ENOH ndekah kal nggeluh. Banci saja mesera siakap mbayangken dilaki si nggeluh ngayak 365 tahun, empat kali lipat umur kalak si nggeluh gundari! Tapi i jamanna, Enoh e lenga metuasa kal. Lebih 50 abad si lewat, umur jelma nggeluh ndauh gedangen asangken gundari. Manusia si pemena, Adam, nggeluh lebih enem ratus tahun paksa Enoh tubuh, janah Adam umurna lebih telu abad nari ka! Piga-piga kesusuren Adam nggeluh terdekahen ka. Jadi i bas umur 365 tahun, Enoh megegeh denga janah melala si banci ilakokenna. Tapi sayangna la bage.

Enoh lit i bas bahaya. Bayangken, ia paksana cebuni gelah la idah kalak si ersegat ate man berita si ipesehna i bas Dibata nari. Ayo kalak e gesteng janah merawa. Igombangina berita e bage pe Dibata si nuruh Enoh. La banci iserangna Jahwe, Dibata si nuruh Enoh, tapi banci iserangna Enoh! Iukurina nge kerna ndeharana, anakna si diberu, ntah si dilaki, Metusalah, ntah pe Lameh, kempuna? Banci saja iakap Enoh maka lanai ia jumpa ras keluargana. (Kejadin 5:21, 23, 25) Bage nge kedungenna?

Enoh, la terberita i bas Pustaka. Telu bagin ngenca si njelasken kerna ia. (Kejadin 5:21-24; Heber 11:5; Judas 14, 15) Tapi ayat e jadi keterangen kerna kinitekenna si paguh. Kepala keluarga nge kam? Pernah nge mesera kapndu gelah tetap ngelakoken si benar? Adi bage, banci pelajarindu usihen Enoh nari.

Manusia seh kal jahatna i bas jaman Enoh. E terjadi i bas kesusuren pepituken mulai Adam nari. Manusia ndeher denga ras kesempurnan si inanami Adam ras Hawa. Emaka umur kalak e gedang. Tapi, hubungenna ras Dibata nggo ceda. I ja pape lit kekerasen. Enda ibenaken i bas kesusuren si peduaken, paksa Kain munuh agina, Abel. Lit sada kesusuren Kain si tual perban kejamen janah lebih pendendam asangken Kain! I bas kesusuren si peteluken, lit ka kejahaten si mbaru. Gelar Jahwe ihina janah la ihamati.​—Kejadin 4:8, 23-26.

Penembahen si salah seh kal buena i jaman Enoh. Kenca Enoh reh belinna, arus ibanna keputusen. Ikutina nge jelma si nterem? Ntah idaramina Dibata si benar, Jahwe, Si  Nepa langit ras doni? Pasti kena kal ku pusuhna ngukuri kerna Abel, si mate selaku martir erkiteken nembah Jahwe alu cara si benar. Enoh pe ngusih Abel. Kejadin 5:22 ngataken, ”Enoh nggeluh i bas persadan ras Dibata.” Luar biasa kal usihen si ibereken Enoh selaku sekalak dilaki si erkiniteken i bas doni si jahat. Ia me dilaki si pemena si ituriken bage bas Pustaka.

Kenca tubuh anak Enoh, eme Metusalah, Enoh terus erdalan ras Jahwe. Jadi, Enoh erjabu paksa umurna 65 tahun. La ituriken Pustaka gelar ndeharana, janah la ituriken piga anakna si dilaki ras si diberu. Adi sekalak perbapan erdalan ras Dibata, pasti iurusna keluargana sue ras cara Dibata. Iangkai Enoh maka iarapken Jahwe gelah ia setia man ndeharana. (Kejadin 2:24) Enoh pe ngelakoken si mehulina guna ngajarken anak-anakna kerna Jahwe. Kai asilna?

