1. Engkai Jahwe Pande Kudin si mbelinna?

I BAS November 2010, sada pot antik Cina ilelang si ergana kira-kira 900 miliar rupiah, i Inggris. Tuhu-tuhu luar biasa sekalak pande kudin banci mbentuk taneh dah si la meherga jadi pot si mejile ras meherga. Jahwe, Pande Kudinta, ndauh belinen asangken pande kudin si deban. Pustaka ngatakenca maka itepa Jahwe manusia si serta arah ”abu taneh” eme, taneh dah nari. (Kejadin 2:7) Manusia e, Adam, igelari ”anak Dibata” janah lit kiningasupenna guna ngusih sifat-sifat Dibata.​—Lukas 3:38.

2, 3. Uga kita banci ngusih perukuren kalak Israel si enggo robah?

² Kenca Adam mberontak man Dibata si Nepa ia, lanai ia anak Dibata. Tapi enterem kesusuren Adam milih Jahwe jadi penguasana. (Heber 12:1) Alu meteruk ukur, patuh kalak e man Dibata. Alu bage icidahken kalak e maka ia erpihak man Dibata, labo man Setan, guna jadi  Bapa ras pande kudinna. (Johanes 8:44) Kesetianna man Dibata ngingetken kita nandangi kata-kata kalak Israel si enggo robah, ”Tapi kam kap Bapa kami o [Jahwe]; kami taneh dah janah desken sekalak Pande Kudin, itepaNdu kami.”​—Jesaya 64:8.

³ Umat Jahwe si gundari pe iusahakenna kal meteruk ukur ras patuh. Ianggapna e sada kinihamaten guna ngelebuh Jahwe Bapana, janah ate kalak e gelah Ia jadi Pande Kudinna. Nggit nge kita bagi taneh dah si medate si banci ibentuk Dibata jadi sada pot si meherga? Sianggap nge turang seninanta sangana denga ibentuk Jahwe? Gelah benar perukurenta kerna si e, sibahas kari uga cara Jahwe milih kalak si ibentukNa, engkai ibentukNa kalak e, janah uga ia ngelakokenca?

4. Uga Jahwe milih kalak si itarikNa? Bereken contohna.

⁴ Cara Jahwe ngenehen manusia la seri bagi caranta. Tapi, inehenNa pusuhta. (Oge 1 Samuel 16:7b.) Si enda teridah paksa ibentukNa runggun Kristen. Enterem kalak si iakap la meherga itarikNa ku Ia ras ku anakNa. (Johanes 6:44) Salah sada contohna eme Saul kalak Parisi, ’si nai ncekuraki ras niksa dingen ngombang-gombangi Jesus’. (1 Timotius 1:13) Tapi Jahwe mereksa pusuh Saul janah la iakapNa ia kalak si la erguna. (Kuan-kuanen 17:3) Sebalikna, Jahwe ngenehen maka Saul e banci jadi kalak ’si ipilih’ guna mberitaken ”man bangsa Israel bage pe man bangsa-bangsa si deban ras raja-raja. (Perbahanen 9:15) Jahwe pe milih kalak si deban si banci ibentuk ”guna pemaken si meherga”, termasuk bekas pemabuk, si erlagu la mehuli ras pinangko. (Roma 9:21; 1 Korinti 6:9-11) Alu terus erlajar Pustaka si Badia, kiniteken kalak e reh paguhna man Jahwe janah nggit ia ibentukNa.

5, 6. Uga arusna kinitekenta kempak Jahwe selaku Pande Kudinta mpengaruhi perukurenta nandangi (a) kalak si lit i bas daerahta? (b) turang seninanta?

