Enggo siteh ise kin Dibata e. Enggo siteh arah Pustaka maka gelarNa eme Jahwe janah sipatNa si utama eme kekelengen. Enggo ka sibahas kai saja si enggo bage pe si nandangi ilakokenNa man kerina manusia. Melala denga si perlu sipelajari kerna Dibata. Tapi, banci saja tersungkun-sungkun kam, ‘Kai gunana adi kupelajari kerna Dibata?’

Erjanji Jahwe “adi daramindu Ia, pasti pediatNa kam njumpai Ia.” (1 Kronika 28:9) Adi siusahaken nandai Dibata Jahwe, banci kita jadi ‘teman Jahwe si ndeher kel.’ (Masmur 25:14) Luar biasa kel e. Kai saja gunana jadi teman Dibata?

Keriahen ukur situhu-tuhu. Jahwe eme “Dibata si ermeriah ukur.” (1 Timotius 1:11) Adi erteman kam ras Dibata janah usihndu sipat-sipatNa, banci kam tuhu-tuhu ermeriah ukur. Dungna lebih sehat perukurenndu, mentalndu, bage pe dagingndu. (Masmur 33:12) Banci ka reh riahna akapndu perban enggo lakokenndu kai si erbanca kam sehat, mehuli hubungenndu ras kalak si deban, janah lanai lakokenndu kebiasan si salah. Pasti cocok akapndu kai si ikataken pemasmur, “Erguna kel kuakap reh deherna ras Dibata.”​—Masmur 73:28.

Iperdiateken Dibata kita sekalak-sekalak. Erjanji Jahwe, “Kunasehati kam pagi janah tetap Kuperdiateken.” (Masmur 32:8) Ertina, iperdiateken Jahwe umatNa sekalak-sekalak janah iberekenNa kai situhu-tuhu iperluken kalak e. (Masmur 139:1, 2) Adi enggo erteman kam ras Jahwe, banci igejapkenndu maka lalap kam sampatiNa.

Masa depan si luar biasa. Gundari isampati Dibata Jahwe kita gelah ermeriah ukur ras puas. Tapi labo e saja, iberekenNa ka masa depan si luar biasa man banta. (Jesaya 48:17, 18) Nina Pustaka, “Adi tandai kalak maka Kam ngenca Dibata situhu-tuhu, janah tandaina Jesus Kristus si isuruhNdu, alokenna pagi kegeluhen si rasa lalap.” (Johanes 17:3) Gundari mesera kel kegeluhenta. Tapi, arapen si ibereken Dibata banci jadi jangkar si “pasti ras paguh.”​—Heber 6:19.

Melala denga alasenna engkai maka perlu lebih sitandai Dibata janah erteman ras Ia. Guna ndatken terbuen keterangen, banci sungkunndu sekalak Saksi-Saksi Jahwe ntah pe nenndu situs jw.org/btx.