Aku tubuh i Paddington, bas London, Inggris. Aku tading ras nandeku bage pe telu kakaku. Erkiteken bapaku pemabuk, la diatena kegeluhen kami.

Paksa kitik, iajari nandeku ertoto tiap berngi. Lit Pustakaku risiken buku Masmur saja, kuban jadi lagu gelah banci kuendeken. Terus kuinget kata-kata i bas sada buku, ”Lit pagi wari si paginna lanai lit.” Kata-kata e erban aku la banci tunduh taren ngukuri wari si pepagi. Kuukuri, ’Pasti lit kegeluhen si terulin, jadi ngkai aku lit i jenda?’ La aku nggit mate!

Merhat kal aku meteh kerna begu-begu. Kucubaken ngerana ras kalak mate, ndahi kuburen janah nonton film begu-begu ras teman sekolah. Mbiar nge kami tapi meriah ka kap kami.

Mulai aku gutul paksa umur sepuluh tahun. Mulai ngisap janah candu. Kenca e, ngisap ganja. Umur 11 tahun, kucubaken minem alkohol. Aminna la kuakap ntabeh, tapi meriah kuakap mabuk. Meriah kuakap musik ras landek-landek. Lit kenca waktuku, mis aku lawes ku klub malam. Lawes paksa berngi janah mulih ope lenga terang alu erbuni-buni. Perban latihsa, paginna cabut aku arah sekolah. Bas sekolah pe, mabuk ka aku kelang-kelang pelajaren e.

Nilaiku si mejinna sanga naik kelas. La isangka nandeku maka lebih kal gutulku, kecewa janah merawa kal ia. Rubati kami, dungna kiam aku rumah nari. Emaka tading aku ras rondongku, Tony, umat Rastafari. Ia ikut bas geng preman, ndayaken narkoba, janah jahat. Aku pe nggo mupus paksa umurku 16 tahun.

Aku tading i bas sada ingan khusus si ibereken pemerentah setempat man pernanden si lenga erjabu bage pe anakna, i je me tangtangna aku jumpa ras  Saksi Jahwe. Dua Saksi Jahwe si diberu rusur ndahi pernanden si deban. I bas sada wari, ikut aku ercakap-cakap ras kalak e gelah kubuktiken ateku ajaren Saksi Jahwe e salah. Tapi, ijabapna kerina penungkunenku alu tenang janah tangkas arah Pustaka. Kalak e mehuli kal janah lembut, eme si erbanca aku tertarik. Emaka, nggit aku erlajar Pustaka ras kalak e.

Mis kupelajari topik bas Pustaka si ngobah kegeluhenku. Kitik-kitikku nari mbiar kal aku mate. Tapi gundari kuangkai ajaren Jesus kerna kinikeken! (Johanes 5:28, 29) Kueteh ka maka ermediate kal Dibata man bangku. (1 Petrus 5:7) Kena kal ku pusuhku kata-kata bas Jeremia 29:11, ”’Aku ngenca meteh sura-surangku nandangi kam, eme gelah kam senang labo gelah cilaka. RencanangKu eme mereken wari si pepagi bagi si iarapkenndu.’” Mulai aku tek, nandangi arapen nggeluh si rasa lalap bas Pardis i doni enda.​—Masmur 37:29.

Icidahken Saksi Jahwe kekelengen situhu-tuhu man bangku. Tangtangna reh ku perpulungen, ialo-alo kal aku—kerinana mekacar! (Johanes 13:34, 35) Pengalo-ngalo Saksi Jahwe beda kal ras gereja si deban. Ialoken Saksi Jahwe aku ugapa pe keadanku. Iberena waktuna, penampat, janah ermediate. Kugejapken lit bas bagin keluarga si dem alu kekelengen.

Arah Pustaka si kupelajari, kusadari maka arus kuban perobahen i bas kegeluhenku gelah sentudu ras patoken moral Dibata. Mesera kal kuakap ngadi ngisap. Kueteh ka lit musik si menukah ngiahken aku ngisap ganja, emaka kuganti musikku. Gelah la mabuk, lanai kudahi klub malam ntah pe pesta-pesta ingan kalak mabuk. Kupilih teman-temanku si mbaru si mereken pengaruh si mehuli guna nampati aku i bas kegeluhenku si mbaru.​—Kuan-kuanen 13:20.

Tony pe dungna erlajar Pustaka ras Saksi Jahwe. Tek ia man kebenaren erkiteken ijabap Saksi Jahwe kerina penungkunenna arah Pustaka. Tuhu-tuhu kal ia robah. Ndarat ia i bas geng preman nari, lanai jahat janah ngadi ngisap ganja. Guna erban Jahwe ermeriah ukur, iubah kami kegeluhen kami jadi mehuli janah iban kami lingkungen si sikap man anak-anak kami. Dungna isahken kami perjabun kami tahun 1982.

Kuinget artikel i bas majalah Sora Ermomo ras Sadarlah! * kerna pengalamen nggeluh si bagi aku si dungna robah. Teriahken kal aku kerna usihen kalak enda! Ipegegehi aku guna erjuang janah la nerah. Ertoto aku gelah isampati Jahwe. Tony ras aku iperidiken jadi Saksi Jahwe i bas Juli 1982.

Terus erteman ras Dibata Jahwe nelamatken kegeluhenku. Aku ras Tony nggejapken penampat Jahwe paksa mesera. Kami erpengendes man Dibata paksa susah janah terus igejapken kami penampatNa.​—Masmur 55:23.

Meriah ukurku banci nampati anak-anak kami nandai Jahwe. Meriah ka ukurku ngidah kempu-kempuku mbelin i bas kebenaren.

Gundari nggo ntabeh pertunduhku perban lanai aku mbiar kerna wari si pepagi ntah pe kematen. Aku ras Tony tiap minggu ndahi runggun Saksi Jahwe guna mpegegehi kalak e. Iajari kami ka kalak si deban guna erkiniteken man Jesus gelah banci nggeluh si rasa lalap.