⁵ Tek kita maka Jahwe ngasup milih ras narik kalak si benar. Emaka, ula sihakimi kalak si lit i bas daerahta ntah pe i bas runggun. Perdiateken uga tanggapen Michael paksa idahi Saksi Jahwe. Nina, ”Sitik pe la ia kutulihken tempa-tempa la ia lit i je. Janah kasar kal aku! I bas kesempaten si deban, jumpa aku ras sada keluarga si jadi kal ateku ngidah lagu langkahna. Sada wari sengget kal aku—kepeken kalak e Saksi Jahwe! Perbahanenna e erban aku rukur, engkai maka nembeh ateku kalak e. Dungna mis aku sadar maka bage perbahanenku erkiteken  kubegiken ranan kalak si nterem ras la kutandai uga situhuna Saksi Jahwe.” Michael merhat meteh terbuen janah nggit erlajar Pustaka. Dungna ia iperidiken janah jadi pelayan sepenuh waktu.

⁶ Adi siergai Jahwe selaku Pande Kudinta, perukurenta pe jadi positif nandangi turang-seninanta. Sianggap kalak enda sangana ibentuk. Bage me cara Jahwe ngenehen kalak e. InehenNa ise kita situhuna janah ietehNa kinilasertanta e kentisik ngenca. IetehNa ka nge pagi jadi kalak si uga tep-tep manusia e. (Masmur 130:3) Kita banci ngusih Jahwe adi perukurenta positif nandangi turang-seninanta. Kita pe banci erdahin ras Pande Kudinta guna nampati turang-seninanta erban kemajun. (1 Tesalonika 5:14, 15) Pertua-pertua i bas runggun arus jadi usihen si mehuli i bas ngelakokenca.​—Epesus 4:8, 11-13.

7. Engkai maka iergaindu ajar Jahwe?

⁷ Lit si ngatakenca, ’La pernah kuergai ajar si kudatken i bas orang tuangku nari seh asa lit pupusku.’ Kenca kita reh tuana, kita banci ngergai ajar e, perban sieteh maka enda bukti kekelengen. (Oge Heber 12:5, 6, 11.) Payo, Jahwe engkelengi kita bagi anakNa. Eme sabapna iajarNa kita alu sabar ntah pe ibentukNa. AteNa kita jadi kalak si pentar janah ermeriah ukur, bage pe ngkelengi Ia selaku Bapanta. (Kuan-kuanen 23:15) Jahwe la senang ngidah kita rate mesui ras mate selaku kalak perdosa si la nggit robah.​—Epesus 2:2, 3.

8, 9. Uga Jahwe ngajari kita gundari, janah uga pengajaren enda terus lit i doni si mbaru?

⁸ Sope denga sitandai Jahwe, banci saja melala sifatta si la mehuli. Tapi ibentukNa janah isampatiNa kita gelah robah, asilna sifat-sifatta jadi mehuli. (Jesaya 11:6-8; Kolose 3:9, 10) Kita nggeluh i bas pardis rohani. Gundari, enda me sada ingan si iban Jahwe si banci mbentuk kita. I je banci sigejapken keamanen ras ketenangen aminna doni isekelewetta jahat. Kalak si ipebelin alu la nggejapken kekelengen i bas keluargana, gundari nggejapken kekelengen si tuhu-tuhu arah turang-seninana i bas pardis rohani. (Johanes 13:35) Janah kita enggo erlajar guna engkelengi kalak si deban. Tapi si pentingna, kita banci nandai Jahwe janah gundari banci sigejapken kekelengenNa si bagi bapa.​—Jakup 4:8.

⁹ I doni si mbaru, banci sigejapken pasu-pasu terbelinen arah pardis  rohani nari janah sinanami ka kesenangen i bas pardis jasmani. I je pagi, Jahwe terus mbentuk ras ngajari kita alu cara si la terukuri gundari. (Jesaya 11:9) IbanNa ka perukuren ras kulanta jadi serta. Jadi, reh nukahna siakap ngangkai ras matuhi perentaNa. Emaka, teruslah sipediat Jahwe mbentuk kita ras sicidahken man baNa pengerganta kerna kekelengenNa.​—Kuan-kuanen 3:11, 12.