La ituriken Pustaka terbagesen. La lit ituriken kerna kiniteken Metusalah, anak Enoh, si meganjangna umurna bas Pustaka, si mate bas tahun terjadina Banjir si Mbelin. Tapi, Lameh eme anak Metusalah. Lameh nggeluh sejaman ras nini bulang Enoh lebih sada abad. Lameh jadi kalak si erkiniteken. Isuruh Jahwe ia ernubuat kerna Nuah, anakna, janah nubuat e terjadi. Nuah pe erdalan ras Dibata bagi bulangna, Enoh. Nuah la pernah jumpa ras Enoh. Tapi, itadingken Enoh warisen si meherga. Nuah erlajar arah Lameh, bapana, ntah pe arah bulangna, Metusalah, banci ka arah Jaret, bapa Enoh, si mate paksa umur Nuah 366 tahun.​—Kejadin 5:25-29; 6:9; 9:1.

Enoh beda kal ras Adam. Aminna pe Adam serta, ia erdosa janah nadingken kiniseran ras pemberontaken. Enoh si la serta, erdalan ras Dibata janah iwariskenna kiniteken. Adam mate sanga umur Enoh 308 tahun. Paksa Adam selaku nini bulang si mentingken bana e mate, ceda nge ukur keluargana? La sieteh. Si pastina, Enoh ”tetap ia erdalan i bas dalan Dibata”.​—Kejadin 5:24.

Selaku kepala keluarga, ukuri kai si banci ipelajari bas kiniteken Enoh. Memang penting cari makan man keluarga, tapi si pentingna eme keperlun rohani. (1 Timotius 5:8) Labo cakap saja, tapi perbahanenndu pe. Adi iusihndu Enoh, ipediatndu Kata Dibata si negu-negu kam, kam pe banci mereken warisen si meherga si man usihen.

Banci saja melungen iakap Enoh perban ia ngenca si erkiniteken i bas doni si jahat. Teh Jahwe nge? Pasti. Ngerana Jahwe man ia. IsuruhNa Enoh mpeseh berita man nterem jelma bas jamanna. Menurut Pustaka, itangkuhken Dibata me Enoh jadi nabi si pemena.  Enda sieteh arah Judas nari, senina tiri Jesus, si ratusen tahun kenca si e nulisken nubuat Enoh. *

Kai si inubuatken Enoh? Eme, ”Nehenlah! Reh me [Jahwe] ras meribu-ribu malekatNa si badia; iadiliNa me kerina jelma guna ngukum kerina kalak perdosa si la ngakui Dibata erkiteken perbahanen-perbahanenna si ngelawan Dibata ras kerina cakap si ibelaskenna nimbak Dibata!” (Judas 14, 15) Si tangtangna mungkin iukurindu, eme Enoh ngerana bas masa si nggo lewat, si tempa-tempa nggo igenepi. Enda jadi usihen man nubuat si debanna. Intina: Sekalak nabi ngerana kerna kai si pasti terjadi janah tempa-tempa nggo terjadi!​—Jesaya 46:10.

Uga nge perasan Enoh mpeseh momo e? Tangkas dingen tegas kal momo enda, ipersingetina alu keras ”kalak perdosa”, kalak ”si ngelawan”, ras si ”nimbak Dibata” i bas lagu langkahna e. Nubuat e mpersingeti kerina manusia maka doni reh jahatna kenca manusia ipelawes arah peken Eden. Enda kerina idungi paksa reh Jahwe ras ”meribu-ribu malekatNa si badia” i bas barisen perang si ratur. Alu la mbiar, imomoken Enoh sisada! Lameh si nguda denga banci saja sempat ngenehen bulangna si perpang enda. Emaka siangkai ngkai maka Lameh pe la mbiar.

Kiniteken Enoh ngiahken kita gelah ngenehen doni enda bagi cara Dibata. Berita penghakimen si imomoken Enoh alu pang terus iberitaken seh asa gundari. Bagi penginget Enoh, iban Jahwe Banjir si Mbelin guna ngkernepken kalak si jahat i jaman Nuah. Pengkernepen enda jadi contoh man pengkernepen si terbelinen si nandangi reh. (Matius 24:38, 39; 2 Petrus 2:4-6) Bagi mbarenda, gundari pe Dibata nggo ersikap ras meribu-ribu malekatNa si badia guna nghakimi doni si jahat e. Arus siperdiateken persinget Enoh janah mberitakenca man si deban. Banci saja isirangken keluarga ras teman-temanta kita. Maun-maun sisada siakap banta. Tapi Jahwe la pernah nadingken Enoh; gundari pe juak-juakNa si erkiniteken labo itadingkenNa!

