1, 2. (a) Engkai maka terberita kal kata-kata i bas Ulangen 6:4? (b) Engkai maka ibelasken Musa kata-kata enda?

ENGGO ratusen tahun dekahna kalak Jahudi nggunaken kata-kata i bas Ulangen 6:4 jadi sada bagin i bas totona si khusus. Toto enda igelari Syema, e me kata pemena i ayat enda i bas cakap Heber. Nterem kalak Jahudi mbelasken toto enda tiap wari i bas erpagi-pagi ras karaben guna ncidahken maka Jahwe saja ngenca si isembahna.

² Kata-kata enda bagin i bas khotbah pendungi si ipeseh Musa man bangsa Israel. I bas tahun 1473 Sope Masehi, bangsa e sangana i taneh Moab, ersikap guna ngepari Lau Jordan janah ngerebut Taneh Perjanjin. (Ulangen 6:1) Musa minpin kalak enda 40 tahun dekahna janah iarapkenna gelah kalak e la mbiar ngadapi tantangen si nandangi reh. Kalak e perlu tek man Dibata Jahwe, janah setia man baNa. Idungi Musa khotbahna alu ngiahken kalak e gelah ndalankenca. Kenca  ibelaskenna Sepuluh Perentah ras undang-undang si debanna si rehna i bas Jahwe nari, ibereken Musa persinget si erguna man kalak e si banci sioge i bas Ulangen 6:4, 5. (Oge.)

3. Penungkunen kai saja si ibahas bas artikel enda?

³ Ieteh bangsa Israel maka ’Jahwe si sada e ngenca Dibata’. Bangsa Israel si setia nembah sada Dibata, Dibata nini-ninina. Tapi engkai maka iingetken Musa kalak e adi ’Jahwe si sada e ngenca Dibata’? Kai hubungenna kebeneran e ras ngkelengi Dibata asa ateta lit, asa tendinta lit, janah asa gegehta lit? Janah uga kata-kata i bas Ulangen 6:4, 5 erguna man banta gundari?

4, 5. (a) Kai ertina kata-kata ’Jahwe si sada e ngenca Dibata’? (b) Uga maka Jahwe la seri ras dibata bangsa-bangsa?

⁴ La lit si seri bagi Ia. Istilah ’Jahwe si sada e ngenca Dibata’ banci iertiken maka la lit ise pe si bali bagi Ia. Engkai maka bage nina Musa? Pasti Ia labo sangana mbuktiken maka ajaren Dibata Si Telu Sada salah. Jahwe si nepa langit ras doni janah Penguasa alam semesta. Ia ngenca Dibata si tuhu-tuhu, la lit sada pe dibata si seri ras Ia. (2 Samuel 7:22) Emaka, kata-kata Musa ngingetken bangsa Israel gelah Jahwe saja si isembahna. La banci iusih kalak e bangsa si tading isekelewetna si ngelayani dewa-dewi palsu, si iakapna dewa-dewi e banci ngkuasai bagin-bagin alam enda.

⁵ Contohna, kalak Mesir nembah dewa matahari-Ra, dewi langit-Nut, dewa bumi-Geb, dewa Nil-Hapi, ras melala rubia-rubia si deban. Icidahken Jahwe maka belinen Ia asangken kerina dibata palsu e paksa iberekenNa sepuluh mara. Dibata kalak Kanaan si mbelinna e me Baal, dibata palsu si iakapna banci mereken kegeluhen janah iteki ka selaku dewa langit, udan, ras angin. I bas melala daerah, enterem kalak tek maka Baal banci mereken perlindungen. (Bilangen 25:2b,3) Kalak Israel iingetken maka Dibatana ”Dibata si tuhu-tuhu”, la lit si seri bagi Ia, erkiteken ’Jahwe si sada e ngenca Dibata’.​—Jeremia 10:10; Ulangen 4:35, 39.

6, 7. Kai erti si deban ’Jahwe si sada e ngenca Dibata’, janah uga Jahwe mbuktikenca?

⁶ Tetap ras Setia. Erti kata ”sada” i bas istilah ’Jahwe si sada e ngenca Dibata’ e me tujun ras perbahanenNa lalap terteki. Dibata Jahwe la berubah. Lalap Ia setia, tetap, ras benar. Contohna Ia erjanji man Abraham maka kesusurenna pagi tading i Taneh Perjanjin. Janah iban Jahwe melala mukjizat guna nepati janjiNa. Empat ratus telu puluh tahun kenca Ia erjanji,  tujun Jahwe la berubah.​—Kejadin 12:1, 2, 7; Keluaren 12:40, 41.

