Benar ras Salah: Petunjuk Pustaka si Badia Banci Iandalken

MAINKEN

Adi perasanta ntah pe pendapat kalak si deban ngenca siandalken sanga erban keputusen si penting, hasilna lenga tentu mehuli. Bas Pustaka ikataken engkai maka si e duana la banci lalap iandalken. Selain si e, bas Pustaka pe lit petunjuk si terteki kerna kai si benar ras si salah. Adi siikutken, e banci tuhu-tuhu erban kita ermeriah ukur ras puas.

PERLU KITA PETUNJUK ARAH DIBATA

Bas Pustaka, Dibata Jahwe a njelasken maka jelma perlu petunjukNa janah la banci andalken kalak e dirina sendiri. (Jeremia 10:23) Perban si e, arah Pustaka ibereken Dibata petunjuk kerna kai si benar ras si salah. Keleng ateNa jelma janah la ateNa siban keputusen si la mehuli si banci ngerugiken kita ras erban kita susah. (Ulangen 5:29; 1 Johanes 4:8) Selain si e, selaku Pencipta, Dibata pasti seh kel pentarna, janah banci berekenNa kita petunjuk si mehulina. (Masmur 100:3; 104:24) Amin pe bage, la pernah paksaNa jelma guna ngikutken petunjukNa.

Sanga iciptaken Jahwe dilaki ras diberu si pertama eme Adam ras Hawa, iberekenNa mbue si mehuli si banci erban kalak e tuhu-tuhu ermeriah ukur. (Kejadin 1:28, 29; 2:8, 15) Ibereken Dibata ka man kalak e piga-piga petunjuk gelah ikutken kalak e. Tapi, la ipaksaNa kalak e guna ngikutkenca. IbereNa kalak e kebebasen guna milih. (Kejadin 2:9, 16, 17) Sayangna, ipilih Adam ras Hawa guna ngikutken standarna sendiri, labo standar Dibata. (Kejadin 3:6) Kai hasilna? Banci nge manusia ermeriah ukur adi kalak e sendiri si nentukenca kai si benar ras si salah? Lang. Sejarah mbuktiken maka jelma la banci tuhu-tuhu dame ras ermeriah ukur adi la ikutkenna petunjuk Dibata.—Pengerana 8:9.

Bas Pustaka lit petunjuk si banci nampati kita erban keputusen si mehuli, la soal uga latar belakang keluargata ntah pe i ja kita tading. (2 Timotius 3:16, 17; nen kotak “ Buku man Kerina Kalak.”) Petunjuk kai saja nge si ibereken Pustaka?

Cubalah darami kai buktina maka Pustaka rehna “arah Dibata nari.”—1 Tesalonika 2:13. Tontonlah video Ise Pengarang Pustaka si Badia? bas jw.org.

ENGKAI MAKA LIT KALAK SI LA TEK MAN PUSTAKA SI BADIA?

Lit si erpengakap petunjuk si lit bas Pustaka si Badia la banci iandalken. Bagenda piga-piga si ikataken kalak e.

Nina kalak: “Lit ayat-ayat bas Pustaka si ertentangen.”

Faktana: Memang lit piga-piga ayat bas Pustaka si tempa-tempa ertentangen ras ayat si debanna. Tapi adi sipereksa konteksna, fakta sejarah, budaya bas jaman Pustaka, ise penulisna, bage pe si debanna, banci siidah maka situhuna ayat-ayat e la ertentangen.

Guna ngenen piga-piga contohna, bacalah artikel “Apakah Isi Alkitab Saling Bertentangan?” bas jw.org.

Nina kalak: “Kalak si ngaku ngikutken Pustaka malahen ngelakoken melala si la mehuli. E ertina, Pustaka la banci nampati kalak guna ngelakoken kai si mehuli.”

Faktana: Lakoken kalak kai si la mehuli perban la ikutkenna kai si ajarken Pustaka, emaka labo Pustaka si salah. Mbarenda nari enggo ikataken Pustaka maka enterem pagi kalak si ngaku ngikutken Pustaka, tapi ngelakoken perbahanen si la sesuai ras ajaren Pustaka. Enda termasuk peminpin agama. Menurut Pustaka, perbahanen kalak e erban ajaren Pustaka “ihina.”—2 Petrus 2:1, 2.