Uga kedungen geluh Enoh? Kematenna ndauh lebih misterius asangken kegeluhenna. Buku Kejadin nuriken, ”Kidekah geluhna tetap ia erdalan i bas dalan Dibata, tapi dungna lanai ia teridah perbahan iangkat Dibata ia.” (Kejadin 5:24) Kai maksudna iangkat Dibata ia? Ijelasken rasul Paulus, ”Perban erkiniteken, Enoh ipindahken Dibata gelah la ngidah kematen, janah ise pe la banci njumpai ia sabap ia enggo ipindahken Dibata; ope denga Enoh ipindahken, ialokenna pengenehenen maka enggo isenangkenna Dibata.” (Heber 11:5, Terjemahan Dunia Baru) Kai maksudna ”ipindahken Dibata gelah la ngidah kematen”? Piga-piga terjemahen Pustaka ngataken maka Enoh iangkat Dibata ku surga. Tapi enda labo tuhu. Pustaka ncidahken maka Jesus Kristus jadi kalak si pemena ipekeke ku surga.​—Johanes 3:13.

 Kai maksudna Enoh ”ipindahken” maka ”la ngidah kematen”? Jahwe mindahken Enoh i bas keadan si nggeluh nari ku kematen, gelah la ngenanami kiniseran ope lenga mate. Tapi nggo ”ialokenna pengenehenen maka enggo isenangkenna Dibata”. Ja nari sieteh? Ope mate, ialoken Enoh pengenehenen kerna Pardis i doni. Alu pengenehenen si ncidahken maka ialoken Dibata ia, Enoh medem bas kematen. Enoh bage pe kalak si erkiniteken si debanna, itulisken rasul Paulus, ”kerina kalak enda mate i bas kiniteken.” (Heber 11:13) Musuh-musuh Enoh banci saja ndarami maitna, tapi ”ise pe la banci njumpai ia” perban ibeneken Jahwe maitna, gelah ula isalahgunaken ntah pe mpebelang penembahen si salah. *

Arah ayat e, banci siukuri uga kemungkinen kematen Enoh. Mungkin bagenda: Enoh sangana kiam, dungna latihsa kapna. Kalak si nentang ngayaki ia alu merawa erkiteken berita penghakimenna e. Idat Enoh ingan cebuni janah ngadi ia kentisik, tapi tehna la ia banci ndekah cebuni. Kematenna nggo reh deherna. Ertoto ia tupung ngadi. Igejapkenna kedamen si mbages. Asum si e, Enoh ibaba ku bas sada pengenehenen.

Bayangken idahna keadan doni si beda kal. Idahna Peken Eden si seh kal jilena, janah lanai lit kerubim si ngambati manusia masuk. Enterem dilaki ras diberu si sehat janah nguda i je. Nggeluh alu dame. Lanai lit segat ate, bage pe umat Dibata si ianiaya bagi Enoh. Igejapken Enoh jaminen, kekelengen, ras ngena ate i bas Jahwe nari. Tek ia maka eme inganna tading. Reh dekahna reh bagesna igejapkenna kedamen, asum si e, itutup Enoh matana janah medem ia alu la ernipi.

Gundari medem denga Enoh bas kematen. Ia terus iinget Jahwe! Bagi si ijanjiken Jesus kenca si e, reh me paksana maka kerina kalak mate si lit bas ingeten Dibata megi sora Kristus janah ndarat i bas kuburen nari, ngenehen doni mbaru si mejile janah dem alu kedamen.​—Johanes 5:28, 29.

Nggit nge kam nggeluh i bas Pardis? Banci kam jumpa ras Enoh. Ukuri uga riahna erlajar arah ia! Ipastikenna pagi kai si nggo sieteh kerna kedungen kegeluhenna. Tapi gundari lit si arus sipelajari arah ia. Kenca njelasken kerna Enoh, ikataken Paulus, ”Ise pe la ngasup ndalanken si sentudu ras peraten Dibata adi la kin erkiniteken.” (Heber 11:6) Hebat kal kiniteken ras kinipangen Enoh si banci siusih!