1, 2. Engkai ikataken Dibata maka Daniel sekalak dilaki si ’keleng kal ateNa’, janah uga kita banci patuh bagi Daniel?

SANGA kalak Jahudi ibaba ku Babil, kalak e masuk ku sada kota si dem alu berhala ras kalak si nembah roh-roh jahat. Tapi, kalak Jahudi si setia, bagi Daniel ras telu temanna, la nggit ibentuk kalak Babil. (Daniel 1:6, 8, 12; 3:16-18) Daniel ras temanna njadiken Jahwe selaku Pande Kudinna ras nembah Ia saja. Aminna gia Daniel nggeluh i bas lingkungen si seh kal jahatna, malekat Dibata ngatakenca maka ia sekalak dilaki si ”keleng kal ate Dibata”.​—Daniel 10:11, 19.

² Sekalak pande kudin banci saja nekan taneh dah ku bas sada cetaken guna erban bentuk tertentu. Umat Dibata meteh maka Jahwe penguasa alam semesta janah lit wewenangNa mbentuk bangsa-bangsa. (Oge Jeremia 18:6.) Lit ka hakNa mbentuk kita sekalak-sekalak. Tapi, la ipaksa Jahwe ise pe robah. IarapkenNa kita nggit ibentukNa. I bas artikel enda sipelajari kari uga  kita banci tetap bagi taneh dah si medate i bas tan Dibata. Sibahas kari telu penungkunen enda: (1) Uga kita banci mpedauh sifat-sifat si banci saja erban kita nulak pedah Dibata janah jadi taneh dah si piher? (2) Uga kita banci mpebelin sifat-sifat si mehuli gelah tetap patuh ras bali bagi taneh dah si medate? (3) Uga orang tua banci radu erdahin ras Dibata sanga mbentuk anak-anakna?

3. Sifat-sifat kai si banci erban piher ukurta? Bereken contohna.

³ ”Manjar-anjar kam rukur, sabap perukurenndu kap si mabai dalan kegeluhenndu,” nina Kuan-kuanen 4:23. Gelah ukurta la jadi piher, arus sipedauh sifat-sifat si negatif bagi kesombongen, perbahanen dosa, ras kurang kiniteken. Enda banci erban kita lanai patuh ras mberontak. (Daniel 5:1, 20; Heber 3:13, 18, 19) Eme si terjadi nandangi Raja Ussia i Juda. (Oge 2 Kronika 26:3-5, 16-21.) Tangtangna, Ia kalak si patuh janah rembak ras Dibata, emaka ibere Dibata ia gegeh. Tapi, ”kenca Raja Ussia enggo megegeh, turah ukurna meganjang”. Ia jadi seh kal sombongna, emaka icubakenna nutung si merim-merim i bas rumah pertoton aminna gia imam-imam ngenca si banci ngelakokenca. Sanga ikataken imam-imam kesalahenna e, merawa kal Ia! Ipeteruk Jahwe raja si sombong e, janah ibanna ia gadamen seh asa mate.​—Kuan-kuanen 16:18.

4, 5. Kai si banci terjadi adi la sipedauh kesombongen? Bereken sada contoh.

⁴ Adi la sipedauh kesombongen, banci mulai siakap maka kita ulin asangken kalak si deban janah mulai situlak pedah si ibereken man banta i bas Pustaka nari. (Kuan-kuanen 29:1; Roma 12:3) Eme si terjadi man sekalak pertua si gelarna Jim. La ia setuju man pertua si deban i bas runggun kerna sada masalah. Nina Jim, ”Kukataken man kalak e maka la ia perkeleng, dungna kutadingken rapat e.” Kira-kira enem bulan kenca si e, pindah ia ku runggun si deban tapi i je la ipilih ia jadi pertua. Kitik kal ukur Jim. Tek kal ia maka ia si benar, emaka ngadi ia ngelayani Jahwe janah lanai aktif sepuluh tahun dekahna. Mulai ia jadi sombong janah isalahkenna Jahwe nandangi kai si terjadi. Piga-piga tahun dekahna, turang senina ndahi ia janah iusahaken kalak e nampati ia, tapi Jim nulak penampat e.

⁵ Nina Jim, ”Lalap kuukuri perbahanen kalak e.” Pengalamenna enda ncidahken maka kesombongen banci erban kita mbenarken perbahanenta si salah. Adi e terjadi, lanai kita bagi taneh dah si medate. (Jeremia 17:9) Pernah nge kitik ukurndu iban turang senina? Pernah nge ceda atendu erkiteken kebenen hak istimewa? Uga nge tanggapenndu? Jadi sombong nge kam, ntah isedarindu maka erdame ras turang senina bage pe tetap setia man Jahwe hal si pentingna?​—Oge Masmur 119:165; Kolose 3:13.

