1, 2. Kai si inubuatken Pustaka si Badia kerna pertambahen umat Jahwe?

I DONI enda, lit sada organisasi si anggotana ngkelengi Jahwe janah nggit ngelayani Ia. Kalak enda eme Saksi-Saksi Jahwe. Aminna pe lit kekurangen ras kelemahen kalak e, Jahwe negu-negu umatNa alu kesah si badia. Mari sinen alu cara kai saja Ia masu-masu kalak e. 

² I bas tahun 1914, sitik kal si nembah Jahwe. Tapi Jahwe masu-masu pendahin erberita. Asilna, jutan kalak erlajar kebenaren Pustaka janah jadi Saksi Jahwe. Ituriken Jahwe pertambahen si luar biasa enda sanga ikatakenna, ”Subuk keluarga si kitik ras si musilna, jadi pagi bagi bangsa si mbelin dingen erkuasa. Aku, [Jahwe], mahanca pedas jadina si enda, adi enggo payo paksana.” (Jesaya 60:22) Gundari jelas siidah nubuat enda terjadi. Umat Jahwe bali bagi sada bangsa si mbelin. Melala bangsa i doni enda si jumlah pendudukna sitiken asa jumlah umat Jahwe.

3. Uga juak-juak Jahwe ncidahken kekelengen?

 ³ I bas wari-wari pendungi enda, Jahwe nampati umatNa gelah reh bagesna kekelengen kalak e nandangi sada ras si debanna. ”Dibata kekelengen kap”, janah kalak e ngusih Ia. (1 Johanes 4:8) Iperentahken Jesus ajar-ajarna gelah ’sikeleng-kelengen.’ Nina ka, ”Adi sikeleng-kelengen kam, kerina kalak meteh maka kam ajar-ajarku.” (Johanes 13:34, 35) Aminna pe bangsa-bangsa erperang, umat Jahwe tetap sikeleng-kelengen. Contohna, i bas perang doni si peduaken, lit kira-kira 55 juta kalak ibunuh. Tapi, umat Jahwe la munuh ise pe i bas perang e. (Oge Miha 4:1, 3.) Enda erban kalak e ’la ersalah’ i bas kematen enterem jelma.​—Perbahanen 20:26.

4. Engkai maka banci ikataken pertambahen umat Jahwe e luar biasa?

⁴ Umat Dibata terus reh teremna aminna pe lit musuh si megegeh, Setan. Ia ”dibata palsu jaman enda.” (2 Korinti 4:4) Setan ngkuasai organisasi politik doni enda ras media berita, janah igunakenna enda i bas mpengadi pendahin erberita. Tapi la banci ipengadina pendahin enda. Erkiteken ieteh Setan maka kentisik nari ngenca lit waktuna, emaka iusahakenna kal gelah lanai kita nembah Jahwe.​—Ketangkasen 12:12.

5. Engkai maka kalak si deban banci saja erban kitik ukurta? (Nehen gambar pemena artikel.)

⁵ Juak-juak Dibata meteh maka penting kal ngkelengi Dibata ras kalak si deban. Nina Jesus, ”Kelengilah [Jahwe] Dibatandu asa ukurndu, asa tendindu, dingen asa gegehndu lit. Enda me perentah si mbelinna dingen si pentingna. Si peduaken bali ras si ndai eme, ’Kelengilah temanndu manusia bagi kam ngkelengi dirindu.’” (Matius 22:35-39) Tapi, Pustaka si Badia ngatakenca maka kerina kalak la serta erkiteken dosa Adam. (Oge Roma 5:12, 19.) Emaka banci saja i bas runggun lit si ngataken ntah pe ngelakoken kai si erban kitik ukurta. Adi enda terjadi, kai nge silakoken? Tetap denga nge kita ngkelengi Jahwe? Tetap denga nge kita setia man baNa ras man umatNa? Pustaka si Badia nuriken kerna piga-piga juak-juak Dibata si ngataken ntah pe ngelakoken kai si erban kitik ukur kalak si deban. Mari kita erlajar arah pengalamen kalak e?

6. Uga Eli gagal i bas mere disiplin anak-anakna?

⁶ Contohna, Eli sekalak imam besar i Israel, tapi dua anakna la patuh man undang-undang Jahwe. Nina Pustaka si Badia, ”Anak-anak Eli tuhu-tuhu si kemali. Sitik pe la diatena [Jahwe].” (1 Samuel 2:12) Ieteh Eli maka jahat kal perbahanen anak-anakna e. Tapi ipediatna saja, la idisiplinna kalak e. Emaka iukum Jahwe Eli ras dua anakna. Janah dungna, kesusuren Eli lanai ipediat jadi imam si mbelin. (1 Samuel 3:10-14) Adi kam nggeluh i bas jaman Eli janah ietehndu maka ipediatna anakna ngelakoken kai si la mehuli, megelut nge kam? Jadi lemah  nge kinitekenndu man Jahwe, janah dungna lanai kam ngelayani Ia?

