1, 2. (a) Uga perasan Saksi Jahwe nandangi Pustaka si Badia? (b) Bagin si apai si jadi kesukanndu i bas Pustaka si Badia?

SELAKU Saksi Jahwe, meriah siakap ngoge Pustaka si Badia. Buku enda mereken pengapul, arapen, ras petunjuk si banci iteki. (Roma 15:4) Enda labo buku si risiken perukuren manusia tapi ”Kata si rehna i bas Dibata nari”.​—1 Tesalonika 2:13.

² Banci saja, lit kitap-kitap i bas Pustaka si Badia si jadi kesukanta. Lit si meriah akapna kitap Injil erkiteken banci ipelajarina sifat Jahwe si luar biasa erkelangken Jesus. (Johanes 14:9) Si debanna meriah akapna kitap nubuat misalna Ketangkasen, si ncidahken ”kai si nandangi pedas jadi”. (Ketangkasen 1:1) Si debanna terapul paksa ngoge kitap Masmur. Lit ka si meriah akapna ngoge kitap Kuan-kuanen si risiken melala pedah si erguna. Jelas me, Pustaka si Badia buku man kerina kalak.

3, 4. (a) Uga perasanta nandangi publikasinta? (b) Man ise saja publikasinta ibahan?

³ Erkiteken meriah siakap ngoge Pustaka si Badia, meriah ka siakap ngoge publikasinta erkiteken isina erpalasken Pustaka si Badia. Buku, majalah, bage pe publikasi si deban eme  pemere i bas Jahwe nari. Si enda kerina nampati kita tetap rembak ras Ia janah njaga kinitekenta tetap paguh.​—Titus 2:2.

⁴ Lalan publikasinta ibahan guna Saksi Jahwe. Lit si ibahan khususna man anak muda ntah orang tua. Janah, lalan artikel ras video i bas situs Webta khususna ibahan man kalak si labo Saksi Jahwe. Kerina publikasi enda mbuktiken maka Jahwe nepati janjiNa guna ngajar kerina jelma.​—Jesaya 25:6.

5. Kai si iergai Jahwe i bas kita nari?

⁵ Ateta kerina gelah reh buena waktunta ngoge Pustaka si Badia ras publikasinta. Memang, la seri dekahna waktu si kita gunaken i bas mpelajari tiap publikasi. Tapi, tek kita Jahwe pasti ngergai upayanta adi sigunaken waktunta alu mehuli guna ngoge ras mpelajari Pustaka si Badia bage pe publikasinta. (Epesus 5:15, 16) Tapi, arus kita metenget nandangi sada bahaya. Kai e?

6. Kai si banci erbahan kita la ndatken manfaat i bas pangan rohani nari?

⁶ Adi la kita metenget, banci kita erpengakap maka lit bagin i bas Pustaka si Badia ntah pe publikasinta si labo berlaku man banta. Contohna, kita erpengakap maka lit ayat si la cocok i bas keadanta. Ntah, siakap publikasi e labo itujuken man banta. Terburu-buru nge sioge keterangen e ntah labo sitik pe sioge? Adi bage, la banci sidatken manfaat i bas keterangen e. Uga carana gelah ula silakoken e? Arus siinget maka kerina keterangen e rehna i bas Jahwe nari. Nina Pustaka si Badia, ”Aku kap [JAHWE] Dibatandu; Aku ngajari kam guna kiniulinndu.” (Jesaya 48:17) Mari sibahas telu cara si banci nampati kita ndatken manfaat arah kerina pangan rohani si ibereken Jahwe.

7. Engkai maka perlu sioge Pustaka si Badia alu perukuren si terbuka?

⁷ Ogelah alu perukuren si terbuka. Memang, piga-piga bagin i bas Pustaka si Badia itulis guna kalak ntah pe kelompok tertentu. Tapi, ”kerina si tersurat i bas Pustaka si Badia rehna i bas Dibata nari janah erguna”. (2 Timotius 3:16) Enda me sabapna ngkai maka perlu sibuka perukurenta paksa sioge Pustaka si Badia. Nina sekalak turang seninanta, ”Paksa kuoge Pustaka si Badia, tek aku maka lit melala pelajaren i bas sada kisah.” Emaka, rusur idaramina pelajaren si deban i bas ayat e. Emaka sope ngoge Pustaka si Badia, perlu kita ertoto gelah ibuka Jahwe perukurenta janah iberekenNa kepentaren man banta. Tujunna gelah banci siangkai pelajaren i bas ayat si nggo sioge.​—Esra 7:10; oge Jakup 1:5.

8, 9. (a) Paksa ngoge Pustaka si Badia, penungkunen kai saja si banci siukuri? (b) Kai si banci sipelajari kerna Jahwe i bas persaraten man pertua?

