Masalah Kesehaten Mental i Sebelang Doni
“Lalap aku kuatir, la pe lit alasenna banci aku kuatir.”
“Adi enggo meriah kel kuakap, dungna kuatir aku. Biasana adi enggo meriahsa kuakap, dungna pasti sedih kel kuakap.”
“Ateku min fokus aku man kai si banci kulakoken bas sada wari e saja. Tapi rempet-rempet banci melala kel si kukuatirken kerna kai si lenga terjadi.”
Bage me si ikataken piga-piga kalak si ngadapi masalah kesehaten mental. Pernah nge bage si gejapkenndu? Ntah lit nge keluarga bage pe temanndu si bage ka gejapkenna?
Adi ue, teklah kam maka labo kam sisada. Gundari, enterem kel kalak si kena dampak masalah kesehaten mental. Banci saja kalak e si ngadapisa, banci ka keluarga ntah pe temanna si ngadapisa.
Gundari kita nggeluh bas “masa si sulit janah bahaya.” (2 Timotius 3:1) Emaka melala kel masalah si erban kita susah. Menurut sada penelitian arah Organisasi Kesehatan Dunia (WHO), kira-kira sada arah waluh kalak bas sebelang doni ngadapi masalah kesehaten mental. Selain si e bas tahun 2020, pandemi COVID-19 erban reh tambahna kalak si kena gangguan kecemasan bage pe depresi berat. Masing-masing jumlahna tambah kira-kira 78 juta kalak nari.
Memang arah data-data e banci siteh enterem kepe kalak si kena masalah kesehaten mental. Tapi si lebih penting eme perlu siteh uga cara ngadapi masalah e alu tepat.
Kai kin kesehaten mental e?
Kalak si mejile kesehaten mentalna, biasana banci lakokenna kegiatenna tiap wari janah meriah ukurna. Kalak si bage banci lakokenna dahinna alu mehuli, ngasup ia ngadapi tekanen, janah puas kapna nandangi kegeluhenna.
Masalah kesehaten mental . . .
-
LABO perban kesalahenna sendiri.
-
EME gangguan kesehaten si erban lebihsa kekuatiren kalak janah erban terganggu cara rukurna, perasanna, bage pe perbahanenna.
-
Banci erban mesera akap kalak e erteman ras kalak si deban janah mesera akapna ngelakoken kegiatenna tiap wari.
-
Banci kena ku ise pe, la soal umurna, budayana, sukuna, agamana, pendidikenna, ntah pe keadan ekonomina.
Ndatken penampat man masalah kesehaten mental
Kalak si kena masalah kesehaten mental, banci saja gejapkenna gejala si bagenda: Rempet berubah perbahanenna, terganggu perpedemna ras perpanna, ntah pe lalap ia kuatir ras sedih. Kalak si bage banci saja perlu penampat medis gelah tehna kai penyebab masalahna janah uga cara ngadapisa.
Jesus Kristus eme kalak si pentarna si pernah nggeluh. Nina, “Kalak si sehat labo perlu dokter, kalak si sakit nge perlu.” (Matius 9:12) Kalak si ngadapi masalah kesehaten mental, banci reh kurangna dampak penakitna e adi alokenna penampat medis. Banci ka reh ngasupna ia ndalani kegeluhenna ras puas ukurna. Emaka adi parah kel gejalana janah enggo ndekah terjadi, seh kel pentingna gelah mis daramina penampat. a
Selain penampat medis, Pustaka si Badia pe banci nampati kalak si kena masalah kesehaten mental. Amin pe Pustaka labo buku kesehaten, nasehatna banci erguna man kalak e. Jadi, kai saja kin nasehatna? Bacalah artikel seterusna si mbahas kerna si e.
a Majalah enda labo mpromosiken jenis pengobaten tertentu. Tiap kalak arus ukurina pengobaten kai si perlukenna.
Mungkin Menarik Ka Kapndu
AJAREN PENTING ARAH PUSTAKA
Engkai Pediat Dibata Mesera Kegeluhen Manusia?
Enterem kel kalak nungkun engkai maka melala kel segat ate ras masalah bas doni enda. Pustaka mereken jawapen si tepat ras erban malem ateta.
KERNA KAMI
Dahi Kenalah Aku
Banci datndu jawapen penungkunenndu arah Pustaka si Badia, janah banci ka pelajarindu terbuen kerna Saksi-Saksi Jahwe.
