Benar ras Salah: Petunjuk Ise nge Atendu Ikutkenndu?
Standarta bas nentuken kai si benar ras si salah banci mbelin kel pengaruhna ku kegeluhenta. Iteh Jahwe kerna si e, emaka ateNa gelah siikutken standarNa.
Ate Jahwe dame min geluhta janah meriah ukurta.
“Aku, Jahwe, Aku kap Dibatandu. Si ngajarken kai si mehulina man bandu, Si mabai kam bas dalan si arus dalanindu. Patuh min kam man perentah-perentahKu! Gelah dame si gejapkenndu bagi lau si maler, janah perbahanenndu si benar bagi gelombang laut.”—Jesaya 48:17, 18.
Selaku Penciptata, iteh Dibata kai si erban kita tuhu-tuhu ermeriah ukur. AteNa siikutken petunjukNa perban e erguna man banta. Adi siikutken petunjuk Dibata tiap kita erban keputusen, pasti lalap mehuli hasilna. Kerina keputusenta banci erban dame siakap ras meriah ukurta.
La pernah pindo Jahwe kai si la banci silakoken.
“Perentah-perentah si kupeseh bas wari enda labo meserasa ngangkaisa ras ndalankenca.”—Ulangen 30:11.
Gelah kegeluhenta sesuai ras standar Dibata, banci saja perlu siubah cara rukurta bage pe perbahanenta. Tapi, la pernah pindo Jahwe man banta lebih asa ngasupta. Selaku Penciptata, iangkaiNa kengasupenta. Janah adi sipelajari terbuen kerna Jahwe, banci sigejapken maka “perentahNa e labo mberat.”—1 Johanes 5:3.
Erjanji Jahwe maka pasti sampatiNa kalak si ngikutken standarNa.
“Aku kap Jahwe Dibatandu, si ncikep tan kananndu si ngataken man bandu, ‘Ula mbiar. Kusampati kam.’”—Jesaya 41:13.
Pasti banci siikutken standar Dibata perban sampatiNa kita. Banci sampatiNa kita arah KataNa, eme Pustaka si Badia. Pustaka banci mpegegehi kita ras mereken arapen man banta.
Jutan kalak i sebelang doni enggo nggejapken gunana ngikutken standar Pustaka. Gejapken kalak e maka kegeluhen kalak e reh ulina. Nasehat Pustaka banci ka erguna man bandu. Guna meteh terbuen kerna si e, pelajarilah brosur si erpalasken Pustaka, judulna Ermeriah Ukur Seh Rasa Lalap! Brosur e banci datndu alu la nggalar bas jw.org. Lit telu topik si ibahas bas brosur e:
-
Kai Gunana Pustaka si Badia man Banta?
-
Pustaka si Badia Mereken Arapen man Banta
-
Banci nge Kita Tek man Pustaka si Badia?
Sanga pelajarindu Pustaka, banci gejapkenndu maka Pustaka labo ketadingen jaman. Nasehatna erguna denga seh ngasa gundari bage pe seh “rasa lalap.” (Masmur 111:8) Adi siikutken standar Pustaka, banci kita tuhu-tuhu ermeriah ukur. Tapi, labo ipaksa Dibata kita ngelakokenca. (Ulangen 30:19, 20; Josua 24:15) E pilihen si arus siputusken sekalak-sekalak.
