1, 2. Penungkunen kai si turah erkiteken kata-kata Jesus i bas Matius 24:14?

INUBUATKEN Jesus maka i bas wari-wari pendungi, berita si meriah kerna Kinirajan iberitaken ku kerina bangsa. (Matius 24:14) Selaku Saksi-Saksi Jahwe, kita itandai i sebelang doni erkiteken dahin erberita si meriah. Lit si senang nandangi berita e, si debanna lang. Tapi kalak si la senang nandangi berita enda pe ngergai kita. Kita ngenca si ngelakoken dahin si inubuatken Jesus. Banci nge sikataken bage?

² Melala agama si ngataken maka ia pe mberitaken berita si meriah. Tapi kalak enda erberita terjeng mereken khotbah bas gereja, TV, Internet, ntah pe sekedar nuriken uga ia nandai Jesus. Si debanna erpengakap maka cara ia erberita eme alu nampati kalak si deban, misalna jadi dokter, perawat, ntah pe guru. Tapi payo kin enda dahin erberita bagi si ituriken Jesus?

3. Bagi si ikataken Matius 28:19, 20, empat hal kai si arus ilakoken pengikut Jesus?

 ³ Payo kin ate Jesus gelah ajar-ajarna nimai kalak si deban si reh ndahi kalak e? Lang! Kenca kinikekenna, ikataken Jesus man ratusen pengikutna, ”Laweslah ku kerina bangsa manusia, bahanlah ia jadi ajar-ajarku: Peridiken ia . . . , janah ajari ia ngikutken kerina si enggo kupedahken man bandu.” (Matius 28:19, 20) Emaka selaku pengikut Jesus, perlu silakoken empat hal. Erbahan ajar-ajar, mperidiken, janah ngajari ia. Tapi si pemena si arus silakoken eme lawes njumpai kalak. Sekalak pakar Pustaka si Badia ngataken, ”Tiap kalak si erkiniteken arus ’lawes’, ntah ku lepar dalan ntah pe ku lepar lawit.”​—Matius 10:7; Lukas 10:3.

4. Kai si iperluken guna jadi penjala manusia?

⁴ Kai si niarapken Jesus i bas ajar-ajarna nari? Iperentahkenna nge ajar-ajarna erberita sekalak-sekalak? Entah iperluken nge sada pengaturen? Sekalak jelma la mungkin erberita ku ”kerina bangsa”. Iperluken nterem kalak guna ngelakoken dahin e. Enda me si imaksudken Jesus paksa iundangna ajar-ajarna guna jadi penjala manusia. (Oge Matius 4:18-22.) Penjala nurung labo sisada erdahin. Labo igunakenna kawil ras umpan. Janah labo itimaina nurung si reh. Bage ka pe, gelah jadi penjala manusia iperluken kerja sama, kerja keras, bage pe pengaturen si mehuli.​—Lukas 5:1-11.

5. Empat penungkunen kai si perlu ijabap, janah ngkai?

⁵ Guna meteh ise si mberitaken berita si meriah gundari, perlu sijabap empat penungkunen enda:

• Berita kai si iberitaken kalak e?

• Kai alasen kalak e erberita?

• Cara kai si igunaken kalak e?

• Uga belangna ras dekahna dahin e ilakoken?

Jabapen penungkunen enda banci nampati kita nandai ise si ngelakoken dahin e janah mpepaguh tekadta guna terus erberita.​—1 Timotius 4:16.

6. Engkai kam tek maka berita si iberitaken Saksi Jahwe sentudu ras perentah Jesus?

⁶ Oge Lukas 4:43. Jesus mberitaken ”berita si meriah kerna Kinirajan Dibata”, janah atena gelah ajar-ajarna pe ngelakoken si e. Ise si mberitaken berita e ku kerina jelma? Saksi-Saksi Jahwe ngenca! Kalak si la senang nandangi kita pe ngakui si e. Contohna, lit sekalak pendeta si nggo ertugas i melala negeri. I bas tiap negeri, isungkunna Saksi Jahwe kerna berita si ipeseh kalak e. Nina, ”Motu kal kerina kalak enda, seri kerina jabapenna, ’Berita si meriah kerna Kinirajan Dibata’.” Kata-kata pendeta e situhuna mbuktiken maka kita labo motu tapi ersada, janah bage kin arusna kalak Kristen situhu-tuhu. (1 Korinti 1:10) Kinirajan Dibata pe ijadiken tema utama Sora Ermomo Mberitaken Kinirajan Dibata Jahwe. Majalah e lit i bas 254 cakap, janah menam 59 juta icetak tiap bulan. Majalah enda me si mbuena kal tersiar i doni!

