CARANA GELAH ULA NAI SISEGAT-SEGATEN
4 | Ngambekken Perasan Segat Ate Alu Penampat Dibata
Ajaren Pustaka:
“Sipat-sipat si hasilken kesah si badia eme kekelengen, keriahen ukur, kedamen, kesabaren, kiniulin, bujur, kiniteken, lembut, ras ngasup nguasai diri.”—GALATI 5:22, 23.
Ertina:
Banci lanai segat ateta kalak si deban adi kita isampati Dibata. Kesah si badia ntah pe kuasa arah Dibata banci ngasilken bas dirita sipat-sipat si la mungkin lit adi ngandalken gegehta saja. Emaka sipindolah penampat Dibata, siandalken gegehNa ula gegehta. Adi bage silakoken, banci ka sigejapken kai si enggo gejapken Rasul Paulus. Nina, “Ngasup aku ngadapi kai pe perban gegeh si kualoken arah Dibata nari.” (Pilipi 4:13) Selain si e, banci ka sikataken, “Penampat man bangku reh arah Jahwe nari.”—Masmur 121:2.
Si Banci Lakokenndu:
“Jahwe me si enggo ngubah aku. Mbarenda aku kalak si kasar, tapi gundari enggo meriah kuakap erdame.”—WALDO
Tutuslah atendu ertoto mindo kesah si badia man Dibata Jahwe. (Lukas 11:13) Pindolah penampatNa gelah banci mehuli sipat-sipatndu. Pelajarilah kai si ajarken Pustaka kerna sipat-sipat si mehuli, bagi kekelengen, kedamen, kesabaren, ras ngasup nguasai diri. Enda banci nampati kam ngambekken perasan segat ate. Usahakenlah ncidahken sipat-sipat e bas kegeluhenndu tiap wari. Ertemanlah kam ras kalak si usahakenna ka ncidahken sipat-sipat e. Teman si bage, banci ngiahken kam bas “engkelengi ras ncidahken perbahanen si mehuli.”—Heber 10:24.