7. Dosa serius kai si ilakoken Daud, janah kai si ilakoken Jahwe?

⁷ Mehuli kal sifat-sifat Daud, emaka keleng kal ate Jahwe ia. (1 Samuel 13:13, 14; Perbahanen 13:22) Aminna pe bage, Daud pernah erban dosa si serius. Sanga Uria lawes erperang, Daud medem ras ndehara Uria, Batseba. Janah dungna mehuli kulana. La ate Daud ise pe meteh perbahanenna e. Emaka, isuruhna Uria gelah mulih ku rumahna. Tujun Daud, gelah Uria medem ras Batseba, alu bage iakap kalak Uria me bapa anak e. Tapi Uria la nggit mulih. Emaka iaturken Daud gelah Uria mate i bas peperangen. Erkiteken dosana si serius enda, melala kal perbeben si iadapi Daud ras keluargana. (2 Samuel 12:9-12) Tapi dungna mekuah ate Jahwe janah ialemina ia. Ietehna maka Daud ersura-sura ngelakoken kai si mehuli. (1 Raja-Raja 9:4) Adi kam nggeluh paksa si e, uga nge perasanndu nandangi Daud? Lanai nge kam ngelayani Jahwe?

8. (a) Uga rasul Petrus gagal nepati kata-katana? (b) Aminna pe Petrus erban kesalahen, engkai maka ia terus igunaken Jahwe?

⁸ Contoh si deban i bas Pustaka si Badia eme rasul Petrus. Jesus milih Ia jadi rasulna. Aminna pe bage, i bas sada paksa, Petrus ngataken ntah pe ngelakoken kai si la mehuli. Contohna, ikataken Petrus  maka la pernah itadingkenna Jesus aminna gia kerina kalak nadingken ia. (Markus 14:27-31, 50) Tapi kenca Jesus itangkap, kerina rasul, termasuk Petrus, nadingken ia. Kenca si e, lit telu kali ikataken Petrus maka la itandaina Jesus. (Markus 14:53, 54, 66-72) Tapi, erkadiola kal Petrus erkiteken perbahanenna e. Emaka ialemi Jahwe ia janah terus igunakenNa ia. Adi kam sekalak ajar-ajar Jesus paksa si e janah ietehndu kai si lakoken Petrus, terus denga nge kam erkiniteken man Jahwe?

9. Engkai kam tek maka Dibata lalap adil?

⁹ Arah contoh enda, sieteh maka piga-piga juak-juak Jahwe ngelakoken kai si la mehuli janah ibanna kitik kal ukur kalak si deban. Adi enda terjadi gundari, kai nge si ilakokenndu? Lanai nge kam reh ku perpulungen? Ntah pe nadingken Jahwe ras umatNa? Ntah isedarindu nge maka Jahwe e perkuah janah itimaiNa kalak robah? Tapi banci saja lit kalak si ngelakoken dosa si serius janah la ia erkadiola. Tek nge kam maka Jahwe banci meteh kerna si enda, janah pasti ibanNa tindaken i bas waktu si tepat? Adi perlu, banci saja ipedaratNa kalak e i bas runggun nari. Tek nge kam maka Jahwe lalap adil ras ngelakoken kai si benar?

10. Aminna pe kitik kal ukur Jesus erkiteken Judas Iskariot ras Petrus, uga perbahanen Jesus?

¹⁰ I bas Pustaka si Badia, sioge kerna enterem kalak si tetap setia man Jahwe ras man umatNa aminna pe kalak isekelewetna ngelakoken dosa serius. Jesus usihen si mehulina. Kenca ia ertoto man Bapana mindo penampat, ipilihna 12 rasul-rasulna. Tapi salah sada i bas kalak e, Judas Iskariot, dungna enghianati ia. Janah Petrus pe ngataken maka la itandaina Jesus. (Lukas 6:12-16; 22:2-6, 31, 32) Jesus la nalahken Jahwe ntah pe ajar-ajarna sanga kitik iban kalak e ukurna. Sebalikna, Jesus tetap rembak ras Bapana janah terus ngelayani ia alu setia. Asilna, ipekeke Jahwe ia janah dungna jadi Raja i bas Kinirajan Surga.​—Matius 28:7, 18-20.

11. Kai si inubuatken Pustaka si Badia kerna juak-juak Jahwe i bas jaman si gundari?

¹¹ Usihen Jesus ngajari kita gelah tetap setia man Jahwe bage pe man umatNa. Janah lit alasen si mehuli guna ngelakokenca. Banci siidah maka Jahwe negu-negu umatNa i bas jaman gundari. IsampatiNa kalak e erberita si meriah i belang-belang doni, janah kalak enda ngenca si ngelakoken pendahin e. Kalak enda pe tuhu-tuhu ersada janah ermeriah ukur erkiteken kerina si enggo iajarken Jahwe man kalak e. Ituriken Jahwe kerna si  enda sanga ikatakenNa, ”Ia rende alu meriah.”​—Jesaya 65:14.