10. Uga Jesus ncidahken kesabaren ras kebeluhen Pande Kudin Si Mbelin?

¹⁰ Pande kudin si beluh nandai jenis taneh dah si ibentukna. Pande Kudinta pe, Jahwe, tuhu-tuhu nandai kita. Ietehna kelemahenta, keterbatasenta, bage pe kemajun si enggo siban, janah ibentukna kita sekalak-sekalak erpalasken keadanta. (Oge Masmur 103:10-14.) Banci sipelajari uga perukuren Jahwe kerna dirinta alu ngenehen uga perbahanen Jesus nandangi kinilasertan rasul-rasulna. I bas sada paksa, rasul-rasul sijabapen kerna ise si mbelinna. Adi kam ije, uga perukurenndu kerna perbahanen rasul-rasul e? Banci saja iakapndu kalak e la bagi taneh dah si medate. Tapi ieteh Jesus maka kalak e banci ibentuk adi nggit ia mbegiken pedahna si mehuli ras sabar janah adi iusih kalak e sifatna si meteruk ukur. (Markus 9:33-37; 10:37, 41-45; Lukas 22:24-27) Kenca kinikeken Jesus, rasul-rasul ngaloken kesah Dibata janah lanai iutamakenna kerna ise si mbelinna. Tapi, si iutamaken kalak e pendahin si ibereken Jesus.​—Perbahanen 5:42.

11. Alu cara kai saja Daud mbuktiken maka ia bagi taneh dah si medate, janah uga kita banci ngusih ia?

¹¹ Gundari, Jahwe nggunaken Pustaka si Badia, kesah si badia, ras runggun guna mbentuk kita. Uga Pustaka si Badia banci mbentuk kita? Perlu sioge, siukuri alu mbages, janah sipindo gelah isampati Jahwe kita ndalanken kai si enggo sipelajari. Isuratken Raja Daud, ”Tupung aku tayang i das ingan medemku, kuinget Kam; gedang-gedang berngi rukur aku kerna Kam.” (Masmur 63:7) Isuratkenna ka, ”Kupuji [Jahwe], erkiteken Ia kap si mabai aku, dingen pusuh peratenku ngajari aku tupung berngi.” (Masmur 16:7) Jelas me, Daud ngukuri pedah-pedah Jahwe janah ipediatna e mbentuk pusuh ras perukurenna si mbages, amin gia paksa mesera iakapna ngaloken pedah e. (2 Samuel 12:1-13) Daud mereken usihen si mehuli man banta, kerna sifat meteruk rukur ras kepatuhen. Emaka sungkun dirindu, ’Sanga kuoge Pustaka si Badia, kuukuri nge e janah kupediat nge pedah-pedah Dibata mbentuk pusuh ras perukurenku si mbages? Banci nge kulakoken lebihen asangken si e?’​—Masmur 1:2, 3.

12, 13. Uga Jahwe mbentuk kita arah kesah si badia bage pe runggun Kristen?

¹² Kesah si badia banci mbentuk kita alu piga-piga cara. Contohna, banci isampatina kita ngusih kepribadin Jesus janah ncidahken ulih kesah.  (Galatia 5:22, 23) Sada bagin i bas kesah e, eme kekelengen. Kita ngkelengi Dibata ras patuh ateta man baNa janah nggit ibentukNa, erkiteken sieteh maka perentahNa guna kiniulinta. Kesah si badia pe banci mere gegeh gelah la kita ibentuk doni si jahat enda. (Epesus 2:2) Sanga rasul Paulus nguda denga, ia ipengaruhi peminpin agama Jahudi si sombong. Tapi kesah si badia nampati ia gelah robah. I bas pudi wari itulisna, ”Ngasup aku ngalaken kerina keadan erkiteken kuasa si ibereken Kristus man bangku.” (Pilipi 4:13) Kita pe perlu mindo kesah si badia, erkiteken sieteh Jahwe njabab totonta si meteruk ukur.​—Masmur 10:17.

