Pustaka si Badia labo buku si biasa. Buku e risiken pedah i bas Si Nepata nari. (2 Timotius 3:16) Mbelin kal pengaruh isina man banta. Situhuna, Pustaka ’Kata Dibata si nggeluh dingen erdahin’. (Heber 4:12) Pustaka erban kegeluhenta reh ulina alu dua cara—negu-negu kita tiap wari ras nampati kita meteh kerna Dibata ras janjiNa.​—1 Timotius 4:8; Jakup 4:8.

Erbahan kegeluhenndu reh ulina gundari. Pustaka banci nampati kita sekalak-sekalak. Pedah e erguna i bas:

•   Hubungenta ras kalak si deban.​—Epesus 4:31, 32; 5:22, 25, 28, 33.

• Perukuren ras kesehaten daging.​—Masmur 37:8; Kuan-kuanen 17:22.

• Nilai moral.​—1 Korintus 6:9, 10.

• Kegeluhen si jore.​—Kuan-kuanen 10:4; 28:19; Epesus 4:28. *

Pasangen si nguda denga i Asia ngergai pedah Pustaka. Bagi piga-piga pasangen si mbaru erjabu, kalak enda erjuang guna nyesuaiken sifat sada ras si debanna bage pe ngerana alu terus terang. Tapi ibenaina alu ndalanken pedah i bas Pustaka. Kai ulihna? Sekalak perbulangen, Vicent, ngataken, ”Kai si kuoge i bas Pustaka nampati aku ndungi persoalen i bas perjabun kami alu cara kekelengen. Ngikutken pedah Pustaka erban kami ermeriah ukur.” Ndeharana, Annalou pe ngataken, ”Ngoge usihen i bas Pustaka nampati kami. Gundari meriah janah puas kuakap i bas perjabun kami, janah ndatken tujun nggeluh.”

Nandai Dibata. Selain si ituriken ndai, ikataken Vicent ka, ”Alu ngoge Pustaka, reh rembakna aku ras Jahwe gundari.” Maksud Vicent—Pustaka banci nampati kam nandai Dibata. Jadi, labo saja idatndu manfaat arah pedahNa, tapi reh rembakna ras Dibata. Janah ijanjiken Dibata kerna wari si pepagi si mehuli, si banci inanamindu i bas ”kegeluhen si tuhu-tuhu”—si la erkeri-kerin. (1 Timotius 6:19) Enda ituriken i bas Pustaka ngenca.

Adi ibenakenndu ngoge Pustaka janah terus iogendu, kegeluhenndu reh ulina janah itandaindu Dibata. Asum iogendu Pustaka, banci saja melala penungkunenndu. Adi bage, ingetlah usihen arah sekalak menteri Etiopia si nggeluh 2.000 tahun si lewat. Melala kal penungkunenna. Paksa isungkun kerna iangkaina ntah lang si iogena e, nina, ”I ja ka nge banci kuangka, adi la lit kalak si nerangkenca man bangku?” * Meriah kal ukurna ngaloken penampat Pilipus, ajar-ajar Jesus si perlebe. (Perbahanen Rasul-Rasul 8:30, 31, 34) Bage ka pe, adi nggit kam meteh terbuen kerna Pustaka, kirimken pemindonndu ku www.pr418.com/btx ntah pe kirimken surat ku alamat si ndeherna si lit i majalah enda. Banci ka ihubungindu Saksi-Saksi Jahwe ntah pe ndahi Bale Kinirajan i bas daerahndu. Buatlah Pustakandu gundari, ogelah, janah pediat pedahna si negu-negu kam ku kegeluhen si reh ulina.