12. Uga arusna perukurenta nandangi kesalahen kalak si deban?

¹² Meriah kal ukurta erkiteken Jahwe negu-negu kita ras nampati kita ngelakoken kai si mehuli. Tapi, enterem jelma i doni Setan enda la ermeriah ukur janah la lit arapenna kerna wari si pepagi. Tuhu-tuhu la bijaksana janah la patut adi sitadingken Jahwe ras umatNa erkiteken lit sekalak i bas runggun ngelakoken ntah pe ngataken kai si la mehuli! Sebalikna, kita arus tetap setia man Jahwe janah ngikuti pedahNa. Kita pe perlu mpelajari uga arusna perukuren ras perbahanenta nandangi kesalahen kalak si deban.

13, 14. (a) Engkai arus kita sabar nandangi kalak si deban? (b) Janji kai si ateta siinget?

¹³ Kai si arus ilakokenndu adi lit sekalak turang senina erban kitik ukurndu? Pustaka mereken pedah enda, ”Ola pedas-pedassa das darehndu, sabab nembeh ate ringan kap i bas pusuh kalak lenge.” (Pengerana 7:9) Kerina kita la serta janah erban kesalahen. Emaka ula siarapken turang seninanta lalap ngataken ntah pe ngelakoken kai si mehuli. Janah la mehuli adi lalap siukuri kesalahenna. Adi enda silakoken, lanai kita ermeriah ukur ngelayani Jahwe. Janah dungna banci saja kinitekenta jadi lemah ras sitadingken organisasi Jahwe. Akibatna, lanai silayani Jahwe ras lanai lit arapenta nggeluh i doni si mbaru.

¹⁴ Emaka, kai si banci nampati kam gelah tetap ermeriah ukur i bas ngelayani Jahwe sanga lit kalak erban kitik ukurndu? Lalap inget janji si mpebelin pusuh, ”Kutepa doni si mbaru ras langit si mbaru. Kejadin-kejadin si enggo lepas ilupaken kerina.” (Jesaya 65:17; 2 Petrus 3:13) Ibereken Jahwe pasu-pasu enda man bandu adi tetap kam setia man baNa.

15. Menurut Jesus, kai si arus silakoken sanga kalak si deban erban kesalahen?

¹⁵ Tentu, kita lenga i bas doni si mbaru. Emaka, adi lit kalak erban kitik ukurta, perlu siukuri kai si iarapken Jahwe i bas kita nari. Contohna, nina Jesus, ”Adi ialemindu salah kalak, salahndu pe ialemi Bapandu ka nge. Tapi adi la ialemindu salah kalak, salahndu pe la ialemi Bapandu.” Janah sanga Petrus nungkun man Jesus cukup nge ”pitu kali” kami ngalemi? Ijabap Jesus, ’Lang, labo cukup pitu kali, tapi pitu puluh pitu kali.’ Jesus ngajari kita gelah lalap nggit ngalemi kalak si deban.​—Matius 6:14, 15; 18:21, 22.

16. Usihen si mehuli kai si ibereken Jusup?

 ¹⁶ Kita pe banci erlajar arah Jusup. Dua ngenca anak Jakup ras Rahel eme Jusup ras agina. Lit ka sepuluh nari anak Jakup si dilaki, tapi Jusup atena si kelengna. Enda erbanca cian kal ate senina-seninana. Emaka idayakenna ia jadi budak ras ibaba ku Mesir. Kenca piga-piga tahun, raja Mesir njadiken Jusup penguasa peduaken i bas negara e erkiteken ngena kal atena pendahin Jusup. I bas pudi wari, senina-senina Jusup reh ku Mesir nukur pangan erkiteken lit kelihen. Sanga idah kalak e Jusup, lanai itandaina ia. Tapi, Jusup itandaina kalak e. Aminna pe la mehuli perbahanen seninana e man bana, la iukumna kalak e. Tapi iujina guna meteh nggo nge ia tuhu-tuhu robah ntah lang. Sanga ieteh Jusup maka kalak e nggo robah ikatakenna maka ia seninana, janah ipetetapna ukur kalak e. Nina, ”Ola pada sitik pe kam mbiar. Aku pekena-kena kam ras anak-anakndu.”​—Kejadin 50:21.

17. Kai si atendu ilakokenndu adi kalak si deban erban kesalahen?

¹⁷ Ingetlah maka kerina kalak erban kesalahen, kam pe banci saja erban kitik ukur kalak si deban. Emaka adi kitik ibanndu ukur kalak si deban, ikuti pedah Pustaka si Badia. Ngaku salah kam man bana, janah usahaken erdame ras ia. (Oge Matius 5:23, 24.) Meriah ukurta adi ialemi kalak salahta. Emaka kita pe arus bage. Kolose 3:13 ngatakenca, ”Ola kam pergelut dingen si alem-alemen salah adi kitik ukurndu ibahan kalak. Kam arus si alem-alemen salah bagi [Jahwe] enggo ngalemi salahndu.” Adi tuhu-tuhu keleng ateta turang seninanta, ula terus kitik ukurta erkiteken perbahanenna. (1 Korinti 13:5) Janah adi sialemi kalak si deban, Jahwe pe ngalemi kita. Emaka adi kalak si deban erban kesalahen, mekuah min ateta ia bali bagi Bapanta, Jahwe, nggo mekuah ateNa kita.​—Oge Masmur 103:12-14.