CARANA GELAH ULA NAI SISEGAT-SEGATEN
3 | Ubahlah Carandu Rukur
Ajaren Pustaka:
“Robahlah alu ngubah perukuren kena. Alu bage, banci jelas teh kena peraten Dibata si mehuli, si sempurna, janah si erban Ia senang.”—ROMA 12:2.
Ertina:
Dibata ngenen perukurenta, e me sebapna ate Dibata siperobahi min carata rukur bagi si ngena ateNa. (Jeremia 17:10) Biasana, ranan ras perbahanen banci erban kalak sisegat-segaten. Tapi situhuna perasan segat ate e imulai arah pusuh ras perukuren. Emaka, arus mis siambekken perukuren kai pe si banci erban perasan segat ate lit bas pusuhta. Bage ngenca carana gelah banci kita tuhu-tuhu robah ras lanai ateta segat kalak si deban.
Si Banci Lakokenndu:
Pereksalah uga situhuna perukuren ras perasanndu kerna kalak arah suku ras bangsa si deban. Cuba ukurindu, ‘Uga nge perasanku kerna kalak e? Tuhu-tuhu nge kutandai kalak e? Ntah, la kin lah enggo terpengaruh aku man perasan si negatip?’ Selain si e, ula nen film, hiburen, ntah pe media sosial si lit hubungenna ras perasan segat ate bage pe kekerasen.
Pustaka si Badia banci nampati kita gelah lanai lit perasan segat ate bas pusuh ras perukurenta
Mon-mon, mesera siakap jujur sanga mereksa perukuren ras perasanta. Tapi Pustaka banci nampati kita ‘meteh perukuren ras sura-sura si lit bas pusuhta.’ (Heber 4:12) E me sebapna Pustaka banci nampati kita ngambekken perasan segat ate si banci saja enggo rurat bas pusuh ras perukurenta. (2 Korinti 10:4, 5) Emaka, pelajarilah Pustaka. Bandingkenlah ajarenna ras perukurenndu. Usahakenlah ngubah carandu rukur gelah sesuai ras ajaren Pustaka.
