3 | Contoh-Contoh si Lit bas Pustaka si Badia
BAS PUSTAKA ITURIKEN KERNA . . . Kalak si “seri perasanna ras kita.”—JAKUP 5:17.
Ertina
Bas Pustaka si Badia lit ituriken kerna kalak si nggejapken perubahen emosi bas geluhna. Adi sibaca pengalamen kalak e, banci saja lit si mirip keadanna ras kita.
Gunana
Ateta min angkai kalak uga perasanta, terlebih ka adi kita kena masalah kesehaten mental. Sanga sibaca Pustaka, banci siteh maka lit kalak si deban si mirip perukurenna ras perasanna bagi kita. Sanga siteh lit kepe kalak si deban si ngenanami masalah bagi kita, la siakap sisada banta ngadapi masalah kesehaten mental.
Bas Pustaka melala icatat kata-kata kalak si putus asa janah nyerah atena. Pernah nge lanai kapndu kam ngasup? Adi pernah, labo kam sisada. Musa, Elia, bage pe Daud pernah bage perasanna.—Bilangen 11:14; 1 Raja-Raja 19:4; Masmur 55:4.
Bas Pustaka lit ituriken kerna diberu si gelarna Hanna. “La tanggung sedakna” akapna perban la lit anakna janah lalap ia itokoh-tokohi ndehara si deban arah dilakina.—1 Samuel 1:6, 10.
Lit ka ituriken bas Pustaka kerna sekalak dilaki si gelarna Jop. Mbelin kel kinitekenna man Dibata. Tapi pernah stres kel ia janah katakenna, “Ciga ateku geluhku. Lanai ateku nggeluh.”—Jop 7:16.
Arah piga-piga kalak si iceritaken bas Pustaka e, banci kari siteh kai si ilakoken kalak e gelah berhasil ngelawan cara rukur si negatip. Alu bage, kita pe banci ngasup ngadapi masalahta.
