Bosan? Ntah meriah? Uga penggejapenndu? E tergantung carandu ngogesa. Mari sinehen kai si banci erban reh riahna akapndu ngoge Pustaka si Badia.

Pilih terjemahen si iangkaindu janah terteki. Adi iogendu ogen si cakapna ketadingen jaman si la iantusindu, enda erbanca kisat kam ngogesa. Emaka, pakelah Pustaka si cakapna menukah ngangkaisa gelah kena ku pusuhndu. Pastiken ka terjemahenna benar ras lengkap. *

Gunaken teknologi. Gundari, Pustaka lit i bas bentuk digital, labo bas bentuk tercetak saja. Lit si banci ioge arah internet ntah i-download arah komputer, tablet, ntah handphone. Lit ka aplikasi tambahen si banci alu meter meriksa ayat Pustaka si deban si topikna seri ntah mbandingken piga-piga terjemahen. Adi riahen kapndu megi-megi asangken ngoge, lit ka bentuk rekamen sora. Enterem kalak meriah akapna megikenca paksa i bas motor sewa, nuci, ntah pe dahin si debanna. Cubakenlah cara si cocok akapndu.

Gunaken alat bantu. Alat bantu e banci nampati kam ndatken terbuen manfaat i bas pengogenndu. Lit peta kerna negeri si  ituriken bas Pustaka gelah ietehndu daerah e janah ibayangkenndu. Artikel i bas majalah enda ntah i bas Web jw.org bagin ”Ajaran Alkitab” banci nampati kam meteh bagin si debanna arah Pustaka.

Ban alu erbage cara. Adi mberat akapndu ngoge Pustaka per buku, cubakenlah menaisa alu ngoge topik si menarikna akapndu. Adi atendu nandai kalak si terberita i bas Pustaka, banci ipegermetkendu biak-biakna. Contohna lit i bas kotak ” Nandai Terbagesen Tokoh-Tokoh i bas Pustaka si Badia”. Ntah pe ngoge alu per topik bage pe per peristiwa. Cubakenlah salah sadana.