Kalak enda nggambarken pasuken si lit i surga si ikut i bas pengkernepen Jerusalem janah ikut ka pagi i bas pengkernepen doni Setan si jahat i Armagedon. Enda sada pemahamen si enggo isesuaiken. Engkai enda perlu?

Ope denga tahun 607 SM, ibereken Jahwe sada pengenehenen man Esekiel kerna kai si pagi terjadi i Jerusalem ope denga ikernepken. I bas pengenehenen e, Esekiel ngidah melala perbahanen si melket si terjadi ije. Kenca si e, idahna enem dilaki si ”sekalak-sekalak maba senjatana”. Lit ka sekalak dilaki si ”uisna linen” janah ”ibabana perkakasna guna nurat”. (Esekiel 8:6-12; 9:2, 3) Dilaki enda isuruh niar-niar kota e ’janah namaken cap i perdempaken tep-tep kalak si erndele ate ras susah erkite-kiteken kerina perbahanen si macik si ilakoken i bas kuta e’. Kenca si e, enem dilaki si maba senjata isuruh munuh kerina kalak si lit i kuta e si la lit capna. (Esekiel 9:4-7) Kai si banci sipelajari arah pengenehenen enda, janah ise dilaki si maba perkakas guna nurat?

Esekiel ndatken pengenehenen enda i bas tahun 612 SM. Enda sada nubuat si penggenepenna si pemena terjadi i bas tahun 607 SM sanga ipediat Jahwe pasuken Babil ngkernepken Jerusalem. Jahwe nggunaken kalak Babil i bas ngukum kalak si la patuh. (Jeremia 25:9, 15-18) Tapi, uga kerna kalak Jahudi si bujur si la setuju nandangi kerina perbahanen si melket si terjadi i kuta e? Ipastiken Jahwe maka kalak enda selamat.

 I bas pengenehenen e, Esekiel labo tuhu-tuhu mere tanda ntah pe muat bagin i bas pengkernepen kuta e. Tapi malekat-malekat si iperentahken engkernepken Jerusalem. Emaka, arah nubuat enda banci sieteh kai si terjadi i surga. Isuruh Jahwe malekat-malekatNa ngaturken pengkernepen kalak jahat ras mastiken kalak bujur iselamatken. *

Nubuat enda igenepi ka i bas wari si pepagi. Mbarenda, sikataken maka dilaki si maba perkakas guna nurat nggambarken kalak si iminaki si nggeluh denga i doni. Sikataken ka maka kalak ibere cap gelah selamat sanga ibegina ras ialokenna berita si meriah. Mbaru-mbaru enda sieteh maka perlu siubah caranta njelasken nubuat enda. Enggo sipelajari i bas buku Matius 25:31-33 maka Jesus me pribadi si ngakimi kerina jelma. Ilakokenna enda sanga kiniseran si mbelin. Paksa si e, kalak si iakimi jadi biri-biri banci iselamatken, janah kalak si iakimi jadi kambing ikernepken.

Emaka, kai si banci sipelajari arah pengenehen Esekiel e? Lit lima pelajarenna:

1. Ope denga Jerusalem ikernepken, Esekiel, Jeremia, Jesaya, mpersingeti kalak si deban kerna kai si nandangi terjadi i kuta e. Kalak e bali bagi kalak si erjaga. Gundari, igunaken Jahwe sada terpuk si kitik kalak si iminaki guna ngajari umatNa ras mpersingeti kalak si deban ope denga reh kiniseran si mbelin. Kerina umat Dibata, eme pelayan Kristus ikut i bas pendahin enda.​—Matius 24:45-47.

2. Esekiel labo mere cap man kalak si banci iselamatken. Bage ka nge umat Dibata si gundari. Kalak enda erberita si meriah janah mpersingeti kalak si deban ngenca kerna kai si nandangi terjadi i bas wari si pepagi. Pendahin erberita si meriah i belang-belang doni enda, ilakoken alu penampat malekat-malekat.​—Ketangkasen 14:6.

3. Kalak si iselamatken i bas jaman Esekiel, labo tuhu-tuhu lit cap i bas perdempakenna. Gundari pe kalak si nandangi iselamatken labo tuhu-tuhu lit capna. Kai si arus ilakoken kalak gelah selamat i bas kiniseran si mbelin? Sanga ibegi kalak e persinget, arus iusihna Kristus, ibaktikenna dirina man Dibata, janah idukungna senina-senina Kristus alu erberita si meriah. (Matius 25:35-40) Sanga kiniseran si mbelin, kalak si ibere cap ertina kalak si ipilih guna iselamatken.

4. Dilaki si maba perkakas guna nurat nggambarken Jesus. I bas kiniseran si mbelin, Jesus mere cap man rarasen si nterem sanga itentukenna kalak e jadi biri-biri. Kenca si e, lit pagi kesempaten kalak e nggeluh si rasa lalap i doni.​—Matius 25:34, 46. *

5. Gundari, enem dilaki si maba senjata, nggambarken pasuken si lit i bas surga, si peminpinna eme Jesus. Mis pagi ikernepken kalak e bangsa-bangsa ras kerina kalak jahat.​—Esekiel 10:2, 6, 7; Ketangkasen 19:11-21.

Kai sipelajari arah pengenehenen enda, nampati kita tek maka Jahwe la ngkernepken kalak benar radu ras kalak jahat. (2 Petrus 2:9; 3:9) Pelajaren e pe ngingetken kita maka pendahin erberita i bas jamanta seh kal pentingna. Kerina kalak perlu megi persinget ope denga reh kedungen e!​—Matius 24:14.