Sanga lit masalahta, pasti siarapken gelah sampati temanta kita. Enterem kalak erpengakap maka sanga lit masalahna, la isampati Dibata ia. E me sebapna labo iakapna Dibata e temanna. Padahal melala si enggo ilakoken Dibata man banta. Selain si e, labo ipediat Dibata kita terus ngadapi masalah janah menderita. Kai nge si nandangi ilakoken Dibata?

Lanai pagi lit kejahaten perban ikernepken Dibata me sumber kejahaten e. Ikataken Pustaka ise sumberna, nina, “Kerina doni enda lit bas kuasa si jahat.” (1 Johanes 5:19) “Si jahat” eme Setan si Iblis, si ikataken Jesus “penguasa doni enda.” (Johanes 12:31) Melala masalah si lit bas doni enda terjadi perban pengaruh Setan. Emaka, kai si nandangi ilakoken Dibata?

Lanai ndekah, erkelangken Jesus Kristus, ‘ikernepken Dibata pendahin Iblis.’ (1 Johanes 3:8; Heber 2:14) Nina Pustaka, Iblis pe enggo itehna maka lanai ndekah ikernepken me ia. Itehna maka “waktuna ntisik nari ngenca.” (Ketangkasen 12:12) Kerina kalak jahat pe ikernepken Dibata pagi.​—Masmur 37:9; Kuan-kuanen 2:22.

Kenca ikernepken Dibata kerina kejahaten, terjadi me sura-sura Dibata. Sura-suraNa eme gelah manusia si sempurna nggeluh rasa lalap bas pardis i doni. Adi si e enggo terjadi, kai saja si banci sidatken?

Perdamen ras keamanen seh rasa lalap. “Kalak si meteruk ukur ndatken doni enda pagi, meriah kel pagi ukur kalak e perban dem kedamen i je.”​—Masmur 37:11.

Melala pangan si ergizi. “Melala kel pagi pangan i belang-belang doni, i puncak pegunungen pe seh kel lalana.”​—Masmur 72:16.

Rumah ras pendahin si erban meriah ukur. “Bangun kalak e pagi rumah janah kalak e si ngianisa, suan kalak e pagi batang anggur janah kalak e si man buahna. . . . Umat si Kupilih tuhu-tuhu pagi ngenanami hasil kerja kerasna.”​—Jesaya 65:21, 22.

Merhat nge kam ndatken kegeluhen si bage? Lanai ndekah, bage me si inanami manusia tiap wari.

Gundari, kerina jelma pasti sakit janah dungna mate. Tapi lanai ndekah, arah korban tebusen Jesus, ‘ise pe si erkiniteken man Jesus la ikernepken tapi ndatken kegeluhen si rasa lalap.’ (Johanes 3:16) Kai saja nge pagi si terjadi?

Lanai lit si sakit. “Si tading bas negri e lanai pagi lit si ngataken, ‘Sakit aku.’ Janah kerina kalak si tading i je, iampuni pagi dosana.”​—Jesaya 33:24.

Lanai lit kematen. “MasapkenNa pagi kematen seh rasa lalap, iapusi Jahwe Tuhan Si Meganjangna pagi iluh kerina kalak.”​—Jesaya 25:8.

Manusia nggeluh rasa lalap. “Pemere Dibata eme kap kegeluhen si rasa lalap arah Kristus Jesus Tuanta.”​—Roma 6:23.

Kalak si enggo mate ipekeke. “Lit pagi kekeken arah si mate nari man kalak si benar ras kalak si la benar.” (Perbahanen Rasul-Rasul 24:15) Kalak si mate pe ndatken manpaat arah tebusen.

Kai si ilakoken Dibata gelah kerina enda banci terjadi?

Pemerentahen Dibata si lit i surga me si erban sura-sura Dibata man manusia ras doni enda terjadi. Ipilih Dibata me Jesus jadi Raja bas pemerentahen e. (Masmur 110:1, 2) Isuruh Jesus gelah itotoken murid-muridna pemerentahen ntah pe kerajan e. Nina, “O Bapak kami si i surga, . . . reh min KerajanNdu.”​—Matius 6:9, 10.

Kerajan Dibata pagi si merentah doni enda, janah isasapkenna kerina masalah ras penderitan si lit bas doni enda. Kerajan enda me pemerentahen si mehulina! E me sebapna, sanga i doni iusahaken Jesus kel mberitaken “berita si meriah kerna Kerajan.” Isuruhna ka pengikutna ngelakoken si e.​—Matius 4:23; 24:14.

Perban keleng kel ate Jahwe man manusia, erjanji Ia mereken kerina pasu-pasu si luar biasa e. Kenca itehndu kerna si e, merhat nge kam lebih nandai Jahwe janah ndeher ras Ia? Adi lakokenndu e, kai saja gunana bandu? Jawapenna lit bas artikel seterusna.