Pustaka si Badia memang labo buku kesehaten. Tapi nasehat si lit i je banci erguna man kita kerina, termasuk man kalak si kena masalah kesehaten mental. Cuba perdiateken piga-piga contohna.

“Kalak si sehat labo perlu dokter, kalak si sakit nge perlu.”​—MATIUS 9:12.

Ikataken bas Pustaka maka kalak si sakit perlu ndarami penampat medis. Enterem kalak si kena masalah kesehaten mental, tersampati kel kapna sanga datna informasi si tepat kerna penakitna janah datna penampat arah dokter.

‘Latihen gerak badan lit gunana.’​—1 TIMOTIUS 4:8, Pustaka si Badia ras Ende-enden Edisi ke-4 © LAI 2003.

Sigunakenlah waktu ras gegehta guna ngelakoken kai si erban dagingta reh sehatna. Adi sehat dagingta, mentalta pe banci reh sehatna. Emaka teraturlah kita olahraga, sipan pangan si sehat, janah la kita kurang medem.

“Pusuh si senang eme tambar si mejile, tapi ukur si serbut erban bene semangat.”​—KUAN-KUANEN 17:22.

Adi bacandu ayat Pustaka si mpegegehi janah banndu tujun si masuk akal, enda banci erban meriah ukurndu. Adi fokus kam man  kai si mehuli bas geluhndu janah tek kam maka reh ulina nge pagi keadanndu, banci reh tenangna akapndu amin pe sangana kam erjuang ngadapi masalah kesehaten mental.

“Kepentaren lit bas kalak si meteruk ukur.”​—KUAN-KUANEN 11:2.

Banci saja la kam ngasup ngelakoken kerina si lakokenndu atendu. Emaka nggitlah kam ngaloken penampat kalak si deban. Mbelin kemungkinenna, keluarga ras temanndu nggit nampati kam. Tapi banci saja la tehna kai si arus lakokenna. Emaka katakenlah man kalak e kai si perlukenndu. Ula kam kecewa adi kai si lakoken kalak e la bagi ukurndu, tapi lalaplah kam ngata bujur man penampat si berekenna.

“Lit kugejapken si la beres bas aku, emaka kusungkuni dokter. Katakenna man bangku kai situhuna penakitku. Enda nampati aku ngangkai kai kin situhuna masalahku janah banci kuteh pengobaten kai si cocok man bangku.”​—Nicole, a si kena gangguan bipolar.

“Tiap erpagi-pagi, aku ras diberuku ras-ras mbaca Pustaka si Badia. Enda nampati aku mbenai sada wari alu pikiren si positip. Biasana sanga lanai kuakap aku ngasup, lit saja ayat bas Pustaka si banci erban aku semangat mulihi.”​—Peter, si kena depresi.

“Mela kel aku nuriken keadanku man kalak si deban. Tapi lit sada temanku si tutus atena megiken aku janah usahakenna ngangkai keadanku. Sampatina kel aku gelah reh ulina perasanku janah la kuakap aku sisada.”​—Ji-yoo, si kena gangguan pola makan.

“Pustaka si Badia enggo nampati aku gelah seimbang. Emaka lanai aku mbuesa erdahin janah cukup aku istrahat. Reh ngasupna ka aku ngadapi masalah kesehaten mental.”​—Timothy, si kena gangguan obsesif kompulsif.