“Kai pe si ipindo kena man Bapak i bas gelarku, iberekenNa nge.”—Johanes 16:23.

Arah kata-kata Jesus e, jelas teridah maka ate Jahwe ertoto kita bas gelar Jesus, labo erkelangken patung, santo, malekat, ntah pe nini bulang si enggo mate. Arus kita ertoto bas gelar Jesus perban enggo melala si ilakokenna man banta. Nina Jesus, “Ise pe la banci ndahi Bapak adi la kin arah aku.”​—Johanes 14:6.

“Turiken isi pusuhndu man baNa.”—Masmur 62:9.

Sanga ertoto kita man Jahwe, arus kita ngerana man baNa bagi ngerana man bapak si perkeleng. Arus kita mehamat ngerana man baNa janah sipeseh arah pusuhta nari. Ula kita ertoto alu mbaca sada buku ntah pe sihapal kata-katana.

“Kai pe sipindo man baNa adi sue ras peratenNa, ibegikenNa kap kita.”—1 Johanes 5:14.

I bas Pustaka, ikataken Dibata Jahwe kai ateNa si ilakokenNa man banta janah kai ateNa silakoken man baNa. Gelah ibegiken Dibata totota, arus kita ertoto “sue ras peratenNa.” Emaka sipelajarilah Pustaka gelah banci tuhu-tuhu sitandai Ia. Alu bage, totota banci erban meriah ukurNa.

Totoken Kai si Iperlukenndu. Banci sitotoken kai saja keperlunta tiap wari bagi pangan, paken, ras ingan tading. Banci ka sitotoken gelah beluh kita erban keputusen si mehuli janah gelah ngasup ngadapi tentangen. Selain si e, banci ka sitotoken gelah lit kinitekenta, gelah banci kita iampuni, ras gelah isampati Dibata kita.​—Lukas 11:3, 4, 13; Jakup 1:5, 17.

Totoken Kalak si Deban. Meriah kel ukur orang tua si perkeleng ngidah anak-anakna sikeleng-kelengen. Perban kita anak-anak Jahwe, iarapkenNa gelah ermediate kita sada ras si debanna. Emaka, mehuli kel adi sitotoken teman geluhta, keluargata, anak-anakta, ras teman-temanta. Nina Jakup 5:16, “Totoken kenalah sada ras si debanna.”

Katakenlah Bujur. Nina Pustaka kerna Dibata Si Nciptaken kita, “IcidahkenNa diriNa arah perbahanenNa si mehuli. IberekenNa kena udan, musim rani, ipuaskenNa kena alu pangan, janah meriah ibanNa ukur kena.” (Perbahanen Rasul-Rasul 14:17) Sanga siukuri kerina si enggo ilakoken Dibata man banta, tersuruh me ukurta ngata bujur man baNa bas toto. Tapi arus ka sibuktiken pengatan bujurta alu matuhi Ia.​—Kolose 3:15.

Mon-mon kitik ukurta perban la mis ijawap toto si enggo sipeseh alu bulat ukur. Adi bage, banci nge sikataken Dibata e la ermediate man banta? La banci! Gelah siteh perlu kel terus ertoto, cuba ukuri pengalamen-pengalamen enda.

Steve si enggo iceritaken ndai ngataken, “Adi la kin aku terus ertoto, lanai kuakap mungkin aku banci ermeriah ukur.” Kai si erbanca ia berubah? Perban enggo mulai ipelajarina Pustaka, itehna me maka perlu terus ertoto. Nina, “Ngata bujur kel aku man Dibata perban enggo isampatiNa aku arah teman-teman si engkelengi aku. La pernah kuakap bagenda riahna.”

Uga kerna Jenny, si la kapna mungkin ibegi Dibata totona? Nina, “Sanga la kel kuakap meherga bangku, ertoto aku mindo penampat Dibata gelah kuteh engkai maka la kel kuakap meherga bangku.” Uga toto nampati ia? Nina, “Perban ertoto, banci kuubah caraku rukur, banci kunen diriku bagi Dibata ngenen aku. Aminna pe la meherga kuakap bangku perban kesalahenku si mbarenda, kuteh maka Dibata labo pernah bage. Selain si e, toto pe erban aku la nyerah.” Kai asilna? “Perban rusur ertoto, reh tekna aku maka Jahwe e lit. Ia Bapak bage pe Teman si engkelengi aku. IsampatiNa aku lalap adi terus kuusahaken ngelakoken kai si ipindoNa.”

Cuba ka ukuri pengalamen Isabel. Sanga ia hamil ikataken dokter maka cacat kari bayina. Seh kel cedana atena. Janah piga-piga kalak ngatakenca gelah igugurkenna saja bayina e. Nina Isabel, “Tempa-tempa mate ateku perban beratna kel kuakap.” Kai si ilakokenna? Nina, “Ertoto aku gelah isampati Dibata.” Dungna melahirken ia, dilaki anakna, iban gelarna Gerard janah cacat memang ia. Ijawap Dibata nge iakap Isabel totona? Ue. Alu cara kai? Nina Isabel, “Enggo 14 tahun gundari umur anakku. Meriah rusur akapna aminna pe ia cacat. Sadar aku maka ia me jawapen si mehulina arah totoku. Ia me pasu-pasu si mbelinna si ibereken Dibata Jahwe bangku.”

Kai si ibelaskenna e ngingetken kita kerna kata-kata si nulisken buku Masmur, nina, “[Jahwe], pertoton kalak si peteruk bana, ibegikenNdu kap, ipetetap Kam ukurna.” (Masmur 10:17) Tuhu-tuhu alasen si luar biasa si erbanca kita terus ertoto!

Melala toto Jesus si itulis bas Pustaka. Toto si terkenal eme toto si iajarkenna man murid-muridna. Kai si banci sipelajari je nari?