Haykanush, sekalak perberita si lenga iperidiken i Armenia, ndatken sada paspor i deher rumahna. I bas paspor e lit piga-piga kartu debit ras melala sen. Ikatakenna man perbulangenna, sekalak perberita si lenga iperidiken ka, kerna kai si idatna.

Ndehara ras perbulangen e mesera kal geluhna janah lit ka utangna. Tapi, iputuskenna naruhken sen e ku alamat si lit i bas paspor. Sengget kal dilaki si kebenen e, janah keluargana pe bage. Ijelasken Haykanush ras perbulangenna engkai maka kalak e jujur, eme erkiteken idalankenna ajaren Pustaka si Badia. Janah, igunakenna ka kesempaten e nuriken kerna Saksi Jahwe ras iberena piga-piga publikasi man keluarga e.

Ibereken keluarga e atena sen man Haykanush selaku pengataken bujurna, tapi la ia nggit ngalokenca. Pepagina, reh ndeharana ku rumah Haykanush, janah guna ncidahken pengataken bujurna, ipaksana Haykanush ngaloken sada cincin berlian.

Bali bagi keluarga e, mamang ate kalak ngidah kejujuren Haykanush ras keluargana. Tapi mamang ka nge ate Jahwe? Uga nge tanggapenNa nandangi kejujuren kalak e? Lit nge ertina kejujuren kalak e?

La mesera njabab penungkunen-penungkunen e. Engkai? Erkiteken juak-juak Dibata meteh maka ngusih sifat-sifat Jahwe ergan asangken berlian, emas, ntah pe barang si meherga si deban. Jelas me, kai si iakap Jahwe meherga la seri ras kai si iakap enterem jelma meherga. (Jesaya 55:8, 9) Janah meherga kal iakap juak-juakNa banci ngusih sifat-sifat Jahwe.

Enda banci sieteh arah kai nina Pustaka si Badia kerna pengertin ras kepentaren. Kuan-kuanen 3:13-15 ngatakenca, ”Sangap kal kalak si ndatken kepentaren, eme kalak si ndatken pengertin. Untungna belinen asangken pirak, janah ergan kap e asangken emas. Ergan kap kepentaren asangken permata; Bicara kerina pe si isurandu ipersada la kap terpeseri ras kepentaren e.” Jelas me, ergan iakap Jahwe sifat-sifat e lebih asangken barang-barang si meherga si debanna.

Adi bage, uga kerna kejujuren?

Jahwe Dibata si jujur. Jahwe ’la banci erbual’. (Titus 1:2) Janah isuruhNa rasul Paulus nulis surat man kalak Kristen Heber i bas abad pemena, ”Tetaplah ertoto kerna kami. Tek kami maka bersih pusuh peraten kami, sabab lalap nge kami ersura-sura ndalanken si mehuli.”​—Heber 13:18.

Jesus Kristus mereken usihen kerna kejujuren. Contohna, sanga Imam si Mbelin Kayapas ngatakenca, ”I bas gelar Dibata si nggeluh kupindo gelah ersumpah kam man kami; Tuhu kin kam Mesias si ipadanken Dibata e?” Jesus jujur janah ikatakenna dirina Mesias. Ikatakenna kebenaren aminna pe ietehna maka Sanhedrin banci nuduh ia sekalak si nggombangi Dibata janah enda banci erban ia ibunuh.​—Matius 26:63-67.

Adi kita uga? Bicara banci sidat keuntungen materi alu la sikataken kai si tuhuna ntah pe siubah sitik kebenarenna, tetap denga nge kita jujur?

Mesera kal jujur i bas wari-wari si pendungi enda erkiteken enterem kal kalak ”nggeluh ngukurken dirina saja, merangap”. (2 Timotius 3:2) Sanga mesera kal ndarami sen ntah pe ndarami dahin, labo dalih iakap kalak nangko, nipu, ntah pe ngelakoken kai si la jujur. Perukuren si bagenda enggo biasa, emaka melala kalak erpengakap cara si mehulina guna ndatken keuntungen materi eme alu la jujur. Janah piga-piga kalak Kristen pe ”merangap” dungna la jujur, emaka lanai mehuli gelarna i bas runggun.​—1 Timotius 3:8; Titus 1:7.