7. Janari banci sieteh maka berita si ipeseh pendeta-pendeta la sentudu ras perentah Jesus?

⁷ Pendeta-pendeta labo mberitaken Kinirajan Dibata. Adi kalak enda erkhotbah  kerna Kinirajan Dibata, ikatakenna maka enda perasan i bas pusuh kalak. (Lukas 17:21) La iajarkenna maka Kinirajan e sada pemerentahen si tuhu-tuhu lit i surga si Rajana eme kap Jesus. Kalak enda nuriken kerna Jesus paksa Natal ntah pe Paskah ngenca. La ijelaskenna maka Kinirajan e pagi si ndungi kejahaten ras kerina perbeben manusia. (Ketangkasen 19:11-21) Jelas me, la ieteh peminpin gereja kai si nandangi ilakoken Jesus selaku Raja i bas Kinirajan Dibata. Erkiteken la ietehna kai berita si iberitaken Jesus, emaka la ietehna alasen ngkai maka kalak e arus erberita.

8. Kai alasen si salah i bas erberita si meriah?

⁸ Pengikut Jesus erberita labo guna sen ntah pe guna majekken bangunen-bangunen si mejile. Nina Jesus, ”Kerina e ialokenndu la ertukur. E maka berekenlah man kalak si deban alu la ngaloken upah.” (Matius 10:8) Emaka, dahin erberita si meriah la banci ijadiken bisnis. (2 Korinti 2:17) Kalak enda la mindo penggalaren. (Oge Perbahanen 20:33-35.) Amin gia perentah Jesus enda jelas, tapi melala gereja si erbahan iuren ntah pe kolekte guna ngurus gerejana, mereken gaji pendeta ras pegawai gereja. Dungna, melala pendeta jadi kalak bayak.​—Ketangkasen 17:4, 5.

9. Kai buktina Saksi Jahwe erberita alu alasen si benar?

⁹ Lit nge kolekte i bas perpulungen ntah pe kebaktin Saksi Jahwe? Lang! Pendahin kalak e idukung sumbangen sukarela. (2 Korinti 9:7) Amin gia bage, i bas tahun si lewat menam dua miliar jam igunaken kalak e guna erberita si meriah janah lebih siwah juta pelajaren Pustaka si Badia si ibahan tiap bulan. Kalak enda la igaji tapi meriah ukurna nggunaken senna sendiri i bas erberita. Nina sekalak peneliti kerna pendahin Saksi Jahwe, ”Tujun utama kalak e eme erberita ras ngajar.” Ikatakenna ka maka la lit pendeta Saksi Jahwe si igaji. Emaka, adi alasenta labo guna sen, kai alasenta erberita? Erkiteken keleng ateta Jahwe ras kalak si deban. Enda sentudu ras nubuat i bas Masmur 110:3. (Oge.)

10. Uga Jesus ras ajar-ajarna erberita?

¹⁰ Jesus ras ajar-ajarna erberita i japa pe lit jelma, misalna bas dalan, bas tiga, ntah pe i rumah. (Matius 10:11; Lukas 8:1; Perbahanen 5:42; 20:20) Erberita rumah ku rumah eme cara si mehulina erkiteken banci njumpai melala jelma.

11, 12. Kai bedana gereja-gereja ras umat Jahwe i bas mberitaken berita si meriah?

¹¹ Payo kin gereja-gereja mberitaken berita si meriah bali bagi Jesus? Biasana gereja mereken gaji man pendeta guna erkhotbah. Kalak enda labo erbahan ajar-ajar si mbaru tapi erusaha njaga anggotana si nggo lit. Maun-maun, isuruhna anggotana erberita. Contohna, bas tahun 2001, ikataken Paus Johanes Paulus II maka kerina anggota gereja arus erberita, labo kalak si nggo terlatih saja. Ikatakenna ka maka kalak e arus ergiah-giah bali bagi rasul Paulus, si ngataken, ”Cilaka kal aku adi la kin kuberitaken Berita si Meriah e.” Tapi, sitik ngenca si ndalankenca.

¹² Adi Saksi Jahwe uga? Kalak enda ngenca si mberitaken maka Jesus nggo jadi Raja mulai tahun 1914. Kalak e patuh man Jesus janah ngutamaken dahin erberita si meriah i bas geluhna. (Markus 13:10) Buku Pillars of Faith—American Congregations and Their Partners (Pilar Iman—Jemaat Amerika dan Mitra Mereka) pe ngataken bage kerna Saksi Jahwe. Ikatakenna ka maka paksa jumpa ras kalak si kelihen, kelungunen, ras sakit, iusahakenna nampatisa. Tapi la ia pernah lupa maka tujun utamana eme meritaken kedungen doni enda ras uga carana gelah selamat. Saksi Jahwe terus meritaken berita e janah ngusih cara Jesus ras ajar-ajarna erberita.