⁷ Ratusen tahun kenca si e, bangsa Israel igelari Jahwe selaku saksiNa janah nina, ”Aku ngenca Dibata si tuhu-tuhu. La lit Dibata seakatan Aku; nai nari seh rasa lalap la lit si deban Dibata.” Ipastiken Jahwe ka maka tujunNa la pernah berubah paksa ikatakenNa, ”Aku kap Dibata, janah rasa lalap nge Aku Dibata.” (Jesaya 43:10, 13; 44:6; 48:12) Tuhu-tuhu sada hak istimewa man kalak Israel banci ngelayani Dibata si la pernah berubah ras lalap setia! Kita pe ndatken hak istimewa si seri gundari.​—Maleaki 3:6; Jakup 1:17.

8, 9. (a) Kai si ituntut Jahwe i bas kita nari? (b) Uga Jesus ncidahken maka penting kal kata-kata Musa e?

⁸ Musa ngingetken kalak Israel maka Jahwe lalap ngkelengi ras mperdiateken kalak e. Emaka, iarapken Jahwe gelah kalak e nembah Ia saja ras ngkelengi Ia asa atena lit, tendina lit, ras gegehna lit. Katawari paksa pe, orang tua perlu ngajari anak-anakna kerna Jahwe gelah anak si nguda denga pe banci ngelayani Jahwe saja.​—Ulangen 6:6-9.

⁹ La pernah iubah Jahwe tujunNa, emaka tuntutenNa man umatNa pe la pernah berubah. Adi siban ateta Jahwe ermeriah ukur alu penembahenta, Ia saja ngenca si arus isembah janah ngkelengi Ia asa ateta lit, ukurta lit, ras gegehta lit. Enda me perentah si pentingna si ikataken Jesus. (Oge Markus 12:28-31.) Mari sipelajari uga perbahanenta ncidahken maka kita tek ”Jahwe si sada e kap ngenca Dibatanta”.

10, 11. (a) Kai ertina nembah Jahwe saja? (b) Uga anak perana Heber i Babil ncidahken maka Jahwe saja ngenca si isembahna?

¹⁰ Jahwe e ngenca Dibatanta. Ia ngenca si sembah. I bas penembahenta man Jahwe la banci lit dibata si deban ntah pe perukuren ras kebiasaan si salah. Jahwe labo ngenca belinen ntah pe gegehen asangken dibata-dibata si deban. Ia Dibata si tuhu-tuhu. Jahwe saja ngenca si arus sisembah.​—Oge Ketangkasen 4:11.

¹¹ I bas buku Daniel, banci sioge kerna anak perana Heber eme Daniel, Hananya, Misael, ras Asaria. Icidahken kalak e maka Jahwe saja ngenca si isembahna alu la nggit man pangan si ngelanggar peraturen Jahwe. Telu teman Daniel pe la nggit nembah berhala, gana-gana emas Nebukadnesar. Erkiteken Jahwe me si pentingna i bas kegeluhenna. Kalak e tuhu-tuhu setia man baNa.​—Daniel 1:1-3:30.

12. Guna ncidahken maka Jahwe ngenca sisembah, i bas kai kita arus metenget?

¹² Jahwe arus si pentingna bas geluhta. Adi sicidahken ateta maka Jahwe saja ngenca sisembah, arus kita metenget gelah ula lit kai pe si nggantiken  Ia. Kai saja si banci nggantiken Ia? I bas sepuluh perentah, ilarang Jahwe umatNa nembah dibata si deban alu cara kai pe. (Ulangen 5:6-10) Gundari, melala jenis berhala janah piga-piga mesera nandaisa. Tapi perentahNa tetap seri. Jahwe la berubah. Mari sinehen uga kita banci mpedauh penembahen berhala.

13. Kai si banci ncedai hubungenta ras Jahwe?

¹³ I bas Kolose 3:5 (oge), ituriken kerna kai si banci ncedai hubungenta ras Jahwe. Sieteh maka kerangapen lit hubungenna ras penembahen berhala. Engkai maka bage? Paksa kita merincuh kal nandangi sada hal, misalna nandangi sen ntah pe kemewahen, enda banci ngkuasai kegeluhenta, tempa-tempa lit kuasana bagi dibata. Kerina dosa si ituriken i bas Kolose 3:5 lit hubungenna ras kerangapen, sada bentuk penembahen berhala. Emaka, adi mbelin sura-suranta nandangi kerina enda, dungna belinen kekelengenta man bana asangken man Dibata. Adi bage, lanai Jahwe ngenca Dibatanta. Pasti la kita nggit e terjadi.

14. Persinget kai si ibereken rasul Johanes?

¹⁴ Rasul Johanes pe nuriken kerna hal si seri. Ipersingetina maka ise si ngkelengi kai si lit i doni enda, ”e me kai si idahna janah ngena atena seh maka man bana atena, ras kai si lit i doni enda si erbahanca meganjang ukur kalak”, dungna ’la ikelengina Bapa.’ (1 Johanes 2:15, 16) Emaka perlu sipereksa dirinta alu ratur, enggo nge kita ngkelengi doni enda ntah lang. Banci saja kita enggo mulai tertarik nandangi hiburen, kalak si nterem, penampilen bage pe cara peruis doni enda. Ntah pe banci saja kita merhat ndatken ”kemulian” arah sekolah si meganjang. (Jeremia 45:4, 5) Doni si mbaru enggo seh kal ndeherna. Emaka perlu siinget kata-kata Musa! Adi siangkai ras tuhu-tuhu kita tek maka ”Jahwe si sada e kap ngenca Dibatanta”, pasti Ia saja ngenca si sembah ras silayani Ia alu cara si ngena ateNa.​—Heber 12:28, 29.

