Engkai maka Enterem Kel Kalak Sisegat-segaten?
Engkai maka enterem kel kalak sisegat-segaten? Gelah siteh kai jawapenna, perlu lebe siteh kai kin perasan segat ate e, engkai maka lit perasan segat ate, janah engkai maka enterem kel kalak si rate segat man kalak si deban.
Kai kin Perasan Segat Ate e?
Perasan segat ate eme nembeh kel ateta sekalak jelma ntah pe sada kelompok. Perasan e lalap lit bas pusuhta.
ENGKAI MAKA LIT PERASAN SEGAT ATE?
Mbue alasenna. Misalna, enterem kalak si rate segat man sada kelompok tertentu labo perban lit kesalahenna, banci jadi perban latar belakangna saja. Kalak e ianggap jahat, berbahaya, la meherga, si erban masalah, janah la mungkin banci robah. Situhuna kalak si segat atena kalak si deban pe, banci ka nge pernah segat ate kalak ia, la adil kalak man bana, kasar, ntah pe lit pengalamenna si la mehuli. E si erbanca maka turah ka perasan segat ate bas pusuhna.
ENGKAI MAKA ENTEREM KEL KALAK SI RATE SEGAT MAN KALAK SI DEBAN?
Lit kalak si segat atena kalak si deban padahal lenga ia pernah jumpa. Bage perasanna, perban terpengaruh pendapat kade-kadena ntah pe teman-temanna. Adi lit kalak bas sada kelompok si segat atena kalak si deban, kerina kalak bas sada kelompok e banci ka dungna segat atena kalak ndai.
Perasan segat ate e banci mpengaruhi kalak si deban, emaka la ateta mamang enterem kalak sisegat-segaten. Tapi gelah lanai ateta segat kalak si deban, arus siteh ja nari kin rehna perasan segat ate e. Enda ijelasken bas Pustaka si Badia.
JA NARI REHNA PERASAN SEGAT ATE?
SETAN. Tangtangna labo lit perasan segat ate bas manusia. Perasan segat ate mulai lit sanga sada malekat mberontak man Dibata. Malekat e igelari Setan ntah pe Iblis. Menurut Pustaka, Setan e jahat, nukah merawa, ras kejam. (Jop 2:7; Ketangkasen 12:9, 12, 17) Kenca ia mberontak, ia jadi “pembunuh.” Ikataken ia ‘perbual janah bapak kalak si perbual’ perban rusur kel katakenna si la tuhu. (Johanes 8:44; 1 Johanes 3:11, 12) E me sebapna melala kel perasan segat ate bage pe kejahaten i doni enda.
MANUSIA SI LA SEMPURNA. Manusia si pertama, Adam, ipengaruhi Setan, emaka erdosa ia. Dungna kerina keturunen Adam pe erdosa janah lanai sempurna. (Roma 5:12) Contohna anak Adam si pertama eme Kain, segat kel atena adekna Abil, janah bunuhna. (1 Johanes 3:12) Memang gundari enterem nge kalak si mehuli janah nggit nampati. Tapi perban la sempurna, enterem ka kalak si mentingken bana, percian, ras sombong. Sipat-sipat e me si erban perasan segat ate nukah turah bas pusuh kalak.—2 Timotius 3:1-5.
LA NGGIT NGERGAI KALAK SI DEBAN. Ikataken bas Pustaka maka “kerina doni enda lit bas kuasa si jahat,” maksudna Setan. (1 Johanes 5:19) Emaka enterem kalak gundari la ngergai kalak si deban, jahat, ras kejam. Perban si e ka nge maka gundari melala perasan segat ate bas doni enda. Misalna, enterem kalak bas doni enda negatip perukurenna kerna kalak si deban, hinana kalak, bully-na, tokoh-tokohina, ras cedaina barang kalak.
Bas Pustaka labo ngenca ijelasken ja nari rehna masalah e, tapi ijelasken ka uga cara ndungi masalah e.