6. Kai si banci terjadi adi terus silakoken dosa?

 ⁶ Adi lit si terus ngelakoken dosa janah ibunikenna perbahanenna e, banci saja mesera iakapna ngaloken pedah i bas Dibata nari. Akibatna reh nukahna iakapna ngelakoken dosa. Sekalak turang senina ngatakenca, dungna lanai terganggu pusuhna sanga ngelakoken dosa. (Pengerana 8:11) Turang senina si deban si biasa nonton pornografi i bas pudi wari ngatakenca, ”Mulai kupandangi pertua.” Kebiasanna e ncedaken hubungenna ras Jahwe. Sanga perbahanenna e tereteh, idatna penampat i bas pertua nari. Payo, kerina kita la serta. Tapi adi rusur sipandangi kalak si mereken pedah ntah pe erban alasen sanga ngelakoken kesalahen sebalikna asangken mindo gelah Dibata ngalemi salahta ras nampati kita, ukurta banci jadi piher.

7, 8. (a) Kai si ncidahken maka kalak Israel la erkiniteken? (b) Kai pelajarenna man banta?

⁷ Sanga Jahwe mbebasken kalak Israel i bas Mesir nari, kalak e ngidah melala mukjizat. Aminna pe bage, sanga reh deherna kalak e ku taneh perjanjin, ukurna jadi piher. Engkai? La lit kinitekenna man Dibata. Sebalikna, asangken tek man Jahwe, kalak e jadi mbiar ras jungut-jungut nentang Musa. Janah mulih ka atena ku Mesir, i ja kalak e pernah jadi budak! Tuhu-tuhu ceda kal ate Jahwe janah nina, ”Asa kai nari dekahna bangsa enda nulak Aku?” (Bilangen 14:1-4, 11; Masmur 78:40, 41) Kalak Israel e mate i taneh mesawang erkiteken piher ukurna janah kurang kinitekenna.

⁸ Gundari, nggo ndeher kal kita ku doni si mbaru, janah kinitekenta paksana iuji. Emaka perlu sipereksa uga bagesna kinitekenta. Uga kita banci meteh maka kinitekenta paguh denga? Banci sipereksa kata-kata Jesus i bas Matius 6:33. ’Payo nge tujun ras keputusenku mbuktiken maka tuhu-tuhu aku tek man kata-kata Jesus? Nggit nge aku nadingken perpulungen ntah pe la erberita erkiteken ndarami sen? Kai nge kulakoken adi pendahinku nuntut aku nggunaken melala waktu ras tenaga? Kupediat nge doni enda mbentuk aku janah dungna erban aku ngadi ngelayani Jahwe?’

9. Engkai maka arus ’sipereksa’ paguh denga ntah lang kinitekenta, janah uga kita banci ngelakokenca?

⁹ Adi la siikuti kai nina Pustaka kerna pergaulen si la mehuli, pengaturen pemecaten, ntah pe hiburen, ukurta banci jadi piher. Uga adi enda mulai terjadi man bandu? Perlu mis ipereksandu kinitekenndu! Nina Pustaka si Badia, ”Pereksalah man bandu: tuhu-tuhu kin kam erkiniteken? Ujilah man bandu!” (2 Korinti 13:5) Jujurlah man dirindu,  janah alu ratur gunaken Kata Dibata i bas mpekena carandu rukur.

10. Kai si banci nampati kita gelah jadi taneh dah si medate i bas tan Jahwe?

¹⁰ Gelah kita tetap bagi taneh dah si medate, Dibata mereken Pustaka si Badia, runggun, ras pelayanen. Sanga sioge ras siukuri Pustaka si Badia tep-tep wari, enda erban kita medate i bas tan Jahwe janah sipediat ia mbentuk kita. Jahwe merentahken raja-raja Israel guna nulis sada salinen Undang-Undang Dibata janah iogena tep-tep wari. (Ulangen 17:18, 19) Rasul-rasul meteh maka ngoge ras ngukuri kata Dibata seh kal pentingna i bas erberita. Lit ratusen kali igunaken kalak e Kitap-Kitap Heber i bas tulisenna, janah sanga erberita si meriah, iiahkenna gelah kalak si deban mpelajari Pustaka si Badia. (Perbahanen 17:11) Bage ka pe, sieteh maka penting ngoge ras ngukuri kata Dibata tep-tep wari. (1 Timotius 4:15) Enda nampati kita tetap meteruk rukur, janah Jahwe banci mbentuk kita.

11, 12. Uga Jahwe banci nggunaken runggun Kristen i bas mbentuk kita erpalasken keperlunta sekalak-sekalak? Bereken contoh.

¹¹ Jahwe meteh kai keperlunta sekalak-sekalak, janah igunakenna Runggun Kristen i bas mbentuk kita. Jim, si enggo ituriken ndai, mulai ngubah perukurenna sanga sekalak pertua ermediate man bana. Nina Jim, ”La pernah sekali pe aku isalahkenna ntah pe  ipandangina. Ia tetap positif janah tutus kal nampati aku.” Kenca kira-kira telu bulan, pertua e ngundang Jim ku perpulungen. Jim ngatakenca maka runggun ngalo-ngalo ia alu mehuli janah kekelengen kalak e nampati ia ngubah perukurenna. Mulai isedarina maka perasanna labo si pentingna. Pertua i bas runggun bage pe ndehara Jim mere semangat man bana, janah manjar-anjar mulihken ia ngelayani Jahwe. Jim pe tersampati alu ngoge artikel ”Yehuwa Tidak Dapat Dipersalahkan” ras ”Melayani Yehuwa dengan Loyal,” si lit i bas Menara Pengawal 15 November 1992.