Guna ngenen sada contoh kerna uga perbahanen peminpin agama si la sesuai ras ajaren Pustaka, bacalah artikel “Tuhu kin Agama Enggo Jadi Ingan Ndarami Sen?” bas jw.org.

Nina kalak: “Kalak si ngikutken Pustaka la ngergai kalak si beda ras ia.”

Faktana: Pustaka ngiahken kita gelah ngergai kalak si deban. Bas Pustaka iajarken gelah ula. . .

ganjangen siakap kita asangken kalak si deban.—Pilipi 2:3.
sirendahken kalak si deban si beda pendapatna ntah pe kinitekenna ras kita. —1 Petrus 2:17.
sipaksa kalak si deban gelah setuju ras pendapatta.—Matius 10:14.

Arah Pustaka banci siteh maka lalap mehuli ras adil perbahanen Dibata man manusia. (Roma 9:14) Ikataken Pustaka maka ate Dibata kita pe bage.

Guna ndatken terbuen informasi, bacalah artikel “Alkitab Bisa Membantu Kita Memiliki Toleransi” bas jw.org.

PETUNJUK KAI SI IBEREKEN DIBATA BAS PUSTAKA SI BADIA?

Bas Pustaka banci sibaca cataten kerna hubungen antara Dibata ras jelma mulai kin tangtangna jelma iciptaken. Adi sibaca Pustaka, banci siteh kai si ianggap Dibata benar ras salah, bage ka pe kai si ianggapNa erguna ras bahaya man jelma. (Masmur 19:7, 11) Amin pe jaman terus berubah, petunjuk arah Pustaka lalap banci iandalken. Adi siikutken, pasti banci kita erban keputusen-keputusen si pentar ntah pe bijaksana.

Salah sadana eme petunjuk si lit bas Kuan-kuanen 13:20, “Kalak si erteman ras kalak pentar jadi pentar, tapi kalak si erteman ras kalak si motu pasti pagi kena cilaka.” Amin pe enggo ndekah kel itulis, kata-kata e erguna denga man banta gundari. Pustaka dem alu petunjuk si erguna.—Nen kotak “ Petunjuk bas Pustaka si Badia Lalap Erguna.”

Tapi mungkin rukur kam, ‘Tuhu nge petunjuk bas Pustaka erguna man bangku gundari?’ Bas artikel berikutna ibahas manpaat si enggo igejapken piga-piga kalak perban ngikutken petunjuk Pustaka.

a Jahwe eme gelar Dibata.—Masmur 83:18.

PETUNJUK BAS PUSTAKA SI BADIA LALAP ERGUNA

Pustaka dung itulis kira-kira 2.000 tahun si lewat, tapi isina erguna denga ngasa gundari. Mbarenda nari seh ngasa gundari, sura-sura jelma seri denga eme gelah puas geluhna ras meriah ukurna. (Pengerana 1:9) Petunjuk bas Pustaka banci nampati kita ndatken si e.

Sipat Jujur

“Ersura-sura kami gelah jujur bas kai pe.”—Heber 13:18.
“Kalak si nangko ula nai nangko. Tutuslah tena erdahin.”—Epesus 4:28.

Hubungenta ras Kalak si Deban

“Tiap kalak arus min ngukuri kepentingen kalak si deban, labo kepentingenna saja.”—1 Korinti 10:24.
“Kena arus tetap sabar janah alu bulat ukur ampunilah sada ras si debanna.”—Kolose 3:13.

Erban Keputusen

“Kalak si la erpengalamen, tek man kerina ranan, tapi kalak si cerdik, ukurina tiap langkahna.”—Kuan-kuanen 14:15.
“Kalak cerdik cebuni adi idahna bahaya, tapi kalak si la erpengalamen teruskenna erdalan dungna datna akibatna.”—Kuan-kuanen 22:3.

SORA ERMOMO