AMIN PE PUSTAKA LABO BUKU ILMU PENGETAHUAN, TAPI MELALA I JE PEMETEH SI NGGO MAJU BAS JAMANNA. PERDIATEKEN PIGA-PIGA CONTOHNA.

Lit nge bena-benana alam semesta enda?

Lit sekalak ahli tek kel ia maka jabapna lang. Tapi gundari, kalak e tek maka alam semesta enda lit bena-benana. Tapi situhuna nggo leben ikataken Pustaka kerna si e.​—Kejadin 1:1.

Payo nge doni enda rata?

Bas jaman si nai melala kalak erpengakap maka doni enda rata kerina. Bas abad pelimaken SM, sekalak ahli ilmu alam ngataken maka doni enda kibul. Tapi ndauh ope si e, i bas abad pewaluhken SM, nggo itulisken nabi Jesaya i bas Pustaka alu ngataken “lingkaren doni,” kata si ipake i je banci ka ngertiken “kibul.”​—Jesaya 40:22, Terjemahan Dunia Baru.

Banci nge ceda benda-benda si lit i langit?

Nina ahli ilmu alam arah Junani eme Aristoteles, si nggeluh bas abad si peempatken SM, doni enda ngenca banci reh cedana, tapi bintang-bintang i langit la pernah berubah ntah pe ceda. Ratusen tahun dekahna melala kalak si erpengakap bage. Tapi bas abad 19, kalak si ahli bas ilmu alam ndatken sada pemeteh kerna hukum alam si la ratur. Pemeteh e nuriken maka kerina si lit i langit ntah pe i doni reh cedana janah masap. Salah sada ahli alam si tek man pemeteh e, eme Lord Kelvin, ngutip kata-kata Pustaka kerna langit ras doni si ngataken, “Bagi uis kerina nge tapes.” (Masmur 102:26, 27) Tek Kelvin maka seri bagi si ikataken bas Pustaka, labo ipediat Dibata kai pe si ncedai ntah pe si ngkernepken si nggo ibanNa.​—Pengerana 1:4.

Lit nge si natangsa planet-planet bage pe doninta enda?

Aristoteles erpengakap maka kerina planet-planet si lit i langit ibungkus alu kristal janah erlapis-lapis, lapisen si basna kel eme doni. I bas abad 18 M, ahli-ahli ilmu alam nggo setuju maka bintang-bintang ras planet-planet la lit si natangsa. Tapi arah buku Jop si itulis kira-kira bas abad 15 SM, nggo leben ituriken maka nina Dibata “i bas si la lit doni isangkutkenNa.”​—Jop 26:7.

AMIN PE PUSTAKA LABO BUKU KESEHATEN, PEDAH-PEDAH SI LIT I JE ERGUNA KEL BAS NJAGA KESEHATEN.

Kalak si sakit ipeserap.

Hukum Musa nuriken maka kalak si kena penakit kusta arus ipeserap arah kalak si deban. Sanga penakit e ngelangketi jelma si nterem bas Abad Pertengahen, kira-kira arah tahun 500 seh 1500 M, i je maka ipake dokter-dokter pedah e janah mejile kel hasilna.​—Imamat, pasal 13 ras 14.

Mburihi tan kenca nagang mayat.

Ope lenga abad 19, dokter-dokter si biasa nagangi mayat la burihina lebe tanna sanga nambari pasien si deban. Melala kel si mate perban kebiasan si bage. Bagi si ituriken bas Hukum Musa, ise pe si nagangi mayat nggo ikataken najis. Emaka iperluken lau guna erban kalak e lanai najis. Pedah enda tuhu-tuhu erguna kel man kesehaten.​—Bilangen 19:11, 19.

Nanemken kotoren.

Tiap tahun, erjuta anak-anak mate perban penakit diare, buen perban kotoren jelma si la itanemken. Bas Hukum Musa nggo ituriken maka kalak si kuture arus itanemkenna kotorenna janah arus ndauh arah ingan tading.​—Ulangen 23:13.

Waktu si pas guna sunat.

Perentah Dibata ngataken maka tiap anak dilaki si lahir arus isunat kenca waluh wari. (Imamat 12:3) Anak si mbaru lahir biasana nggo mejile kengasupen darehna kenca rumur sada minggu. Amin pe bas jaman Pustaka lenga lit pemeteh ras alat si canggih bage si gundari, alu nimai lewat sada minggu maka isunat, tuhu-tuhu sada cara si mehuli.

Perukuren si sehat ras kesehaten daging lit hubungenna.

Peneliti-peneliti ras ahli kesehaten ngataken maka perukuren si positif bagi, keriahen ukur, arapen, ngata bujur, ras nggit ngalemi kalak banci mereken pengaruh si mehuli man kesehaten. Nina Pustaka, “Keriahen desken tambar si mereken kejuah-juahen, adi ukur serbut erbahanca daging kertang tading tulan.”​—Kuan-kuanen 17:22.