CUBA BAYANGKEN: Kam sangana gawah-gawah ku museum si dem alu barang-barang si kuno. Melala si erlubang-lubang ras mekis-kis. Tapi lit sada si mejile denga janah rumit kel bentukna. Emaka isungkunndu si ertugas i je, “Enda nge barang si mbaruna idat?” Nina ngaloisa, “Lang, enda barang si metuana arah kerina si lit i jenda janah la pernah ipekena.” Nindu ka, “Tapi uga maka mejile denga kel, la nge pernah kena kai pe?” Nina si ertugas e, “Labo, barang enggo ndekah kel kena angin ras udan janah melala kalak jahat si erusaha ncedai barang e.” Banci jadi tersungkun-sungkun kam, ‘Arah kai nari nge barang e iban?’

Pustaka bali ras barang si luar biasa e. Enda me buku si metuana arah buku si deban. Memang lit buku si deban si nggo metua ka umurna. Tapi bali bagi barang-barang si lit i museum ndai, buen buku-buku e nggo ceda perban tuana. Si lit bas buku-buku e pe nggo lanai cocok ras pemeteh si mbaru bas jamanta. Contohna, bas pemeteh kerna ilmu pengetahuan si nggo ibuktiken benar. Nasehatna kerna kesehaten pe lanai nampati tapi banci erban bahaya. Melala ka arah buku-buku si dekah e, nggo lanai lengkap, deba bene ntah pe nggo ceda.

Tapi Pustaka la bage. Amin pe buku e mulai itulis lebih 3.500 tahun si lewat, tapi la lit baginna si bene. Amin pe melala si erusaha ncedaisa sedekah ratusen tahun si lewat, itutung, ilarang ras la iergai, isina tetap ertahan. Situhuna ndauh ope ikataken kalak buku enda ketadingen jaman, nggo leben ituriken Pustaka pemeteh si gundari ipake bas  jamanta.​—Nen kotak si erjudul “Ketadingen Jaman ntah Erguna Denga Seh Gundari?”

Banci saja tersungkun-sungkun kam, ‘Tuhu nge ajaren Pustaka erguna denga gundari? Guna njabapsa, sungkun bandu, ‘Kai saja nge masalah si mberatna si iadapi manusia gundari? Menurutndu apai nge si mberatna?’ Banci jadi nindu, perang, polusi, kejahaten, ntah pe korupsi. Gundari cuba ukuri piga-piga pedah si iajarken Pustaka si lit i jenda. Sanga ipelajarindu enda, cuba ukuri, menurutndu reh ulina nge keadan doni enda adi kerina kalak ndalanken pedah-pedah Pustaka e?

ERBAHAN PERDAMEN

“Ketuahen kalak si erbahan perdamen; sabap iakui Dibata me ia anakNa.” (Matius 5:9) “Asa ngasupndu usahakenndulah gelah meriah kam ras kerina kalak.”​—Roma 12:18.

PERKELENG, PERKUAH

“Ketuahen kalak si perkuah ate dingen perkeleng; sabap ia me ngaloken perkuah ate Dibata.” (Matius 5:7) “Ola kam pergelut dingen si alem-alemen salah adi kitik ukurndu ibahan kalak. Kam arus sialem-alemen salah bagi Tuhan enggo ngalemi salahndu.”​—Kolose 3:13.

NGERGAI KERINA KALAK

“I bas sekalak jelma nari enggo ijadikenNa kerina bangsa manusia si ngiani doni enda.” (Perbahanen Rasul-Rasul 17:26) “La erndobah iakap Dibata manusia e. Tep-tep manusia i bas bangsa si apai nari gia, adi ia erkemalangen man Dibata dingen mehuli perbahanenna, ialoken Dibata kap.”​—Perbahanen Rasul-Rasul 10:34, 35.

NGERAWAT DONI

“Kenca bage itamakan [Jahwe] Dibata manusia ndai i Peken Eden, guna ngusahai ras njagaisa.” (Kejadin 2:15) Dibata pagi si “ngkernepken kalak si ncedaken doni.”​—Ketangkasen 11:18.

