Benar ras Salah: Biasana Uga Cara Kalak Nentukenca?
Hampir kerina kalak setuju maka lit piga-piga perbahanen si jelas benar ntah pe si jelas salah. Contohna, segat kel ate kalak nandangi pembunuhen, pemerkosan, bage pe pelecehen anak, janah ngena ate kalak sipat si adil, mehuli, ras sepenggejapen. Tapi bas piga-piga situasi, enterem kalak erpengakap maka labo lit pilihen si benar ntah pe si salah. Menurut kalak e, apai pe si ipilih labo masalah. Contohna pilihen kerna hubungen seks, sipat jujur, bage pe cara mpebelin anak. Guna erban keputusen kerna si e, biasana andalken kalak e perasanna ntah pe pendapat kalak si lit i sekelilingna. Tapi bage nge cara si mehulina?
PERASANTA
Sanga siban keputusen, rusur kel siandalken perasanta kerna kai si benar ras si salah. Perasan e igelari pusuh peraten, janah mulai lahir nari pe enggo lit e bas kita. (Roma 2:14, 15) Anak-anak si kitik denga pe banci mbedaken kai si adil ras si la adil, janah banci ka salah kapna bana. Reh dekahna, pusuh peratenta pe ipengaruhi kai si ianggap benar ntah pe salah bas keluargata, kalak si lit i sekelilingta, agamata, bage pe budayata. Sanga siban keputusen, pusuh peratenta banci nampati kita meteh enggo benar ntah lang keputusenta e sesuai ras kai si enggo sipelajari.
Pusuh peratenta banci ngiahken kita gelah sepenggejapen, ncidahken pengatan bujur, adil, bage pe perkuah. Pusuh peratenta pe banci erban kita la sempat ngelakoken kai si erban salah siakap banta, mela, ntah pe nakiti kalak si keleng ateta.
Banci nge lalap siandalken perasanta? Sanga nguda denga, sekalak dilaki si gelarna Garrick erpengakap maka bebas ia ngelakoken kai pe. Tapi bas pudi wari sadar ia maka perban ngikutken perasanna, mbue nanamina akibat si la mehuli. Ceritakenna
maka dungna meriah akapna mabuk-mabuken, ngelakoken perbahanen seks si salah, make narkoba, janah ngelakoken mbue kekerasen.PENDAPAT KALAK SI DEBAN
Selain ipengaruhi perasanta, keputusenta pe banci ipengaruhi pendapat kalak si deban. Sanga siukuri pendapat kalak si deban, banci sidat nasehat arah kalak e ntah pe sibegi pengalamen kalak e. Janah adi siban keputusen si benar iakap keluarga, teman, ntah pe kalak si lit i sekelilingta, iergai kalak e me kita.
Banci nge lalap siandalken pendapat kalak si deban? Sanga nguda denga, sekalak diberu si gelarna Priscila, rusur ngelakoken seks bebas, bagi si ilakoken anak-anak muda si sebaya ras ia. Tapi bas pudi wari sadar ia maka ngikutken pendapat kalak si deban, la erban ia ermeriah ukur. Nina, “Perban kuikut-ikut kalak si deban, dungna mbue kulakoken perbahanen si motu ras bahaya. Si e kerina sitik pe la erban aku puas ras ermeriah ukur.”
LIT NGE CARA SI TERULIN?
Memang perasanta bage pe pendapat kalak si deban banci erguna sanga siban keputusen. Tapi si e duana labo banci lalap iandalken. Mon-mon perban la banci sipastiken kai hasil keputusenta, keputusen e banci saja ngerugiken kita bage pe kalak si deban. (Kuan-kuanen 14:12) Selain si e, amin pe enggo benar siakap sada hal janah kalak si deban pe bage ka pengakapna, pendapat e banci saja salah, janah bas pudi wari banci saja berubah. Contohna, lit piga-piga hal si mbarenda iakap kalak mehangke, gundari iakap kalak biasa saja. Janah lit piga-piga si mbarenda iakap kalak biasa saja, gundari akap kalak lanai pas.
Banci nge lalap siandalken pendapat kalak si deban?
Lit nge petunjuk si terulin si banci siandalken guna nentuken si apai si benar ras si salah? Lit nge petunjuk si banci siikutken gundari si la erban kita menyesal bas pudi wari?
Kepeken lit sada sumber petunjuk si lalap banci iandalken janah erguna man kerina kalak la soal i ja kalak e tading. Si e ibahas bas artikel seterusna.