Undang Dibata Jahwe kita gelah situriken kai pe man baNa si erban kita kuatir. (Masmur 55:22) Kerina banci sitotoken, ula siakap masalahta e galangsa ntah pe kitiksa guna itotoken. Adi penting man banta, e pe penting ka man Jahwe perban ermediate kel Ia man perasanta. Emaka, seh kel pentingna ertoto gelah banci tenang ukurta.​—Pilipi 4:6, 7.

Adi kita kena masalah kesehaten mental, banci saja sisada siakap banta. Kalak si deban labo lalap tuhu-tuhu angkaina kai si sangana sigejapken. (Kuan-kuanen 14:10) Tapi adi sikataken man Dibata uga perasanta arah toto, tutus ateNa megiken kita janah angkaiNa uga kita. Iperdiateken Jahwe kita. ItehNa uga suina ras uga latihna siakap, janah ateNa ertoto kita man baNa kerna kai pe si erban kita kuatir.​—2 Kronika 6:29, 30.

Adi ertoto kita man Jahwe, banci reh tekna kita maka perdiatekenNa kita. Perasanta banci seri bagi penulis buku Masmur si ertoto, “IdahNdu kesusahenKu, itehNdu uga latihna ukurku.” (Masmur 31:7) Adi siteh perdiateken Jahwe kita, reh ngasupna kita ngadapi masa-masa si sulit. Tapi situhuna labo itehNa saja kesusahenta. AngkaiNa kai si sangana siadapi lebihen asangken ise pe, janah pegegehiNa kita arah Pustaka si Badia.