Adi lebih itandaindu atendu sekalak jelma, perlu tehndu pengalamen geluhna bage pe masalah si pernah iadapina. Adi lebih itandaindu atendu Dibata, arus ka tehndu kai saja si nggo ilakokenNa. Melala kel si nggo ilakoken Dibata mbarenda si erguna man banta gundari bage pe bas wari si pepagi.

Dibata Jahwe eme Pencipta Si Mulia, janah ‘jelas kap sipat-sipatNa si la teridah arah kai si iciptakenNa.’ (Roma 1:20) ‘Doni enda ijadiken Dibata alu gegehNa, alu kepentarenNa itepaNa doni enda. Ia kap si ngkimbangkenca langit kerina alu pengertinNa.’ (Jeremia 10:12) Banci ka siidah kekelengenNa arah ciptanNa si luar biasa.

Misalna, istimewa iciptaken Dibata manusia perban ibanNa “mirip ras Ia.” (Kejadin 1:27, Terjemahan Dunia Baru) Enda ertina iban Jahwe kita banci ngusih sipat-sipatNa si luar biasa asa ngasupta. Iban Dibata ka kita ngasup ngangkai cara rukurNa bage pe perentahNa. Adi siusahaken ndalankenca, reh riahna me siakap janah erguna geluhta. Banci ka kita erteman ras Dibata.

Sanga siperdiateken ciptan Dibata si lit bas doni, banci siteh uga perasan Dibata man banta. Nina rasul Paulus, ‘Tetap icidahken Dibata diriNa arah perbahanenNa si mehuli. IberekenNa [banta] udan, musim rani, ipuaskenNa [kita] alu pangan, janah meriah ibanNa ukurta.’ (Perbahanen Rasul-Rasul 14:17) Ndauh buen si ibereken Dibata asangken si iperluken kita. Melala si iberekenNa man banta janah erbage macamna gelah meriah ukurta. Tapi melala denga si ate Dibata ilakokenNa man banta.

 Iciptaken Jahwe doni enda gelah jadi ingan tading manusia rasa lalap. Nina Pustaka, “Doni iberekenNa man manusia,” janah ‘taneh enda itepaNa la mesuni, tapi mehuli, gelah banci iiani.’ (Masmur 115:16; Jesaya 45:18) Ise nge kari si tading i je? Asa kai dekahna? “Kalak bujur me si ndatken bagin taneh i bas negeri e, janah ringan ia i je rasa lalap.”​—Masmur 37:29.

E me sebapna, iban Jahwe me dilaki ras diberu si pertama, Adam ras Hawa, tading bas taman si mejile i doni “guna ngusahai ras njagaisa.” (Kejadin 2:8, 15) Ibereken Dibata dua dahin si istimewa man kalak e: “Ertuahlah kam jadi nterem, demi dingen taluken doni enda.” (Kejadin 1:28) Situhuna Adam ras Hawa banci nggeluh ermeriah ukur i doni seh rasa lalap. Ipilih kalak e la patuh man Dibata, emaka la kalak e cocok jadi “kalak bujur” si “ndatken bagin taneh i bas negeri e.” Tapi, rencana Jahwe si mbarenda kerna manusia ras doni lenga berubah. Ibahas kari e bas artikel seterusna. Gundari, mari sibahas kai ka si nggo ilakoken Dibata.

Pustaka eme Kata Dibata. Engkai maka ibere Jahwe e banta? Tujun si pentingna eme gelah banci kita erlajar kerna Ia. (Kuan-kuanen 2:1-5) Memang la lit buku si apai pe si banci njawap kerina penungkunen kerna Dibata. (Pengerana 3:11) Tapi kerina si tertulis bas Pustaka nampati kita nandai Dibata. Banci siteh uga sipat Dibata arah caraNa erurusen ras umatNa. Banci siteh kalak si uga si ngena ateNa ras si lang. (Masmur 15:1-5) Banci sipelajari uga perukuren Jahwe kerna cara nembah Ia, kerna lagu langkah, ras kerna erta. Bas Pustaka, banci ka jelas siteh sipat-sipat Jahwe arah ranan ras perbahanen AnakNa, Jesus Kristus.​—Johanes 14:9.