15. Engkai ipersingeti Paulus kalak Kristen maka sada ngenca Dibatana eme Jahwe?

¹⁵ Istilah ’Jahwe si sada e ngenca Dibata’ nampati kita ngangkai maka Jahwe ngarapken umatNa ersada janah seri tujun geluhna. I bas runggun Kristen si pemena lit kalak Jahudi, Junani, Roma ras bangsa si debanna. La seri latar belakang, kebiasan, bage pe selera kalak e. Perban si e, mesera iakap piga-piga kalak ngaloken cara si mbaru i bas nembah Dibata ntah pe nadingken kebiasan si dekah. Erkiteken si e, perlu ipersingeti Paulus maka kalak Kristen sada ngenca Dibatana eme Jahwe.​—Oge 1 Korinti 8:5, 6.

16, 17. (a) Nubuat kai si terjadi gundari, janah kai hasilna? (b) Kai si banci ncedai persadanta?

 ¹⁶ Uga kerna runggun Kristen si gundari? Nabi Jesaya ngatakenca, ”I bas wari-wari si arah pudi”, enterem kalak arah kerina bangsa ras-ras ngelayani Jahwe. Nina kalak e, ”Kai ateNa si bahan iajarkenNa man banta; arah dalan si enggo ipilihNa erdalan me kita.” (Jesaya 2:2, 3) Meriah ukurta ngidah nubuat e enggo terjadi gundari! Turang seninanta reh i bas erbage daerah, cakap, ras kebiasan. Tapi kita ersada ngelayani Jahwe. Aminna pe bage, erkiteken kita la seri maun-maun la menukah ngelakokenca.

¹⁷ Contohna, uga perasanndu nandangi turang senina si la seri kebudayanna ras kam? Bahasana, peruisna, adat-istiadatna, bage pe panganna kerina la seri ras kam. La nge kam nggit erteman ras ia janah ras kalak si seri ras kam saja nge kam nggit erteman? Uga perasanndu nandangi pertua si ngudan asangken kam ntah pe si la seri suku ras kebudayanna? Adi la kita  metenget, perbedan enda banci mpengaruhi kita janah ncedai persadanta.

18, 19. (a) Pedah kai si lit i bas Epesus 4:1-3? (b) Kai si banci silakoken guna njaga persadan runggun?

¹⁸ Uga carana kita banci ngatasisa? Ibereken Paulus pedah man kalak Kristen i Epesus, kota si mbelin si erbage-bage latar belakang pendudukna. (Oge Epesus 4:1-3.) Ipebetehken Paulus gelah ipebelin kalak e sifat-sifat bagi meteruk ukur, lemah lembut, sabar, ras kekelengen. Sifat-sifat enda bali bagi tiang si megegeh si erban sada rumah tetap pajek. Gelah rumah e tetap paguh iperluken usaha si mbelin. Iarapken Paulus gelah kalak Kristen i Epesus mpertahanken ’persadan si ibereken kesah e’.

¹⁹ Arus siusahaken asa ngasupta njaga persadan runggun. Uga cara ngelakokenca? Si pemena, perlu siusahaken ras sicidahken sifat-sifat bagi si ituriken Paulus eme meteruk rukur, lemah lembut, sabar ras kekelengen. Si peduaken, kita arus ”irakut alu enteguh i bas perdamen.” Kesalahpahamen bali bagi regat si banci ncedai persadanta, emaka perlu siusahaken ngatasi kesalahpahamen e gelah kita tetap erdame ras ersada.

20. Uga kita ncidahken maka ”Jahwe si sada e kap ngenca Dibatanta”?

²⁰ ”Jahwe si sada e kap ngenca Dibatanta.” Tuhu-tuhu erkuasa kal kata-kata enda! Persinget e mere gegeh man kalak Israel gelah megenggeng sanga ngadapi tantangen paksa masuk ras ngerebut Tanah Perjanjin. Kata-kata enda banci ka mpegegehi kita gelah ngasup ngelewati kiniseran si mbelin ras masuk ku Pardis. Emaka, ertekadlah kita nembah Jahwe saja. Perlu sikelengi ras silayani Ia asa ateta, ukurta, ras gegehta lit janah siusahaken njaga perdamen ras persadanta. Adi terus silakoken enda, iakui Jesus kita selaku biri-birina janah banci sigejapken janjina enda: ”Marilah kam si enggo ipasu-pasu BapangKu; alokenlah Kinirajan si enggo isikapken Dibata man bandu mulai kin ijadikenNa doni enda.”​—Matius 25:34.