Nina Rose, “Darehku la megegeh emaka rusur aku sakit janah la malem-malem. Lanai kuakap lit ertina aku nggeluh.” Salah sada tentangen si mberatna bas ia eme, mon-mon la terbanna mpelajari Pustaka ras hal-hal rohani. Tapi idatna penampat si mbelin arah kata-kata Jesus si lit bas Matius 19:26, “I bas Dibata kai pe banci jadi.” Rose ndatken sada pelajaren maka melala cara bas erlajar. Perban sakitna e, nggo mesera kapna mbaca, emaka begikenna rekamen sora arah pembacan Pustaka bage pe buku si erpalasken Pustaka. * Nina ka, “Adi la lit penampat si bage rupana, kuakap labo banci ku jaga kerohaninku.”

Sanga sedih kel akap Rose perban la banci lakokenna si biasa ilakokenna, datna sada pengapul i bas kata-kata si lit bas 2 Korinti 8:12, “Adi litlah ukur ersuruh guna mere, maka ialoken Dibata me pemere e erpalasken kai si lit i bas kita, labo erpalasken kai si la lit i bas kita.” Kata-kata enda ngingetken Rose maka ngena ate Dibata nandangi si ilakokenna, perban ilakokenna asa ngasupna.

Delphine, si nggo ituriken ndai, ngataken bagenda, “Kenca kematen anakku si rumur 18 tahun  denga, ceda kel ukurku janah tempa-tempa lanai aku ngasup ndalani kegeluhen enda. Kerina nggo berubah.” Datna penampat si mbelin arah kata-kata pemasmur man Dibata, i bas Masmur 94:19, “Kune la tetap ukurku dingen aru ateku, Kam si ngapuli dingen si periahken ateku.” Nina ka, “Ertoto aku mindo penampat man Jahwe gelah kueteh kai si arus ku lakoken guna ngapuli pusuhku.”

Igunakenna melala waktuna bas nampati kalak si deban. Ipeserina bana bagi kapur tulis, amin pe nggo penggel tapi banci denga ipake guna nulis. Bage ka me ia, amin pe getem pusuhna tapi itehna maka banci denga sampatina kalak si deban. Nina ka, “Sanga kugunaken pedah Pustaka guna ngapuli kalak si ku sampati, aku pe ikut terapuli. Enda me cara Jahwe ngapuli ras periahken ukurku.” Ibanna ka daftar kalak si pernah ngadapi ceda ate si lit bas Pustaka. Nina, “Kalak enda kerina ertoto man Dibata.” Datna pelajaren si deban maka “pasti sidat jabapen totonta adi si baca Pustaka.”

Pelajaren si deban si idat Delphine sanga mpelajari Pustaka eme gelah terus natap ku masa depan, labo nginget-nginget kai si nggo terjadi. Arapen si lit bas Perbahanen Rasul-Rasul 24:15 tuhu-tuhu ngapuli ia, “Maka lit nge kekeken i bas si mate nari, subuk kalak si bujur bage pe kalak si la bujur.” Kai si erban ia tek maka pasti ipekeke Jahwe pagi anakna e? Nina Delphine njabapsa, “Banci kuidah anakku bas wari si pepagi. Jumpa ka kami mulihi bas waktu si nggo itentuken Jahwe. Banci ka ku idah kami ras-ras i taman, kukelengi ia pas bagi pengkelengiku sanga ia mbaru lahir.”