⁸ Gunaken penungkunen. Paksa ngoge Pustaka si Badia, ngadilah kentisik janah ukuri enda: ’Kai si banci kupelajari kerna Jahwe i bas ayat enda? Kai gunana ayat enda man bangku? Uga banci kugunaken enda i bas nampati kalak si deban?’ Alu ngukuri penungkunen enda, pengogen Pustaka si Badianta banci lebih erguna. Mari siperdiateken sada contoh. I bas Pustaka si Badia, lit persaraten man pertua. (Oge 1 Timotius 3:2-7, NW.) Tapi, nterem kita labo pertua. Banci saja kita erpengakap keterangen enda la erguna banta. Tapi, mari sigunaken telu penungkunen ndai guna ngenehen  uga persaraten enda erguna man banta kerina.

⁹ ”Kai si banci kupelajari kerna Jahwe i bas ayat enda?” Jahwe mpebetehken man banta persaraten guna jadi pertua. ItetapkenNa persaraten si meganjang man dilaki si ngawasi runggun. Enda ncidahken maka runggun meherga iakap Jahwe. Pustaka si Badia ngataken maka itukurNa e ”alu engkorbanken [AnakNa, NW] seh mate”. (Perbahanen 20:28) Ate Jahwe gelah pertua jadi usihen. Kalak enda ertanggung jabap man baNa i bas carana mperlakoken anggota runggun. Ate Dibata gelah aman siakap i bas kepkepen kalak e. (Jesaya 32:1, 2) Emaka paksa sioge persaraten man pertua, sipelajari maka Jahwe tuhu-tuhu mperdiateken kita.

10, 11. (a) Paksa sioge ayat kerna persaraten man pertua, kai gunana man banta? (b) Uga banci sigunaken keterangen enda i bas nampati kalak si deban?

¹⁰ ”Kai gunana ayat enda man bangku?” Adi kam sekalak pertua, banci ipereksandu alu ratur persaraten enda gelah kam banci jadi pertua si lebih mehuli. Adi kam sekalak si ersura-sura jadi pertua, usahakenlah ncukupi persaraten e. (1 Timotius 3:1) Tapi, kerina kalak Kristen banci erlajar i bas persaraten enda nari. Contohna, iarapken Jahwe gelah kita jadi kalak si masuk akal ras bijaksana. (Pilipi 4:5, NW; 1 Petrus 4:7, NW) Adi pertua jadi ”usihen biri-biri”, banci kita erlajar i bas ia nari janah ’ngusih kinitekenna’.​—1 Petrus 5:3; Heber 13:7.

¹¹ ”Uga banci kugunaken enda i bas nampati kalak si deban?” Banci sigunaken persaraten man pertua guna nampati kalak si erlajar Pustaka si Badia ras kalak si ncidahken minat gelah meteh maka pertua la seri ras peminpin agama. Enda pe banci nampati kita nginget kerja keras pertua-pertua bas runggunta. Janah, banci lebih siergai kalak e. (1 Tesalonika 5:12) Alu bage, reh riahna akapna ndahiken tugasna.​—Heber 13:17.

12, 13. (a) Alu bahan-bahan si nggo lit, riset kai si banci silakoken? (b) Alu meteh latar belakang sada ayat, banci sidatken pelajaren si la sieteh sedekah enda. Bereken contoh.

¹² Bahanlah riset. Paksa erlajar Pustaka si Badia, banci sidarami jabapen penungkunen enda:

• Ise si nulisken bagin enda?

• Ija janah ndigan enda itulisken?

• Kai saja kejadin penting si terjadi paksa buku enda itulisken?

Jabapenna banci nampati kita ndatken mbue pelajaren si lenga sieteh sedekah enda.

¹³ Contohna, nina Esekiel 14:13, 14, ”Adi lit sada negeri erdosa janah lanai erkemalangen man bangKu, e maka Kuukum negeri e. Kukernepken persedian panganna, Kutamaken ku je kelihen, janah Kubunuh subuk manusia bage pe asuh-asuhenna. Aminna pe Nuah, Daniel, ras Jop ringan i je, kiniulin kalak si telu e erguna lako ngkelini geluhna saja ngenca. Bagenda me nina [JAHWE] si Erdolat.” Adi sibahan riset, banci sieteh maka Esekiel nulisken kata-kata enda kira-kira tahun 612 Sope Masehi. Paksa si e, Nuah ras Jop nggo mate ratusen tahun dekahna, tapi iinget Jahwe denga kesetian kalak e. Tapi, Daniel nggeluh denga paksa si e. Umurna kira-kira 20 tahun paksa ikataken Jahwe ia kalak si ’mehuli’ bali bagi Nuah ras Jop. Kai pelajarenna? Iperdiateken Jahwe ras iergaiNa kerina umatNa si setia, termasuk anak muda.​—Masmur 148:12-14.

