1. Perjabun

Beda-beda pendapat kalak kerna perjabun ras kerna kai si banci erban perjabun ermeriah ukur.

ERTINA: Perjabun eme pengaturen si iban Dibata, emaka tehNa kai si banci erban perbulangen ras ndehara ermeriah ukur. (Markus 10:​6-9) Banci kalak e ermeriah ukur adi la fokus man kai si banci datna arah perjabun, tapi fokus man kai si banci berekenna bas perjabun gelah paguh perjabunna. Perbulangen arus mehuli man ndeharana, ermediate, janah berekenna keperlun ndeharana. Sekalak ndehara arus mehamat man perbulangenna arah ranan bage pe perbahanenna.

PETUNJUK PUSTAKA SI BADIA ERGUNA: Quang ras Thi arah Vietnam, pernah nggejapken maka perjabun kalak e la ermeriah ukur. Rusur la mehuli perbahanen Quang man Thi. Nina Quang, “Sanga si e la diateku perasan Thi, janah rusur kuban ia sakit hati.” Emaka sempat cerai ate Thi. Nina Thi, “Lanai kuakap aku banci tek man perbulangenku ntah pe mehamat man bana.”

Bas pudi wari Quang ras Thi erlajar Pustaka, janah usahaken kalak e ngikutken nasehat bas Epesus 5:33. Nina Quang, “Kenca mpelajari ayat e, sadar aku maka perlu mehuli perbahanenku man ndeharaku. Perlu ka gejapkenna maka keleng ateku ia, janah perlu kubereken kebutuhenna secara materi, jasmani ras emosi. Sanga kulakoken si e, reh kelengna ate Thi aku janah reh mehamatna ia man bangku.” Nina Thi, “Kenca kuikutken nasehat bas Epesus 5:33 janah lebih mehamat aku man perbulangenku, ia jadi perbulangen si reh ulina. Banci kugejapken reh kelengna atena aku, aman kuakap, janah reh tenangna aku.”

 2. Perbahanenta man Kalak si Deban

Biasana, la mehuli perbahanen kalak man kalak si deban perban beda sukuna, bangsana, penampilenna, ntah pe agamana.

ERTINA: La pernah iajarken Pustaka gelah segat ateta kalak arah bangsa ntah pe suku si deban. Sebalikna, inasehati Pustaka kita gelah siergai kerina kalak la soal kai sukuna, bangsana, bage pe situasi ekonomina. (Perbahanen Rasul-Rasul 10:34) Banci saja la kita setuju nandangi pendapat ntah pe perbahanen kalak si deban, tapi banci denga mehuli kita man bana janah siergai ia.—Matius 7:12.

PETUNJUK PUSTAKA SI BADIA ERGUNA: Mbarenda, Daniel iajari maka kalak arah Asia eme ancamen man negarana. Emaka segat atena kerina kalak Asia si jumpa ras ia, janah rusur hinana kalak e i lebe-lebe jelma si enterem. Nina Daniel, “Kuakap perbahanenku e ndukung negaraku. Janah la pernah salah kuakap caraku rukur e bage pe perbahanenku e.”

Bas pudi wari, Daniel erlajar Pustaka. Nina, “Arus tuhu-tuhu kuubah caraku rukur. Adi bas Dibata kerina jelma seri la soal ja nari asalna. Arus kuusih cara rukur Dibata e.” Gundari, uga perasan Daniel nandangi kalak si deban? Nina, “Lanai kuakap masalah ja nari asal kalak. Gundari, keleng ateku kerina kalak janah mbue temanku arah erbage-bage negara.”

 3. Sen

Enterem kalak usahakenna jadi kalak bayak perban merhat kalak e ermeriah ukur janah terjamin masa depanna.

ERTINA: Memang perlu kita sen, tapi e labo jadi jaminen pasti meriah ukurta janah terjamin masa depanta. (Kuan-kuanen 18:11; 23:​4, 5) Banci kita tuhu-tuhu ermeriah ukur janah terjamin masa depanta, adi siikutken petunjuk Dibata si lit bas Pustaka.—1 Timotius 6:​17-19.

PETUNJUK PUSTAKA SI BADIA ERGUNA: Cardo, sekalak dilaki arah Indonesia, mbarenda fokus ngayaki kebayaken. Nina, “Banci kudat kerina si merhat kalak ndatkenca. Banci aku dalan-dalan, banci ka kutukur barang si merga, janah lit piga-piga motor ras rumahku.” Tapi kebayakenna e la ndekah tahan. Nina Cardo, “Tipu kalak aku, janah sen si kupepulung ertahun-tahun dekahna, rempet bene. Mbarenda, sibuk aku ngayaki kebayaken, tapi dungna kecewa aku janah la kuakap aku erguna.”

Bas pudi wari, mulai ikutken Cardo nasehat Pustaka kerna sen. Iputuskenna guna nggeluh sederhana janah lanai fokus ngayaki kebayaken. Nina, “Gundari, banci aku erteman ras Dibata, janah e me erta si labo banci ndigan pe bene. Banci entabeh perpedemku tiap berngi, janah meriah kel ukurku.”

 4. Seks

Erbage-bage pendapat kalak kerna perbahanen seks si banci ntah lang ilakoken.

ERTINA: Menurut Pustaka, la banci ate-ateta memuasken sura-sura seksta. La banci silakoken “perbahanen seks si salah.” E termasuk erlua-lua, pelacuren, hubungen seks antara dua kalak si lenga erjabu, hubungen seks sesama jenis, bage pe hubungen seks ras binatang. (1 Korinti 6:​9, 10) Hubungen seks eme pemere arah Dibata janah ateNa gelah e ilakoken sada dilaki ras sada diberu si enggo ipersada bas perjabun.—Kuan-kuanen 5:​18, 19.

PETUNJUK PUSTAKA SI BADIA ERGUNA: Kylie, sekalak diberu si tading i Australia ngataken, “Sanga singuda-nguda denga aku, kuakap adi erhubungen seks aku, pasti aman janah ikelengi kuakap aku. Tapi si terjadi malah sebalikna. Rusur aku kuatir janah la meherga kuakap bangku.”

Bas pudi wari, erlajar Pustaka Kylie janah mulai ikutkenna petunjuk Pustaka kerna seks. Nina, “Banci kugejapken maka standar Dibata situhuna ngelindungi kita arah akibat si la mehuli ras perasan sakit hati. Gundari kenca kuikutken standar Jahwe, tenang kuakap janah ikelengi kuakap aku. Alu ngikutken petunjuk Pustaka, banci aku terlindungi arah melala masalah.”