Pustaka si Badia—Sumber si Terteki
Mbarenda nari, enterem kalak arah erbage negri tek man Pustaka si Badia. Gundari pe, lit jutan kalak si ndalanken pedah-pedah Pustaka. Tapi, lit ka si erpengakap Pustaka e enggo ketadingen jaman janah isina dongeng saja. Adi menurutndu uga? Terteki nge Pustaka e?
ENGKAI MAKA PUSTAKA TERTEKI
Biasana, adi temanta terbukti lalap ngataken kai si benar, tek kita man bana. Bage ka pe, gelah tek kita man Pustaka, perlu sidarami buktina maka Pustaka e lalap nuriken kai si benar. Kai saja kin buktina? Perdiateken piga-piga contohna.
Penulisna Jujur
Kerina penulis Pustaka jujur, labo ibuni-bunikenna kesalahenna. Contohna Nabi Juna. Itulisna maka pernah ia la patuh man Dibata. (Juna 1:1-3) Bas pendungi buku Juna, itulisna ka maka ipersingeti Dibata ia. Enda buktina ia jujur. Ia pe meteruk ukur, perban amin pe robah ia, la ituliskenna kerna si e gelah ula ia si iperdiateken. (Juna 4:1, 4, 10, 11) Perban penulis Pustaka jujur, teridah maka meherga kel iakap kalak e kai si benar.
Pedahna Erguna
Lit nge lalap pedah bas Pustaka si cocok guna ndungi masalah? Lit! Misalna, bas Pustaka lit pedah kerna uga carana gelah banci tetap mehuli hubungenta ras kalak si deban. Nina Pustaka, “Kai pe si ate kena lakoken kalak man kena, lakoken ka si bage bana.” (Matius 7:12) “Jawapen si lembut, erban pusuh lanai merawa, tapi ranan si kasar, banci erban merawa.” (Kuan-kuanen 15:1) Jelas me, pedah Pustaka erguna denga seh ngasa gundari.
Sejarah si Terbukti Benar
Ertahun-tahun dekahna, melala benda-benda sejarah si mbuktiken maka isi Pustaka benar. Erbage-bage daerah, bangsa, bage pe kejadin si iceritaken bas Pustaka memang tuhu-tuhu lit. Contohna, perdiateken sada keterangen enda. Ikataken bas Pustaka maka bas jaman Nehemia (abad si pelimaken sope Masehi), kalak Punike arah Tirus si tading i Jerusalem “maba ikan ras kerina barang dayanna.”—Nehemia 13:16.
Lit nge buktina maka keterangen e benar? Lit. Kalak si mpelajari benda-benda sejarah ntah pe arkeolog pernah idatna barang-barang kalak Punike bas Israel. Enda mbuktiken maka mbarenda lit hubungen perdagangen antara duana bangsa e. Selain si e, i Jerusalem idat kalak e ka fosil ikan arah Laut Tengah. Tek kalak e maka ikan-ikan e ibaba perbinaga arah ingan si ndauh. Kenca ipereksa bukti-bukti ndai, sekalak ahli ngataken, “Masuk akal kata-kata bas Nehemia 13:16 kerna kalak Tirus si ndayaken ikan i Jerusalem.”
Cocok ras Ilmu Pengetahuan
Banci ikataken maka Pustaka e buku agama ras sejarah. Tapi sanga iturikenna kerna ilmu pengetahuan, isina cocok kel ras pemeteh si gundari. Perdiateken contohna.
Kira-kira 3.500 tahun si enggo lewat, ikataken Pustaka doni enda isangkutken “bas si la lit.” (Jop 26:7) Beda kel e ras pengangkan kalak mbarenda. Ikataken kalak e maka doni enda lit i datas lau ntah pe i datas gurung kura-kura raksasa. Kira-kira 1.100 tahun kenca buku Jop dung itulis, tek denga kalak maka doni pasti lit si natangsa, la mungkin isangkutken i bas si la lit i ruang angkasa. Tapi dungna bas tahun 1687, kira-kira telu ratus tahun si enggo lewat, i je me mulai iterbitken Isaac Newton hasil penelitianna kerna gravitasi. Ijelaskenna maka doni enda melayang bas sada lintasen ntah pe orbit perban lit gaya sentrifugal si la teridah. Arah hasil penelitian si luar biasa enda terbukti maka benar kai si ikataken Pustaka lebih 3.000 tahun si enggo lewat!
Nubuat si Terjadi
Nubuat eme berita arah Dibata kerna kai si terjadi bas masa depan. Tuhu nge nubuat si lit bas Pustaka terjadi? Perdiateken sada contohna kerna kehancuren Babilon si inubuatken Jesaya.
Nubuat: I bas abad pewaluhken sope Masehi, itulis Nabi Jesaya maka Babilon ihancurken pagi janah dungna lanai iingani. (Jesaya 13:17-20) Janah ikatakenna gelar kalak si naluken kota e, eme Kores. Ijelaskenna ka uga cara Kores naluken kota e eme “kerah” pagi ibanna sungai janah gerbang-gerbang kota pe ipediat talang.—Jesaya 44:27–45:1.
Si Terjadi: Kira-kira 200 tahun kenca nubuat e itulis, iserang raja Persia me Babilon. Ise gelarna? Kores! Kai si ilakokenna? Perban kota Babilon e ikelilingi tembok si paguh ras Lau Eprat, iperentahken Kores man pasukenna nggali sada parik gelah palerkenna Lau Eprat ku ingan si deban. Kenca asa paha nari ngenca bagesna launa, mulai me iserang pasuken Kores kota e. Janah la iarap, gerbang Babilon si pengalana ku Lau Eprat ipediat talang bage saja! Emaka menukah iakap pasuken Kores masuk ku kota e guna nalukenca.
Tapi tuhu nge Babilon e dungna lanai iingani? Ratusen tahun kenca italuken Kores kota e, lit denga kalak si tading i je. Tapi gundari, Babilon si lit i deher Bagdad, Irak, tading reruntuhen nari ngenca. Enda bukti maka kerina si ikataken Pustaka kerna Babilon tuhu-tuhu terjadi. Emaka kai si ikataken Pustaka terteki, termasuk kerna kai si terjadi pagi bas masa depan.