¹² Dungna mulihi Jim jadi pertua. Kenca si e, isampatina turang senina si deban guna ngatasi masalah si seri janah ipegegehina kiniteken kalak e. Ikatakenna maka iakapna ia rembak ras Jahwe tapi situhuna lang! Erkadiola ia erkiteken ipediatna kesombongen erban ia ngukuri kesalahen kalak si deban asangken ngukuri kai si pentingna.​—1 Korinti 10:12.

13. Sifat kai si banci sipebelin sanga erberita si meriah, janah kai gunana?

¹³ Erberita si meriah pe banci mbentuk kita janah erban kita reh ulina. Uga carana? Sanga erberita si meriah, arus sicidahken sifat-sifat bagi meteruk rukur ras ulih kesah si badia. (Galatia 5:22, 23) Ukuri sifat-sifat si mehuli si banci ipebelinndu sanga erberita si meriah. Adi siusih Jesus, kalak banci tertarik man beritanta janah dungna banci saja mehuli perbahanenna man banta. Contohna, dua Saksi i Australia erberita si meriah ku rumah sekalak diberu, tapi merawa janah kasar kal tanggapenna. Aminna gia bage, Saksi e tetap mehamat man bana. I bas pudi wari, erkadiola diberu e janah itulisna surat ku kantor cabang. Mindo salah ia erkiteken perbahanenna. Nina, ”Motu kal aku erkiteken kupelawes dua kalak si nuriken Kata Dibata.” Arah pengalamen enda, banci sieteh maka lit ulihna adi mehuli perbahanenta sanga erberita. Jelas me, pelayanenta nampati kalak si deban, tapi nampati kita ka gelah reh ulina sifat-sifatta.

14. Kai si arus ilakoken orang tua gelah berhasil mbentuk anak-anakna?

¹⁴ Biasana anak-anak meteruk rukur janah merhat kal erlajar. (Matius 18:1-4) Emaka, bijaksana adi isampati orang tua anakna mpelajari kebenaren ras ngkelengisa asum anak e kitik denga. (2 Timotius 3:14, 15) Gelah berhasil, orang tua me si arus leben ngkelengi kebenaren janah  ndalankenca. Asilna, reh nukahna iakap anakna engkelengi kebenaren. Janah anak-anak banci ngangkai maka disiplin si ialokenna bukti kekelengen orang tuana ras Jahwe.

15, 16. Uga arusna orang tua ncidahken kinitekenna man Dibata adi anakna ipedarat i bas runggun nari?

¹⁵ Aminna pe orang tua nggo ngajari anakna kebenaren, piga-piga anak nadingken Jahwe ntah pe ipedarat i bas runggun nari. Adi e terjadi, ceda kal ate keluarga. Sekalak turang senina i Afrika Selatan ngatakenca, ”Sanga turangku ipedarat i bas runggun nari, tempa-tempa ia nggo mate. Getem kal pusuhku!” Tapi kai si ilakokenna ras orang tuana? Kalak e ngikutken pedah Pustaka si Badia. (Oge 1 Korinti 5:11, 13.) Ieteh orang tua maka matuhi pedah Dibata banci erguna man kerina. Janah, iakuina maka ipedarat i bas runggun nari e me disiplin si perkeleng i bas Jahwe nari. Emaka, kalak e ngerana man anakna adi lit urusen keluarga si penting saja.

¹⁶ Uga penggejapen anak e? I bas pudi wari ikatakenna, ”Kueteh maka la nembeh ate keluargangku bangku, tapi kalak e patuh man Jahwe ras organisasiNa.” Ikatakenna ka, ”Sanga picet kal ukurta, i je sieteh maka Jahwe ngenca si banci nampati ras ngalemi dungna sisedari maka tuhu-tuhu kal kita merluken Ia.” Bayangken keriahen ukur keluarga e sanga dilaki si nguda enda mulih ku Jahwe! Jelas me, kita banci berhasil ras ermeriah ukur adi lalap sipatuhi Dibata.​—Kuan-kuanen 3:5, 6; 28:26.

17. Kai gunana adi lalap kita patuh man Jahwe?

¹⁷ Inubuatken nabi Jesaya, kalak Jahudi si ertobat si tading i Babil dungna ngataken, ”O [Jahwe]; kami taneh dah, janah desken sekalak pande kudin, itepaNdu kami.” Ipindona ka man Jahwe, ”Dosa-dosa kami ola min lalap inget. Tataplah kami kerina, bangsaNdu kap kami enda.” (Jesaya 64:8, 9) Adi kita meteruk rukur janah lalap sipatuhi Jahwe, kita jadi meherga kal man baNa, bagi Daniel. Jahwe terus mbentuk kita alu Pustaka, kesah si badia, ras organisasiNa, gelah i bas wari si pepagi kita banci jadi ”anak-anak Dibata” si serta.​—Roma 8:21.