Nina Rosie, “Kuatir kel aku, ras ku ukuri lalap janah ku bayangken rusur si erban aku mbiar.” Si apai nge ayat Pustaka si nampati ia? Salah sadana eme Matius 6:34, “E maka ola aru atendu kerna wari si pepagi, sabap pepagi lit denga ka nge si man ndelenken. Labo pada itambahi kiniseran si sendah alu kiniseran si pepagi.” Alu penampat kata-kata Jesus enda, tersampati kel Rosie gelah ngadi kuatir kerna wari si pepagi. Nina ka, “Nggo bias me masalah si lit gundari, lanai perlu kutambahi kebiarenku nandangi masalah si lenga terjadi ras si la mungkin terjadi.”

Yasmine, nggo ikuasai perasanna si kuatir. “Ngandung aku lalap bas seminggu e, ras lanai aku banci tunduh tiap berngi. Latih kel kuakap rukur.” Ayat siapai nge si nampati ia? Iturikenna ayat si lit bas 1 Petrus 5:7, “Ampekenlah kerina kearun atendu man Dibata, sabap Ia kap si mperdiateken kam.” Nina Yasmine, “Kudalani si e alu terus ertoto man Jahwe janah ibegikenNa totoku. Bagi si iangkat kuakap baban si mberat e arah baraku nari. Amin pe perukurenku si negatif e reh denga rusur, gundari nggo kueteh cara ngatasisa.”

Nina Isabella, sekalak singuda-nguda, “Kuakap sifat tertaren-taren e nggo warisen perban bapakku pe bage nge. Labo kulakoken dahin si pentingna lebe, tapi pangen kuakap santai-santai ras nonton TV. Situhuna enda kebiasan si la mehuli, perban banci erban kita stres ras la beluh erdahin.” Pedah si nampati ia eme si lit bas 2 Timotius 2:15, si ngataken, “Usahakenlah gelah dat pujin kam i lebe-lebe Dibata, bagi sekalak si erdahin si la mela kerna dahinna.” Nina Isabella, “La aku nggit erban mela akap Jahwe ngidah pendahinku perban aku tertaren-taren.” Dungna banci iperubahina sipatna e.

Lit ka Kelsey si ngataken, “La kudungi dahinku bas waktu si itentuken. Enda banci erban aku ngandung, la banci tunduh, ras kuatir. Latih kuakap ngukurisa.” Idat Kelsey penampat arah Dibata bas buku Kuan-kuanen 13:16, “Adi iukuri lebe maka ibelas e pentar kap, kalak lenge imomokenna kebodohenna.” Sanga iukurina ayat enda ietehna maka, “Mehuli adi si biasaken erban rencana ope idalanken. Gundari nggo kuban daftar rencana si kutamaken datas mejaku, kerna dahinku janah enda nampati aku ndahiken dahinku gelah ula lewat waktu.”

Ituriken Kirsten,“Perbulangenku nadingken aku ras empat anak kami.” Ayat siapai nge si nampati ia? Eme Kuan-kuanen 17:17, si ngataken, “Teman tetap encidahken atena keleng, kai gunana sekalak senina adi labo ikut i bas nggejapken kiniseran?” Idarami Kirsten teman si ngelayani Jahwe. Kai hasilna? “Melala cara teman-temanna e nampati ia. Lit si namaken bingkisen ras bunga ilebe pintu. Lit piga-piga kalak si nampati aku ras anakku pindah rumah. Lit ka sekalak teman si nampati aku ndatken dahin. Teman-temanku e terus nampati aku sanga kuperluken.”

Delphine, si ituriken ndai pe nggejapken maka melungen kang kapna. Ingetna sanga ia kebenen kerinana, bagenda nina, “Aku seri bagi ngenen arah kaca nari ku sada toko si dem alu jelma. Tapi aku sisada idarat toko e.” Lit sada ayat Pustaka si nampati ia eme Masmur 68:7, “IbereNa ingan man kalak si kelungunen.” Nina ka, “Kueteh maka si imaksud bas ayat e labo sada rumah si ibangun. Tapi, kuangka maka enda ertina Dibata mereken rumah secara rohani man banta, ingan si aman si iban man kalak si sikeleng-kelengen ras ngkelengi Jahwe. Tapi kueteh ka maka arus rembak aku lebe ras Jahwe gelah banci rembak ras kalak si deban. Emaka, Masmur 37:4 tuhu-tuhu nampati ia, ‘Daramilah kemalemen atendu i bas [Jahwe], maka isehkenNa sura-surandu.’”

Isimpulkenna me bagenda, “Nggo kueteh maka arus tuhu-tuhu ernalem aku man Jahwe. Ia me Bapa si mehulina. Kuatur me waktuku gelah banci ercakap-cakap ras turang seninaku, janah enda erban aku reh deherna ras kalak e ras mpegegehi kerohaninku. Ku nen si mehulina arah kalak e ras la ndarami kesalahenna.”

Payo kel, teman-teman si ngelayani Jahwe pe lenga bo sempurna. Saksi-Saksi Jahwe pe erjuang kang ngadapi perbeben, bagi kalak si deban. Tapi Pustaka ngajari kita nampati kalak adi banci. Enda me cara si mehuli bas ndatken teman. Selain si e, banci nge pedah Pustaka nampati kita ngadapi masalah si la banci dung gundari, misalna penakit si mekelek ras kematen?