“Sanga ertoto, ula terus ulih-ulihi kata-kata si seri.”​—Matius 6:7.

La ate Jahwe siulih-ulihi toto si enggo sihapal ntah pe sibaca arah buku toto nari. Tapi arah pusuhta nari min ate Jahwe kita ngerana man baNa. Bayangken uga perasanndu sanga tiap wari iulih-ulihi temanndu kata-katana man bandu. Kalak si erteman biasana terus terang janah arah pusuhna nari ia ngerana. Kita pe, adi arah pusuhta nari kita ertoto man Bapakta si i surga, sianggap Ia Temanta.

“Adi ipindo kena pe, labo idat kena perban tujunna la mehuli.”​—Jakup 4:3.

Siteh maka labo ijawap Dibata totota adi sipindo kai si la ngena ateNa. Contohna, nggit nge kapndu Dibata njawap toto kalak si erjudi mindo penampat gelah banci menang? Enggo jelas-jelas ikataken Dibata gelah ula kita merangap janah ula tek man kai si la tuhu bagi keberuntungen. (Jesaya 65:11; Lukas 12:15) Pasti la ijawap Jahwe toto si bage. Gelah ijawap Dibata totota, arus sipastiken maka totota e sue ras kai si ikatakenNa bas Pustaka.

 “Adi la ikutkenndu undang-undang Dibata, megiken pertotonndu pe mutah ateNa.”​—Kuan-kuanen 28:9.

Bas jaman Pustaka, la ibegiken Dibata toto kalak si la patuh man undang-undangNa. (Jesaya 1:15, 16) Perasan Dibata la berubah. (Maleaki 3:6) Adi ijawap Dibata ateta totota, arus sipatuhi undang-undangNa. Tapi uga adi mbarenda pernah silakoken kesalahen? Tetap nge la ibegiken Dibata totota? Tentu lang. Perban keleng ate Dibata kita, pasti nge iampuniNa kita adi tuhu-tuhu kita robah janah siusahaken asa ngasupta ngelakoken kai si erban meriah ukurNa.​—Perbahanen Rasul-Rasul 3:19.