Kai Saja Pendapat Kalak Kerna Toto?
“Sanga aku ertoto, tempa-tempa i sampingku kuakap Dibata, ijemakNa tanku, janah itegu-teguNa aku sanga lanai kuakap ngasup ndalani geluhku.”—MARÍA.
“Lit 13 tahun dekahna ndeharaku sakit kanker, dungna mate ia. Ertoto aku tiap wari man Dibata janah tuhu-tuhu kugejapken maka ibegiNa totoku. E erbanca dame pusuhku.”—RAÚL.
“Toto sada pemere si mehuli kel i bas Dibata nari.”—ARNE.
Toto sada pemere si meherga kel iakap María, Raúl, Arne, ras enterem kalak si debanna. Igejapken kalak e maka arah toto banci kalak e ngerana man Dibata, ngata bujur man baNa, janah mindo penampatNa. Tek kel kalak e man kai si ikataken Pustaka si Badia kerna toto, nina, “Kai pe sipindo man baNa adi sue ras peratenNa, ibegikenNa kap kita.”—1 Johanes 5:14.
Tapi, enterem kalak la tek man kai si ikataken Pustaka kerna toto. Misalna Steve, bagenda nina, “Sanga umurku 17 tahun, mate telu temanku bas kecelakan. Sada mate perban tabraken motorna janah dua nari mate perban gedap bas lau.” Kai si ilakoken Steve? Nina, “Ertoto aku man Dibata, kusungkun Ia engkai maka enda terjadi, tapi la kudat jawapna. Dungna rukur aku, ‘Engkai maka aku ertoto?’” Perban la iakap kalak ijawap totona, banci saja sangsi ia lit nge gunana ertoto ntah lang.
Lit ka alasen si deban si erbanca maka la iakap kalak lit gunana ertoto. Ikataken kalak e maka enggo nge iteh Dibata kai keperlunta ras kai masalahta, emaka la perlu situriken man baNa kerna si e.
Piga-piga ka erpengakap maka labo nggit Dibata megiken totona perban kesalahen si pernah ilakokenna. Nina Jenny, “Masalahku si mberatna eme la kuakap meherga bangku. Mbarenda melala kulakoken kai si erbanca aku menyesal. Emaka labo kuakap mungkin ibegiken Dibata totoku.”
Uga nge perasanndu kerna toto? Adi seri perasanndu ras kalak si enggo iceritaken ndai, banci kam terapuli kenca itehndu kai nina Pustaka kerna toto. * Kai si ikataken Pustaka banci terteki. Pustaka banci nampati kam ndatken jawapen arah penungkunen-penungkunen enda:
-
Tuhu nge ibegiken Dibata totota?
-
Engkai maka lit toto si la ijawap?
-
Uga carana gelah ibegiken Dibata totota?
-
Kai gunana ertoto?
^ par. 9 I bas Pustaka melala icatat kerna toto umat Dibata, termasuk toto Jesus Kristus. Bas Kitap-Kitap Heber si biasa igelari Padan si Ndekah, lit lebih 150 toto.
Mungkin Menarik Ka Kapndu
PENUNGKUNEN ANAK MUDA
Kai Gunana Ertoto?
La kin gelah tenang saja nge maka kita ertoto, lit denga kin gunana si deban?
