“Kam kap si megiken pertoton. Erkiteken enggo erdosa, kerina kalak reh man baNdu.”​—Masmur 65:3.

Lit piga-piga si ngataken maka reh tenangna ukurna adi ertoto ia aminna pe labo ia tuhu-tuhu tek lit si megiken toto. Tapi toto labo ngenca erban tenang ukurta sanga lit masalah. Nina Pustaka, “Ndeher kap Jahwe * man kerina si erlebuh man baNa, eme kerina kalak si erlebuh man baNa bas kebenaren. . . . BegikenNa sora kalak e mindo penampat.”​—Masmur 145:18, 19, Terjemahan Dunia Baru, NW.

Tek kita maka ibegiken Dibata Jahwe toto kalak si nembah Ia. Pernah bagenda nina Jahwe, “Erlebuh me kam kempak Aku. Reh kam ndahi Aku dingen ertoto, janah Kualoi kam.”​—Jeremia 29:12.

“Ertotolah man Dibata la erngadi-ngadi.”​—Roma 12:12.

I bas Pustaka, iiahken kita gelah ‘terus ertoto’ janah ‘ertotolah bas tiap kesempaten.’ Jelas me, iarapken Dibata Jahwe kita ertoto man baNa.​—Matius 26:41; Epesus 6:18.

Engkai maka iarapken Dibata kita ertoto man baNa? Cuba ukurindu kerna si enda: Meriah ukur sekalak bapak adi anakna si kitik denga mindo penampat man bana. Banci saja enggo nge itehna keperlun anakna e ras uga perasanna. Tapi sanga ibegina anakna e mindo penampatna, itehna maka tek anakna e man bana janah nggit rembak ras ia. Kita pe sanga ertoto man Dibata Jahwe, sicidahken maka tek kita man baNa janah nggit kita rembak ras Ia.​—Kuan-kuanen 15:8; Jakup 4:8.

“Benterkenlah kerina kekuatiren kena man Dibata, sebap iperdiatekenNa kap kena.”​—1 Petrus 5:7.

Perban keleng ate Dibata kita janah ermediate ka Ia man banta, ngarap kel Ia gelah ertoto kita man baNa. ItehNa kerina masalahta ras kekuatirenta janah isampatiNa ateNa kita.

Segedang geluhna, lalap Raja Daud ertoto man Dibata janah iturikenna kerina isi pusuhna. (Masmur 23:1-6) Uga nge perasan Dibata man Daud? Keleng ate Dibata Daud janah ibegikenNa totona. (Perbahanen Rasul-Rasul 13:22) Gundari pe, ibegiken Dibata totota perban ermediate Ia man banta.

Kata-kata enda eme salah sada isi ayat Pustaka si lit bas buku Masmur. Tek kel penulis buku e maka ibegi Dibata totona janah enda tuhu-tuhu nampati ia kel. Reh rembakna ia ras Dibata janah ngasup ia ngadapi masalah-masalah si mberat bas geluhna.​—Masmur 116:1-9.

Adi tek kita maka ibegiken Dibata totota, pasti terus kita ertoto man baNa. Cuba ukuri pengalamen Pedro si tading bas Spanyol. Anakna mate perban kecelakan bas umur 19 tahun. Seh kel cedana atena. Iturikenna kerina isi pusuhna man Dibata. Mulih-ulih ia ertoto mindo pengapul ras penampat. Kai asilna? Nina Pedro, “Ijawap Jahwe totoku arah turang senina si lit bas runggun Kristen. Iapuli ras isampati kalak e aku ras diberuku.”

Aminna pe toto la banci erban anak Pedro nggeluh mulihi, tapi tersampati kel Pedro ras keluargana perban rusur ertoto. Nina ndehara Pedro si gelarna María Carmen, “Toto si erbanca aku ngasup. Kuteh maka iangkai Dibata Jahwe keadanku. Sanga aku ertoto, dame kuakap janah tenang pusuhku.”

Arah Pustaka bage pe arah pengalamen-pengalamen si iceritaken ndai, jelas me maka ibegiken Dibata totota. Tapi labo ijawapNa kerina toto. Engkai maka lit toto si ijawap Jahwe janah lit ka lang?