Tapi, enterem kalak Kristen ngusih Jesus. Ieteh kalak e maka ngusih sifat-sifat Dibata ergan asangken kerina kebayaken ntah pe keuntungen. E me sabapna maka kalak Kristen si sekolah denga la nggit nipu guna ndatken nilai si mejile. (Kuan-kuanen 20:23) Kejujuren e labo lalap iergai bagi pengalamen Haykanush. Tapi, e me si mehulina i  lebe-lebe Dibata. Janah banci erban bersih pusuh peratenta, enda seh kal mehergana.

Pengalamen Gagik mbuktikenca. Nina, ”Ope denga jadi kalak Kristen, erdahin aku i bas sada perusahan si mbelin. Si mada perusahan e la atena nggalari kerina pajakna, emaka la ikatakenna uga situhuna keuntungen perusahanna. Selaku direktur, aku arus erban perjanjin ras pegawe pajak alu nogok ia. Dungna itandai aku selaku kalak si la jujur. Kenca kupelajari Pustaka, lanai aku nggit erdahin i je aminna gia melala kal gajiku. Kubuka bisnisku sisada. Janah, mis kudaftarken perusahanku ras kubayar kerina pajakku.”​—2 Korinti 8:21.

Nina Gagik, ”Nggo kurang setengah penghasilenku, emaka mesera kuakap ncukupi kebutuhen keluargangku. Aminna pe bage, riahen kuakap ukurku gundari. Pusuh peratenku bersih. Aku jadi usihen si mehuli man dua anakku, janah banci ka kudat hak istimewa i bas runggun. Gundari teman-teman bisnisku ras pegawe pajak nandai aku kalak si jujur.”

Jahwe ngkelengi kalak si muji Ia alu ngusih sifat-sifatNa, termasuk kejujuren. (Titus 2:10) Janah adi silakoken enda, erjanji Ia nampati kita. Nina Raja Daud, ”Mulai kin kitik-kitikku nari seh bagenda enggo metua, la enggo kuidah kalak bujur itadingken [Jahwe], tah kempuna jadi pemindo-mindo.”​—Masmur 37:25.

Pengalamen Rut si setia mbuktikenca. Setia ia man si metuana, Naomi, la ia nggit nadingkenca erkiteken enggo metua. Rut pindah ku Israel, ije banci i sembahna Dibata situhu-tuhu. (Rut 1:16, 17) Ia jujur janah tutus kal atena erdahin mumahi gandum, ngikuti pengaturen undang-undang man kalak si musil. Janah bali bagi si inanami Daud pagi, Jahwe la pernah nadingken Rut ras Naomi. (Rut 2:2-18) Labo ngenca keperlun materi si iberekenNa man Rut. Tapi lebihen asangken si e, ipilihNa ia jadi bagin i bas garis kesusuren Raja Daud ras Mesias si ijanjiken!​—Rut 4:13-17; Matius 1:5, 16.

Piga-piga juak-juak Jahwe mesera kal iakapna ndarami sen guna ncukupi keperlunna tep-tep wari. Tapi, asangken ndarami cara si menukah muat sen eme alu la jujur, padin iakapna mejingkat ras tutus erdahin. Alu ngelakoken si enda, kalak e ngusih sifat-sifat Dibata, termasuk kejujuren, si ergan asangken kerina barang-barang si meherga.​—Kuan-kuanen 12:24; Epesus 4:28.

Bali bagi Rut, kalak Kristen i doni enda tek maka Jahwe banci nampati ia. Kalak e tuhu-tuhu tek man Pribadi si erjanji, ”Asa ndigan pe la kam Kutadingken, asa ndigan pe la kam Kupulahi.” (Heber 13:5) Lalap icidahken Jahwe maka Ia banci janah nggit nampati kalak si tetap jujur. Lalap itepatiNa janjiNa guna nikapken keperlun juak-juakNa tep-tep wari.​—Matius 6:33.

Berlian ras erta seh kal pentingna iakap manusia. Tapi kita banci tek maka Bapanta si i surga ngergai kejujurenta ras sifat-sifat si mehuli si debanna, lebihen asangken permata si meherga!