahken maka ermediate kal Ia man manusia. Anak-anakna umurna waluh ras sepuluh tahun. Emaka, igunakenna anding-andingen si cocok ras umurna. Iberekenna man kalak e susu, gula, ras kopi. Kenca si e, isuruhna kalak e erban sada cangkir kopi man banna. Nina nande e, ”La asal-asalen ia erbanca. Sanga kusungkun engkai maka kalak e megermet erbanca, nina maka banna atena kopi si cocok ras selerangku. Kujelasken maka Dibata pe bage. Icampur Dibata erbage jenis gas i udara alu megermet gelah cocok man manusia.” Meriah iakap kalak e erlajar alu cara si bage, janah lalap iingetna pelajarenna!

10, 11. (a) Anding-andingen kai si banci igunakenndu maka Si Nepa e lit? (Nehen gambar i bas pemena artikel.) (b) Anding-andingen kai si pernah igunakenndu?

¹⁰ Anding-andingen kai si banci igunakenndu i bas ncidahken maka tinepa e lit? Contohna, banci ibanndu kue ras  anakndu alu ngikuti sada resep. Jelasken engkai maka penting ngikuti resep e alu tepat. Kenca si e, bere man bana sada apel ntah pe buah si deban. Sungkun ia, ”Tehndu nge adi apel e ka pe lit resepna?” Potong apel e janah bereken bijina man bana. Jelasken maka i bas biji apel e lit resep cara erban apel, tapi resepna la bagi resep kue sederhanana. Banci sungkunndu, ”Resep kue eme manusia si erbanca, adi bage ise si erbanca resep apel?” Adi anakndu tergalangen, jelasken maka resep apel e ras batangna lit i bas DNA bijina. Banci ka icidahkenndu piga-piga gambar ras contoh si lit i bas brosur Asal Mula Kehidupan—Lima Pertanyaan yang Patut Direnungkan i bas halamen 10 seh ku 20.

¹¹ Enterem orang tua ngogeken artikel ”Apakah Ini Dirancang?” i bas Sadarlah! man anakna. Adi anak e kitiksa denga, banci ijelasken orang tua kerna artikel e alu sederhana. Contohna, sada perbulangen ras ndehara i Denmark mbandingken pesawat terbang ras perik. Nina, ”Pesawat terbang seri ras perik. Tapi, banci nge pesawat e naruhen? Janah, naper nge naruh e jadi pesawat kitik? Perlu nge perik e bandara? Apai iakapndu jilen? Sora pesawat nge ntah sora perik? Adi bage, si apai jagon, si erban pesawat nge? Ntah si erban perik?” Adi ibanndu penungkunen gelah anakndu rukur, erlajar ia nggunaken ’kebeluhen dingen pengertinna’. Janah kinitekenna man Jahwe pe reh bagesna.—Kuan-kuanen 2:10-12.

12. Anding-andingen kai si banci igunakenndu i bas ncidahken maka kai si ikataken Pustaka e lalap benar?

¹² Banci igunakenndu anding-andingen i bas ngajar anak-anakndu maka kai si ikataken Pustaka e lalap benar. Jop 26:7. (Oge.) Ula ngenca ikatakenndu maka isi ayat enda pasti rehna i bas Jahwe nari. Tapi, sampati ia rukur. Banci katakenndu maka i bas jaman Jop, mungkin kalak la tek adi doni enda isangkutken i bas si la lit. Menurutna, kerina benda bagi bola ntah pe batu, arus lit si natangsa. Paksa si e, lenga lit teleskop ntah pe pesawat luar angkasa. Emaka, la lit si mbuktiken adi doni enda la lit si natangsa. Kai pelajarenna? Aminna gia Pustaka itulis i bas jaman si nai, isina lalap benar erkiteken rehna i bas Jahwe nari.—Nehemia 9:6.

13, 14. Uga orang tua banci ngajari anakna gelah matuhi pedah Pustaka?