¹³ Jahwe pe nggunaken runggun ras pertua i bas mbentuk kita sekalak-sekalak. Contohna, adi iperdiateken pertua maka lit sada kelemahenta, iusahakenna nampati kita. Tapi, pedah si iberekenna labo erpalasken pendapatna. (Galatia 6:1) Alu meteruk ukur kalak e ertoto man Jahwe mindo pengangkan ras kepentaren. Kenca si e, igunakenna Pustaka si Badia ras publikasi guna ndarami keterangen si cocok ras keadanta. Adi pertua ndahi kam janah iberekenna pedah si mehuli ras perkeleng, banci saja kerna cara peruisndu, ingetlah maka enda bukti kekelengen Dibata man bandu. Adi ipakekenndu pedah e, kam bali bagi taneh dah si medate si banci ibentuk Jahwe, janah enda guna kiniulinndu.

14. Aminna pe lit wewenang Jahwe i bas mbentuk kita, uga Ia ngergai kebebasenta?

¹⁴ Adi siangkai uga Jahwe mbentuk kita, enda nampati kita gelah mehuli  hubungenta ras turang seninanta. Perukurenta pe jadi positif nandangi kalak i bas daerahta, termasuk pelajar Pustaka si Badianta. Ope denga mbentuk taneh dah, sekalak pande kudin perlu mbersihken taneh dah janah ngambekken batu-batu ras kerina si la erguna i bas taneh e. Jahwe, Pande Kudin Si Mbelin, nampati kalak si nggit ibentuk. La ipaksaNa kalak robah, tapi ipebetehkenNa patoken si bersih. Kalak e me si mutusken ia nggit robah ntah lang.

15, 16. Uga pelajar Pustaka si Badia ncidahken maka kalak e nggit ibentuk Jahwe? Bereken contoh.

¹⁵ Perdiateken kai si terjadi man Tessie i Australia ope denga ia jadi Saksi. Menukah kal iakapna erlajar Pustaka. Tapi, ia la erban kemajun, janah la reh ku perpulungen. Turang senina si nampati ia erlajar nggo ertoto man Jahwe janah iputuskenna ngadi ngajari ia. Kenca si e sanga kalak e erlajar, la iarapna ikataken Tessie man bana engkai ia la erban kemajun. Ikatakenna maka munafik iakapna bana erkiteken merhat denga ia erjudi. Tapi dungna iputuskenna ngadi erjudi.

¹⁶ La ndekah kenca si e, Tessie mulai reh ku perpulungen janah ncidahken sifat-sifat Kristen aminna pe teman-temanna si mbarenda nokohi ia. Dungna, Tessie iperidiken janah jadi perintis biasa, aminna pe anakna kitik denga. Jelas me, sanga pelajar Pustaka si Badia mulai ngkelengi Dibata ras ibanna perubahen, Dibata banci rembak ras ia janah ibentukNa ia jadi pot si meherga.

17. (a) Uga perasanndu kerna Jahwe selaku Pande Kudinndu? (b) Kai si ibahas i bas artikel seterusna?

¹⁷ Lit denga piga-piga pande kudin nggunaken tanna alu metenget mbentuk taneh dah jadi pot si mejile. Jahwe pe sabar mbentuk kita alu nggunaken pedahNa, janah iperdiatekenNa uga tanggapenta. (Oge Masmur 32:8.) Banci nge igejapkenndu maka Jahwe ermediate man bandu? Banci nge igeajapkenndu maka Jahwe mbentuk kam alu metenget? Adi bage, sifat kai si banci nampati kam gelah tetap bagi taneh dah si medate si banci terus ibentuk Jahwe? Sifat kai si arus ipedauhndu gelah la kam jadi taneh dah si piher? Janah uga orang tua banci erdahin ras Jahwe i bas mbentuk anak-anakna? Artikel seterusna banci njabab penungkunen enda.