Selain si e, ibereken Jahwe Pustaka gelah kita ermeriah ukur janah erguna geluhta. Arah Pustaka, ikataken Jahwe uga carana gelah keluargata bahagia, gelah puas geluhta, janah gelah lanai kita kuatir. Bagi si nandangi ibahas bas majalah enda, bas Pustaka lit jawapen kerna penungkunen penting bas kegeluhen, misalna: Engkai maka mesera geluhta? Kai nge si terjadi pagi? Bas Pustaka pe ijelasken kai saja si nggo ilakoken Dibata gelah manusia ermeriah ukur i doni, bagi sura-suraNa mbarenda.

Lit alasen si deban ngkai maka Pustaka enda buku si seh kel istimewana. Lebih 1.600 tahun dekahna Pustaka e itulis kira-kira 40 dilaki. Tapi, sada ngenca tema Pustaka perban buku e rehna i bas Dibata nari. (2 Timotius 3:16) La bagi tulisen-tulisen si dekah si debanna, isi Pustaka la pernah berubah kenca ratusen tahun pe. Enda terbukti arah ribun naskah Pustaka si dekah. Pustaka pe tetap ertahan amin gia lit si erusaha gelah Pustaka la iterjemahken, ibagiken, ras ibaca nterem jelma. Gundari, Pustaka me buku si mbuena kel iterjemahken janah i japa pe lit. Kerina enda mbuktiken maka “kata Dibatata tahan rasa lalap.”​—Jesaya 40:8.

Lit ka si ilakoken Dibata man banta. Bagi si ikataken ndai, ipilih Adam la patuh. Erdosa me ia, emaka ia ras keturunenna lanai banci nggeluh rasa lalap. Amin gia bage, ipastiken Dibata manusia banci nggeluh rasa lalap i doni bagi sura-suraNa. “Bali bagi dosa masuk ku doni arah sekalak manusia, janah dosa e maba kematen. Akibatna, kematen nggo ngelangketi kerina manusia sebap kerina manusia nggo erdosa.” (Roma 5:12) Perban si e, tempa-tempa gagal sura-sura Jahwe. Tapi uga tanggapenNa?

Kerina si ilakoken Jahwe cocok ras sipat-sipatNa. Teridah Ia adil sanga ipediatNa Adam ras Hawa iukum perban kesalahen kalak e. Tapi, teridah ka Ia perkeleng sanga iberekenNa arapen man keturunen kalak e. Alu pentar, iban Jahwe cara gelah masalah e banci idungi, janah mis ikatakenNa keputusenNa. (Kejadin 3:15) Banci kita  bebas arah dosa ras kematen erkelangken AnakNa, Jesus Kristus. Uga carana?

Guna mbebasken manusia arah akibat pemberontaken Adam, iutus Jahwe me Jesus ku doni guna nuduhken dalan ku kegeluhen janah “mereken kegeluhenna selaku tebusen jadi penukar man nterem jelma.” * (Matius 20:28; Johanes 14:6) Banci itebus Jesus kita perban ia sempurna bagi Adam. Tapi, la bagi Adam, Jesus terus patuh amin gia arus mate. Situhuna labo cocok Jesus mate, emaka ipekeke Jahwe ia gelah mulihi nggeluh i surga. Ibereken Jesus arapen man manusia gelah nggeluh rasa lalap, si nggo bene iban Adam. “Bali bagi sekalak jelma si la patuh si erban nterem kalak jadi erdosa, bage ka pe sekalak jelma si patuh erban nterem kalak ikataken benar.” (Roma 5:19) Arah korban tebusen Jesus, ijamin Dibata maka janjiNa pasti terjadi. Manusia banci nggeluh rasa lalap i doni!

Enggo melala si ilakoken Jahwe guna ndungi masalah perban Adam la patuh. Je nari melala si banci sipelajari kerna Jahwe. Misalna, la lit kai pe si banci ngambati sura-sura Jahwe. Janah kerina si ikatakenNa pasti “seh.” (Jesaya 55:11) Siteh ka maka keleng ate Jahwe kita. “Bagenda me cara Dibata mbuktiken kekelengenNa man banta: IsuruhNa AnakNa si tonggal ku doni enda, gelah banci sidatken kegeluhen erkelangken ia. Isuruh Dibata AnakNa jadi korban pendamen guna dosa-dosata, labo perban nggo sikelengi Ia, tapi perban Ia si ngkelengi kita.”​—1 Johanes 4:9, 10.

“Mereken AnakNa pe labo Ia sangsi, malahen ikorbankenNa guna kita.” Emaka tek kita nggit Dibata “mereken kerinana man banta alu lias ate” bagi si nggo ijanjikenNa. (Roma 8:32) Kai saja janji Dibata man banta? Mari sibahas.