14. Kai manfaat si banci idatken anak muda i bas publikasi si khusus ibahan man bana, janah uga kita kerina pe banci ndatken manfaatna? (Nehen gambar pemena artikel.)

¹⁴ Publikasi man anak muda. Enggo sieteh maka banci sidatken manfaat i bas kerina bagin Pustaka si Badia, bage ka pe i bas kerina publikasinta. Mari siperdiateken piga-piga contoh. I bas piga-piga tahun enda, Jahwe nggo nikapken melala keterangen man anak muda. ^[1] (Nehen penjelasen tambahen.) Keterangen enda nampati kalak e guna ngatasi tekanen teman i sekolah ras tentangen paksa ia reh belinna. Tapi, uga kita kerina banci ndatken manfaat i bas artikel ras buku enda? Adi sioge keterangen e, sieteh masalah si ihadapi anak muda janah kita pe reh beluhna nampati ia.

15. Engkai kalak si dewasa pe perlu ngoge publikasi si ibahan man anak muda?

¹⁵ Kalak si nggo dewasa ula min erpengakap maka keterangen e la cocok man bana. Melala topik si ibahas erguna man kerina kalak Kristen. Contohna, kita kerina perlu mbela kinitekenta, ngendaliken dirinta, nulak tekanen teman, janah mpedauh pergaulen bage pe hiburen si la mehuli. Emaka, amin gia publikasi enda ibahan man anak muda, tapi keterangen e rehna i bas Pustaka si Badia nari, janah kita kerina banci ndatken manfaatna.

16. Kai ka gunana publikasi si ibahan man anak muda?

¹⁶ Publikasi si ibahan man anak muda pe banci nampati ia guna mpepaguh hubungenna ras Jahwe. (Oge Pengerana 12:1, 13.) Kalak dewasa pe banci ndatken manfaatna. Contohna, i bas Sedarlah! April 2009 lit artikel ”Kaum Muda Bertanya . . . Bagaimana Aku Bisa Menikmati Pembacaan Alkitab?” Artikel enda mereken melala saran si erguna termasuk kotak si banci igunting, isimpan, janah igunaken paksa erlajar. Banci nge kalak dewasa ndatken manfaat i bas artikel enda? Nina sekalak pernanden, ”Mbarenda, mesera kal kuakap ngoge Pustaka si Badia.” Tapi, igunakenna saran i bas artikel e, janah gundari meriah akapna ngoge Pustaka si Badia. Banci ietehna maka kitap-kitap bas Pustaka si Badia lit  hubungenna sada ras si debanna janah ngasilken sada gambaren si mejile. Nina ka, ”Gundari, meriah kal kuakap ngoge Pustaka si Badia.”

17, 18. Kai manfaatna ngoge majalah si ibahan man jelma si nterem? Bereken contoh.

¹⁷ Publikasi man jelma si nterem. Mulai tahun 2008, nggo sidatken Menara Pengawal edisi pelajaren. Edisi enda ibahan khususna man Saksi Jahwe. Tapi, lit ka edisi man jelma si nterem. Uga kita banci ndatken manfaat i bas si e nari? Mari siperdiateken sada contoh. Iundangndu sekalak jelma ku Bale Kinirajan janah reh ia. Pasti meriah akapndu. Paksa khotbah ipeseh, iukurindu uga perasan tamundu e sanga megiken khotbah janah kai gunana khotbah e man bana. Hasilna, banci lebih iergaindu topik i bas khotbah e.

¹⁸ Enda pe banci sigejapken paksa ngoge majalah si ibahan man jelma si nterem. Contohna, edisi umum Menara Pengawal bage pe artikel-artikel bas jw.org njelasken kerna Pustaka si Badia alu cara si menukah ngangkaisa. Paksa sioge keterangen e, banci lebih siangkai ras sikelengi kebenaren. Banci ka sipelajari cara si mbaru guna nuriken kinitekenta i bas pelayanen. Majalah Sadarlah! pe mpegegehi kinitekenta maka lit si Nepa kita. Janah, kita pe banci erlajar carana mbela kinitekenta.​—Oge 1 Petrus 3:15.

19. Uga banci sicidahken pengerganta man Jahwe nandangi pangan rohani si iberekenNa?

¹⁹ Jelas me, mbue kal nasehat ras petunjuk si nggo ibereken Jahwe man banta. (Matius 5:3) Teruslah sioge janah sipakeken kerina e. Adi silakoken e, banci sidatken manfaatna janah sicidahken man Jahwe maka siergai kal kerina pangan rohani si iberekenNa.​—Jesaya 48:17.