13. Uga belangna dahin erberita e arus ilakoken?

¹³ Ikataken Jesus maka ajar-ajarna mberitaken janah ngajarken berita si meriah ”man manusia i belang-belang doni enda”. (Matius 24:14) Kalak e iperentahken guna erbahan ”kerina bangsa” jadi ajar-ajar. (Matius 28:19, 20) Enda ertina berita si meriah arus iberitaken ku sebelang doni.

14, 15. Kai buktina Saksi Jahwe nggenepi nubuat Jesus kerna belangna dahin erberita si meriah? (Nehen gambar pemena artikel.)

¹⁴ Saksi Jahwe ngenca si ngelakoken kai si inubuatken Jesus, eme mberitaken berita si meriah ku sebelang doni. Kai buktina? Bas Amerika Serikat, lit kira-kira 600.000 pendeta, tapi lit kira-kira 1.200.000 Saksi-Saksi Jahwe si erberita i bas negeri e. I sebelang doni, lit kira-kira 400.000 pastor, tapi lit lebih 8 juta Saksi Jahwe si erberita bas 240 negeri. Jelas me, Saksi Jahwe mberitaken berita si meriah ku sebelang doni, janah enda ngerehken kemulian ras kepujin man Jahwe!​—Masmur 34:2; 51:17.

¹⁵ Selaku Saksi Jahwe, tujunta eme mberitaken berita si meriah asa bancina ku kerina kalak sope lenga reh kedungen e. Guna ngelakokenca, nggo siterjemahken ras sibagiken jutan buku, majalah, risalah, bage pe undangen kebaktin ras Peringeten lebih i bas 700 cakap. Sibereken enda man kalak alu la nggalar. Bas tahun si lewat saja, sibagiken kira-kira  4,5 miliar oge-ogen Pustaka si Badia. Nggo ka sibagiken lebih 200 juta Pustaka si Badia Terjemahan Dunia Baru lebih i bas 130 cakap. Keterangen i bas Situs Webta nggo lit lebih i bas 750 cakap. Saksi Jahwe ngenca si ngelakoken dahin si luar biasa enda.

16. Kai buktina kesah Dibata lit i bas Saksi Jahwe?

¹⁶ Uga dekahna dahin enda ilakoken? Ikataken Jesus maka berita si meriah terus iberitaken ngasa reh kedungen e. Selaku Saksi Jahwe, ngasup kita erberita i bas wari-wari pendungi erkiteken penampat kesah si badia Jahwe. (Perbahanen 1:8; 1 Petrus 4:14) Piga-piga kalak si tutus eragama banci saja ikatakenna, ”Kesah si badia lit i bas kami.” Tapi, ngasup nge kalak e ngelakoken pendahin si ilakoken Saksi Jahwe i bas wari-wari pendungi enda? Icubaken piga-piga agama erberita bagi kita, tapi kalak e gagal. Si debanna nggit erberita, tapi kentisik saja ngenca. Si debanna ka erberita ku rumah-rumah, tapi labo mberitaken berita si meriah kerna Kinirajan Dibata. Emaka, kalak e la banci ngelakoken dahin si nggo ibenaken Jesus.

17, 18. (a) Engkai maka banci kita tek maka Saksi Jahwe ngenca si mberitaken berita si meriah kerna Kinirajan Dibata? (b) Engkai maka kita banci terus erberita?

¹⁷ Adi bage, ise si mberitaken berita si meriah kerna Kinirajan Dibata gundari? Saksi Jahwe ngenca! Kai buktina? Erkiteken kita mberitaken berita si benar bagi si imaksudken Jesus, eme berita si meriah kerna Kinirajan Dibata. Kita nggunaken cara si benar i bas erberita eme ndarami kalak i bas pelayanenta. Kita erberita alu alasen si benar, erkiteken ngkelengi Jahwe ras kalak si deban. Pendahinta enda nggo seh kal belangna, erkiteken kita erberita man kalak i bas kerina bangsa ras cakap. Janah, kita terus mberitaken berita si meriah kerna Kinirajan ngasa reh kedungen e!

¹⁸ Luar biasa kal upaya Saksi Jahwe guna erberita si meriah i bas wari-wari pendungi enda. Tapi, ngkai maka kita ngasup ngelakoken dahin e? Nina rasul Paulus, ”Dibata pe tetap erdahin i bas kam gelah kam nggit dingen ngasup ndalanken si ngena ateNa.” (Pilipi 2:13) Mbera terus ibereken Jahwe gegeh man banta gelah banci erberita si meriah asa ngasupta!​—2 Timotius 4:5.