Lanai Pagi Lit Perasan Segat Ate Seh Rasa Lalap!
Bicara banci kin pe siambekken perasan segat ate arah pusuhta nari, la banci sipaksaken ise pe gelah lanai segat atena kalak si deban. Seh ngasa gundari enterem denga kalak si jadi korban segat ate. Jadi, ise nge si banci erbanca perasan segat ate e lanai lit seh rasa lalap?
Dibata Jahwe ngenca si banci nasapken perasan segat ate seh rasa lalap. Janah e me si ijanjikenNa bas Pustaka.—Kuan-kuanen 20:22.
MASAPKEN DIBATA PAGI KAI PE SI ERBAN TURAH PERASAN SEGAT ATE
-
1.SETAN. Malekat si mberontak enda me si erban mbue gundari perasan segat ate. Kernepken Dibata pagi Setan ras ise pe si rate segat man kalak si deban.—Masmur 37:38; Roma 16:20.
-
2.DONI SI IKUASAI SETAN. Imasapken Dibata pagi kai pe si erban lit kejahaten bas doni enda, termasuk pejabat politik si korupsi ras peminpin agama si dungna erban kalak sisegat-segaten. Imasapken Dibata ka pagi kerina bisnis si merangap, si la jujur, ras si ngerugiken kalak si deban.—2 Petrus 3:13.
-
3.DOSA SI ERBAN MANUSIA LA SEMPURNA. Ikataken Pustaka maka kerina manusia lanai sempurna, emaka rusur siukuri ras silakoken kai si salah. (Roma 5:12) E ka me salah sada alasenna lit perasan segat ate bas manusia. Tapi pasti isampati Dibata manusia ngambekken kerina sipat-sipat si la mehuli. Dungna perasan segat ate lanai pagi lit seh rasa lalap.—Jesaya 54:13.
JANJI PUSTAKA KERNA DONI SI LANAI LIT PERASAN SEGAT ATE
-
1.LANAI LIT PERBAHANEN SI LA ADIL. Lanai ndekah, Dibata me si merentah doni enda seh rasa lalap. Pemerentahen enda igelari Kerajan Dibata. (Daniel 2:44) Uga nge pagi keadanna sanga Kerajan Dibata si merentah? Lanai pagi lit perasan si negatip janah kerina kalak ngergai sada ras si debanna. Selain si e, imasapken Dibata pagi kerina perbahanen si la adil.—Lukas 18:7.
-
2.KERINA KALAK NGGELUH ALU DAME. Lanai lit kalak si susah akapna perban penindasen ntah pe perang. (Masmur 46:9) Kerina kalak nggit erdame, emaka doni enda pagi jadi ingan tading si aman.—Masmur 72:7.
-
3.KERINA KALAK ERMERIAH UKUR SEH RASA LALAP. Bas doni enda pagi kerina kalak sikeleng-kelengen. (Matius 22:39) Lanai lit kalak si latih kapna rukur. Pikiren si negatip ntah pe kenangen si la mehuli, lanai pagi lit. (Jesaya 65:17) Sanga terjadi pagi si e, lanai lit perasan segat ate ras ‘meriah kel pagi ukurta perban dem kedamen i je.’—Masmur 37:11.
Nggit nge kam tading bas ingan si bage? Gundari pe enterem kalak si enggo erusaha ngambekken perasan segat ate alu ngikutken nasehat Pustaka. (Masmur 37:8) E me si enggo ilakoken jutan Saksi-Saksi Jahwe si lit i sebelang doni. Memang labo seri latar belakang ras budaya kalak e, tapi banci kalak e ersada ras sikeleng-kelengen bali bagi sada keluarga.—Jesaya 2:2-4.
Meriah ukur Saksi-Saksi Jahwe nampati kam gelah tehndu uga carana tetap tenang amin pe la adil perbahanen kalak man bandu. Kai si pelajarindu arah Pustaka banci nampati kam gelah lanai atendu segat kalak si deban, ras banci mulai keleng atendu kalak si deban. Selain si e, banci ka tehndu uga carana mehuli man kerina kalak, termasuk man kalak si la meteh ngata bujur ras man kalak si segat atena kam. Hasilna, gundari pe banci meriah ukurndu ras banci kam erdame ras kalak si deban. Janah si pentingna, banci ka kari tehndu uga carana gelah banci nggeluh bas doni si iperentah Kerajan Dibata si lanai lit perasan segat ate.—Masmur 37:29.
^ par. 15 Bas piga-piga bahasa denga ngenca lit.
Mungkin Menarik Ka Kapndu
SORA ERMOMO
Kai Pagi si Ilakoken Kerajan Dibata?
Iteh Jesus maka Kerajan Dibata ngenca si banci ndungi kerina masalah i doni enda. Kai si nggo ilakoken Kerajan Dibata si erban kita tek man Kerajan e?
PERDIATEKENLAH!
Perasan Negatif man Kalak si Deban—Lanai Lit Perasan Negatif man Kalak si Deban Seh Rasa Lalap
Lit empat si ihasilken Kerajan Dibata gelah lanai lit perasan negatif man kalak si deban. Kai saja e?