¹³ Arus iajarindu anakndu maka gelah banci tuhu-tuhu ermeriah ukur perlu ipatuhina pedah Pustaka. (Oge Masmur 1:1-3.) Contohna, pindo anakndu gelah ibayangkenna ia pindah ku sada pulo. Banci ipilihna ras ise atena tading. Kenca si e sungkun, ”Ise saja si atendu idilondu gelah kerina kalak si tading i je nggeluh alu dame?” Kenca si e, ogeken Galati 5:19-23 guna meteh kalak si uga si ate Jahwe tading i bas doni si mbaru.

¹⁴ Alu cara si bage, iajarindu dua hal si penting. Si pemena, iajari Jahwe kita carana gelah banci nggeluh ermeriah ukur janah dame ras kalak si deban gundari. Si peduaken, iajariNa kita sifat-sifat si iperluken sanga nggeluh i doni si mbaru. (Jesaya 54:13; Johanes 17:3) Banci ka icidahkenndu man anakndu uga Pustaka nggo nampati turang-seninanta. Contohna, darami pengalamen geluh i bas salah sada publikasi, banci saja i bas seri ”Alkitab Mengubah Kehidupan” i bas Menara Pengawal. Ntah pe, pindolah  sekalak turang senina gelah iturikenna uga Pustaka nampati ia erban perubahen gelah banci meriah ukur Jahwe.—Heber 4:12.

15. Uga carana ngajari anakndu gelah meriah iakapna erlajar?

¹⁵ Ajarlah anakndu alu cara si menarik. Darami cara-cara si mbaru gelah meriah iakapna erlajar kerna Jahwe janah reh rembakna ras Ia. Teruslah lakoken enda janah sesuaiken carandu ngajar ras umurna. Nina sekalak perbapan, ”Ula kam erleja-leja ndarami cara si deban paksa ngajarken hal si seri.”

16. Engkai kam arus ersabar sanga ngajari anakndu? Ban contohna.

¹⁶ Alu penampat kesah si badia, anakndu banci paguh kinitekenna. (Galati 5:22, 23) Tapi, gelah reh paguhna kinitekenna, iperluken waktu. Emaka, ersabarlah, janah terus ajari ia. Nina sekalak bapa i Jepang si lit dua anakna, ”Aku ras ndeharangku mereken melala waktu man anak kami. Kitik-kitikna nari, selain wari perpulungen, kuajari ka kalak e 15 menit tep-tep wari. Sepuluh lima menit e la ndekahsa man bana ras man kami.” Sekalak pertua keliling nulis, ”Sanga aku erlajar anak perana, melala kal penungkunenku janah melala si kusangsiken, tapi la pernah kuturiken. Dungna, jabapenna kudat i bas perpulungen, kebaktin jabu, ntah pe pelajaren pribadi. Eme sabapna orang tua arus terus ngajari anakna.”

17. Engkai orang tua arus mpegegehi kinitekenna? Uga sekalak nande ras bapa i Bermuda nampati anakna erkiniteken man Jahwe?

¹⁷ Usihen kinitekenndu erpengaruh kal man anakndu. Iperdiatekenna kai si ilakokenndu. Emaka, arus terus ipegegehindu kinitekenndu. Arus banci iidahna maka Jahwe tuhu-tuhu rembak ras kam. Contohna, sekalak bapa ras nande i Bermuda ngadapi perbeben. Ertoto ia ras anak-anakna mindo penampat Jahwe. Isuruhna ka anakna ertoto sisada. ”Ikataken kami man anak kami sintua, ’Arus tuhu-tuhu tek kam man Jahwe, tetap sibuk erberita, janah ula arusa atendu.’ Paksa perbeben e banci idungi, tek ia maka Jahwe me si nampati kami. Asilna, kinitekenna man Dibata ras man Pustaka reh paguhna.”

18. Kai si perlu iinget orang tua?

¹⁸ Orang tua, ingetlah maka la banci ipaksandu anakndu erkiniteken. Kam nuan ras niram ngenca, tapi Jahwe saja ngenca si banci mpeturahsa. (1 Korinti 3:6) Emaka, usahakenndulah asa ngasupndu ngajari anak-anakndu kerna Jahwe. Pindolah kesah si badia i bas nampati anakndu erkiniteken. Teklah maka Jahwe pasti masu-masu usahandu.—Epesus 6:4.