Ijelasken Jesus ja nari banci ‘siteh maka Kerajan Dibata enggo ndeher.’ (Lukas 21:31) Ikataken Jesus maka lit pagi piga-piga si terjadi, eme perang si mbelin, gempa si megegeh, kurang pangan, ras lit wabah penakit. Kerina e enggo siidah janah enggo sigejapken.​—Lukas 21:10-17.

Selain si e, nina Pustaka maka bas “wari-wari pendungi” arah pemerentahen manusia, reh jahatna me sipat-sipat manusia. Banci ibacandu kerna si e bas 2 Timotius 3:1-5. Kenca idahndu uga sipat ras perbahanen kalak si gundari, pasti setuju kam maka kai si ikataken Pustaka e benar.

Kai ertina kerina e? E ertina maka kentisik nari iban Kerajan Dibata me perubahen si mbelin bas doni enda. (Lukas 21:36) I bas Pustaka, erjanji Dibata erban doni enda reh jilena ras erban kegeluhen manusia reh ulina. Perdiateken piga-piga contohna.

“Ibereken kuasa man [Jesus] bage pe kehamaten ras kerajan, gelah kerina kalak arah erbage bangsa ras bahasa ngelayani ia. Kekuasanna eme kap kekuasan si rasa lalap si la pernah masap, janah kerajanna la pernah kernep.”​—DANIEL 7:14.

Ertina: Banci kam pagi nggeluh bas pemerentahen si mehulina si erkuasa i sebelang doni. Raja si ilantik Dibata guna minpin pemerentahen e eme Jesus, AnakNa.

“Si tading bas negri e lanai pagi lit si ngataken, ‘Sakit aku.’”​—JESAYA 33:24.

Ertina: Lanai pagi lit kalak si sakit ntah pe cacat. Sehat kam pagi terus seh rasa lalap.

“PengadiNa peperangen i belang-belang doni.”​—MASMUR 46:9.

Ertina: Lanai pagi lit perang, emaka lanai manusia susah perban perang.

“Lanai lit kalak jahat . . . Kalak si meteruk ukur ndatken doni enda pagi.”​—MASMUR 37:10, 11.

Ertina: Kalak si nggit patuh man Dibata ngenca si nggeluh pagi i doni.

“Bangun kalak e pagi rumah janah kalak e si ngianisa, suan kalak e pagi batang anggur janah kalak e si man buahna.”​—JESAYA 65:21, 22.

Ertina: Iban Dibata pagi peratenNa terjadi “i doni” alu ngubah doni enda jadi ingan si mejile.​—Matius 6:10.