LA ERLAGU LA MEHULI NTAH PE MERANGAP

“Metengetlah maka ola kam merangap nandangi kai pe; sabap kegeluhen manusia si tuhu-tuhu labo erpalasken erta-erta si lit i bas ia, aminna uga gia ia bayakna.” (Lukas 12:15) “Erkiteken kam anak-anak Dibata, la patut terjadi i tengah-tengahndu erlua-lua, erlagu la mehuli ntah pe merangap; ibelasken pe ola.”​—Epesus 5:3.

JUJUR RAS RAJIN

“Sabap lalap nge kami ersura-sura ndalanken si mehuli.” (Heber 13:18) “Kalak si nangko gelgel nari, olanai ia nangko. Erdahinlah ia alu mehuli guna ncariken keperlunna.”​—Epesus 4:28.

MPELEBE KEPENTINGEN KALAK

“Tetapkenlah ukur kalak si perbiar, sampatilah kalak si kote janah sabarlah kam nandangi ise pe.” (1 Tesalonika 5:14) “Pekena-kena anak-anak melumang ras kalak si enggo mbalu si lit i bas kiniseran.”​—Jakup 1:27.

Pustaka labo saja nuriken kerna pedah-pedah si mehuli tapi iturikenna ka uga cara ndalankenca bas kegeluhenta. Adi kerina kalak ndalanken pedah-pedah si mehuli arah Pustaka, banci nge enda nguraki masalah si iadapi manusia? Payo, pedah-pedah Pustaka cocok ras erguna kel seh asa  gundari! Pedah siapai nge si lit i Pustaka si banci nampati kam?

Sekalak si pentar pernah ngataken bagenda, “KepentarenNa enggo ibenarken arah kerina pendahinNa.” (Matius 11:19) Setuju nge kam? Guna meteh erguna ntah lang sada pedah banci sieteh arah hasilna sanga sidalanken. Banci jadi tersungkun kam, ‘Adi tuhu kin pedah Pustaka e erguna, me pasti nge mehuli pengaruh bas geluhku?’ Uga enda banci ku gunaken bas ngadapi masalahku gundari? Cuba perdiateken contoh enda.

Kegeluhen Delphine * sibuk kel janah meriah kapna ndalanisa. Tapi, rempet terjadi perbeben si mberat bas geluhna. Anakna si nguda denga mate. Perjabunna pe ermasalah. Uang masukna lanai jelas. Nina, “Lanai kuakap merga bangku—lanai lit anak, lanai lit perbulangen, lanai lit rumah. Lanai kuakap erguna man bangku—nggeluh lanai ertujun, lanai ergegeh, lanai lit arapen.”

Dungna igejapken Delphine me maka tuhu kel kata-kata enda, “Dekahna kami nggeluh lit pitu puluh tahun, adi kami megegeh banci jadi seh waluh puluh tahun. Tapi kesusahen e me  ayam-ayam geluh kami, pedas-pedas keri umur si gendek e, jenari lesap me kami.”​—Masmur 90:10.

Idat Delphine penampat si iperlukenna bas waktu si tepat arah Pustaka. Kai si idatna e tuhu-tuhu nampati kel. Bas telu artikel seterusna, banci siidah melala pengalamen si ncidahken uga pedah Pustaka tuhu-tuhu erguna bas ngadapi masalah si lit bas kegeluhen. Perasan kalak e nandangi Pustaka seri bagi perasan kalak si i museum ndai sanga ngidah barang si lit i museum e. La seri ras buku si deban, buku enda tetap erguna seh asa gundari. Enda me si erban Pustaka beda ras buku si deban. Isina reh arah Dibata labo manusia.​—1 Tesalonika 2:13.

Banci jadi kam pe igejapkenndu maka nggeluh enda la dekah ras dem alu masalah. Sanga mbue masalahndu, ku ja nge kam ndarami pengapul, penampat, ras nasehat si terteki?

Mari si bahas telu cara si penting si lit bas Pustaka, si banci erguna bas kegeluhenndu. Enda banci nampati kam guna

1. mpedauh masalah adi banci denga.

2. ngatasi masalah si terjadi.

3. megenggeng ngadapi keadan si la banci iubah.

Telu bagin enda i bahas bas artikel seterusna.