Adi lit keluarga ntah pe temanta si kena masalah kesehaten mental, pasti nggit kita nampati kalak e perban ermediate kel kita man bana. Tapi banci saja la siteh uga carana.

“Tiap kalak arus meter megiken.”​—JAKUP 1:19.

Salah sada cara si mehulina guna nampati keluarga ntah pe temanndu eme alu tutus megiken ia sanga cerita tena. Ula kapndu maka arus lit si belaskenndu tiap dung ia ngerana. Banlah gelah itehna maka tutus tendu megiken ia janah peduli kam man bana. Usahakenlah guna ngangkai perasanna. Ula metersa erban kesimpulen janah ula pandangindu ia. Ingetlah maka banci jadi belasina saja ngerana janah dungna menyesal ia.​—Jop 6:2, 3.

“Apuli kalak si kitik ukur.”​—1 TESALONIKA 5:14, cataten i teruh.

Keluarga ntah pe temanndu banci saja kuatir ntah pe la kapna erguna bana. Amin pe la tehndu kai si man katankenndu, sampatilah ia tek maka ermediate kam man bana. E banci ngapuli ras mpegegehi ia.

“Teman situhu-tuhu lalap ncidahken kekelengen.”​—KUAN-KUANEN 17:17.

Ula akapndu enggo tehndu penampat kai si iperluken keluarga ntah pe temanndu. Pangen sungkunindu ia kai si banci sampatindu. Adi mesera akapna ngatakenca kai si  perlukenna, banci ajakndu ia ngelakoken kegiaten si sederhana, contohna erdalan-dalan. Banci ka sampatindu ia belanja, bersih-bersih, ntah pe ngelakoken pendahin si debanna.​—Galati 6:2.

“Sabarlah.”​—1 TESALONIKA 5:14.

Banci saja keluarga ntah pe temanndu labo lalap nggit nuriken uga perasanna. Tapi, katakenlah man bana maka nggit kam megiken ia ndigan pe atena ngerana. Perban penakitna e, banci saja katakenna ntah pe lakokenna kai si erban kam sakit hati. Mungkin batalkenna janjina man bandu ntah pe jadi nukah ia merawa. Adi bage si terjadi, cubakenlah ngangkai ia janah sabarlah kam. Teruslah sampatindu ia.​—Kuan-kuanen 18:24.

“Kuusahaken jadi teman si banci iandalken. Amin pe la kuteh kai jalan keluar masalahna, kuusahaken lalap megiken ia. Mon-mon gelah salang pusuhna, si iperlukenna eme lit kalak si nggit megiken ia.”​—Farrah, a si temanna kena depresi berat, gangguan pola makan, ras gangguan kecemasan.

“Lit sada temanku si seh kel ulina janah lalap pegegehina aku. Ajakna aku man pangan si entabeh ku rumahna. Ia kalakna perkeleng janah banna gelah menukah kuakap nuriken kai pe si lit bas pusuhku. Enda erban aku semangat mulihi!”​—Ha-eun, si kena depresi berat.

“Sipat sabar e seh kel pentingna. Sanga lakoken diberuku kai si erban aku merawa, arus lalap kuinget maka penakitna nge si erban ia bage. Enda nampati aku la merawa janah banci lebih ngangkai ia.”​—Jacob, si diberuna kena depresi berat.

“Lalap aku ipegegehi ras isampati diberuku. Sanga kuatir kel aku, reh kisatku ngelakoken piga-piga kegiaten. Tapi la pernah ipaksa diberuku aku ngelakokenca, amin pe enda erban lanai banci lakokenna kegiaten si meriah akapna. Telap kel kuakap aku perban mehuli kel diberuku janah nggit erkorban.”​—Enrico, si kena gangguan kecemasan.