Nina Seth, * ”Aku ras ndeharangku ipengadi i bas pendahin nari. Dua tahun dekahna la tetap pendahinku janah keluarga nge si nampati kami. Dungna, ndeharangku, Priscilla, jadi stress, janah aku pe lanai kuakap erguna bangku.

”Uga kami ngatasisa? Rusur iinget Priscilla kata-kata Jesus si lit i bas Matius 6:34. Nina Jesus, ’Ola aru atenta kerna wari si pepagi, sabap pepagi lit denga ka nge si man ndelenken.’ Janah, toto si bulat ukur banci mpegegehi ia. Adi aku, Masmur 55:23 si ngapuli aku. Bali bagi pemasmur, kuendesken aru ateku man Jahwe, janah ipegegehiNa aku. Aminna gia gundari nggo lit pendahinku, ijaga kami gelah kegeluhen kami tetap sederhana bagi si ikataken Jesus i bas Matius 6:20-22. Si pentingna kami pe reh rembakna, terutama ras Dibata.”

Nina Jonathan, ”Sanga bisnis keluargaku bangkrut, mbiar kal aku natap wari si pepagi. Erkiteken krisis ekonomi, kai si dahiken kami 20 tahun dekahna lanai lit gunana. Aku ras ndeharangku mulai lanai siangkan kerna sen. Lanai pake kami kartu kredit sanga erbelanja erkiteken mbiar la tergalari kami.

”Tapi Kata Dibata ras kesah si badia nampati kami erban keputusen si mehuli. Kupelajari ndahiken pendahin kai pe, janah kukurangi kerina pengeluaren si la penting. Selaku Saksi Jahwe, idat kami ka penampat i bas turang senina sada kiniteken nari. Ipetetapna ukur kami janah isampatina kami paksa terjadi perbeben.”

Nina Raquel, ”Sanga rempet itadingken perbulangenku aku, merawa janah kitik kal ukurku. Tuhu-tuhu mberat kal kuakap. Tapi kuperembak diringku man Dibata, janah iapuliNa aku. Kuendesken diringku man Dibata i bas toto tep-tep wari, emaka kugejapken kedamen i bas pusuhku. Dungna, tertambari pusuhku si luka.

”Janah, bujur kal kukataken man Dibata erkiteken iberekenNa Pustaka, e erbanca banci kukuasai perasanku. Kutama kata-kata Paulus i bas pusuhku, nina, ’Ola pelepas kam talu ibahan si jahat, tapi talukenlah si jahat e alu perbahanen si mehuli.’—Roma 12:21.

”Lit sekalak teman si mehuli nampati aku gelah semangat ka mulihi. Icidahkenna Pengerana 3:6 janah alu mehuli ikatakenna maka kerina kita arus ngenanami ’paksa kebenen’. Mesera kuakap ngaloken kata-katana e, tapi e me si kuperluken. Gundari lit tujunku si mbaru i bas kegeluhen.”

Nina Elizabeth, ”Paksa sontar perjabunndu, perlu kam penampat. Lit sekalak temanku si lalap ndukung aku. Ras-ras kami ngandung, iapulina aku, janah banna maka lanai kuakap aku itadingken tapi ikelengi. Tek aku maka Jahwe si nggunaken ia guna mpepalem pusuhku.”

Luis si nggo ituriken i bas artikel pemena, mekelek kal penakit jantungna janah dua kali menam mate. Gundari arus ibereken man bana oksigen 16 jam tiap wari. Nina Luis, ”Katawari pe aku ertoto man Jahwe. Kenca ertoto, kugejapken kesah si badia mpegegehi aku. Toto erbanca aku  megeng-geng janah tetap erkiniteken man baNa perban kueteh Jahwe ermediate man bangku.”

Nina Petra si umurna kira-kira 80 tahun, ”Melala ateku si kulakoken tapi la aku ngasup. Kitik kal ukurku erkiteken lanai lit gegehku. Menukah kal kuakap latih janah arus lalap man tambar. Rusur kuukuri uga marenda Jesus mindo man Bapana gelah ula min inanamina kiniseran. Tapi gegeh ngenca si ibereken Jahwe, aku pe ipegegehiNa ka. Tambarku tiap wari eme toto. Reh nahangna kuakap kenca ertoto man Dibata.”—Matius 26:39.

Julian si nggo 30 tahun ngadapi penakit sklerosis ganda (saraf tulang belakang), seri perasanna ras Petra. Nina, ”Gundari nggo i datas kursi roda aku. Tapi erguna denga kuakap kegeluhenku perban ngelayani kalak si deban. Alu mere, reh kurangna kuakap suina, janah Jahwe terus mpegegehi kita paksa si perluken. Bagi Paulus, banci kukataken, ’Ngasup aku ngalaken kerina keadan erkiteken kuasa si ibereken Kristus man bangku.’”—Pilipi 4:13.

Nina Antonio, ”Sanga bapangku mate i bas kecelakan, tantangna la aku tek. La kuakap adil—ia erdalan saja nge ngenca. Tapi kai pe la banci kulakoken. Ope denga ia mate, lima wari dekahna ia koma. Erkiteken si e, ngandung aku lalap i lebe-lebe nande, tapi paksa aku sisada getem kal pusuhku. ’Engkai? Engkai?’ Bage ningku sisada.

”Sanga ngadapi perbeben e, terus kupindo man Jahwe gelah banci kukuasai perasanku janah gelah ibereNa aku kedamen. Alu manjar-anjar reh tenangna kuakap. Kuinget nina Pustaka maka ’kerina nge kalak banci kena sial’. Erkiteken Dibata la banci erbual, tek aku maka banci aku jumpa ras bapangku i bas wari kekeken pagi.”—Pengerana 9:11; Johanes 11:25; Titus 1:2.

Robert, si ituriken i bas artikel si pemena, seri ka perasanna. Nina, ”Erkiteken ertoto man Jahwe, aku ras ndeharangku, Maribel, banci nggejapken kedamen si ikataken Pilipi 4:6, 7. Perban dame iakap kami, banci ituriken kami man wartawan kerna arapen kekeken. Aminna gia anak kami mate i bas kecelakan pesawat, melala denga hal si mehuli si banci man ingeten sanga ia geluh denga. E me si rusur iinget kami.

”Sanga ikataken Saksi Jahwe si deban maka tenang kal kami nuriken kiniteken kami arah TV nari, ikataken kami man bana maka enda kerina erkiteken toto turang senina. Tek kal kami maka kerina kata pengapul si ialoken kami rehna i bas Jahwe nari.”

Contoh-contoh ndai ncidahken maka Dibata banci ngapuli kerina kalak si ngenanami perbeben. Uga kam? La soal masalah kai si iadapindu, lit pengapul si banci ialokenndu gelah tetap megeng-geng. * Emaka erpengendeslah kam man Jahwe mindo penampat. Ia me ”Dibata sumbul kerina pengapul.”—2 Korinti 1:3.