Sekalak anak diberu ngenehen asap erdipul arah pabrik nari janah reh gebukna bagi embun. Iakapna pabrik e si erban embun. Kesalahpahamen i bas danak-danak banci erban kita tawa. Tapi, lit kesalahpahamen si bahaya. Contohna, salah oge cara minem tambar banci bahaya kal akibatna.

Kesalahpahamen kerna hal rohani lebih serius ka akibatna. Contohna, lit si la ngangkai ajaren Jesus. (Johanes 6:48-68) Labo ipelajarina terbagesen, malahen itulakna ajaren Jesus. Seh kal rugina!

Iogendu nge Pustaka si Badia guna negu-negu kam? E merandal. Bahaya nge adi salah erti kam kerna kai si iogendu? Enda rusur terjadi. Ukuri telu kesalahpahamen si rusur terjadi.

• Lit si la ngangkai perintah Pustaka gelah ”erkemalangen man Dibata”. Iakapna e kebiaren si la wajar kempak Dibata. (Pengerana 12:13) Tapi labo bage ate Dibata. Nina, ”Ola mbiar, sabap Aku ras kam! Aku kap Dibatandu, emaka ola atendu aru. Kusampati kam, janah Kukelini pe.” (Jesaya 41:10) Mbiar man Dibata ertina siergai ras sihamati Ia.

• Lit si salah ngertiken ayat, ”Sinasa lit i bas pertibi enda jadi i bas paksana, paksa tubuh ntah pe paksa mate.” (Pengerana 3:1, 2) Isimpulken kalak e maka Dibata si nentuken kematen jelma. Situhuna si imaksudken ayat e eme kerna ketubuhen ras kematen nggo jadi hal si biasa i bas kegeluhen. Ikataken Pustaka ka, ”Erkemalangenlah man [Jahwe], gelah kam cawir metua.” (Kuan-kuanen 10:27; Masmur 90:10; Jesaya 55:3) Kata Dibata e ngajarken maka keputusenta banci erpengaruh segedang geluhta. Kai ertina? Contohna, adi siergai Kata Dibata, enda ngiahken kita mpedauhi pengelako si la sehat bagi minem-minem ras lagu langkah si la mehuli.​—1 Korinti 6:9, 10.

• Lit si ngertiken alu cara si langsung, mis ia tek maka langit ras doni ”ikernepken alu api”, iakapna ikernepken Dibata pagi doni enda. (2 Petrus 3:7) Tapi Dibata erjanji maka la pernah ipediatNa doni enda ikernepken. Dibata ’majekken doni enda i babo palas si nteguh, e maka ndigan pe labo geling’. (Masmur 104:5; Jesaya 45:18) Jadi, kerina kalak jahat nge si ikernepken seh asa keri tempa-tempa itutung alu api, labo planet doni enda. Janah, banci saja langit e maksudna ingan bintang ntah pe iertiken ka surga—ingan tading Dibata. Si e kerina ndigan pe labo ikernepken.

Arah contoh ndai, rusur kalak salah ngertiken ayat si iogena. Engkai maka ipediat Dibata si e terjadi? Lit si erpengakap, ’Adi Dibata e pentar janah meteh kai pe, arusna banci iberekenNa buku si menukah ngangkaisa. Engkai maka la bage banNa? Ukuri telu alasen ngkai maka isi Pustaka rusur isalahertiken.

1. Pustaka iban guna iangkai kalak si meteruk ukur janah nggit erlajar. Ikataken Jesus man BapaNa, ”O Bapa, Tuhan si mada langit ras doni! Kukataken bujur man banNdu, sabap nggo icidahken Kam  man kalak si la erpemeteh [danak-danak], kerina si ibuniken Kam man kalak si pentar dingen erpemeteh. Payo bage me jadina Bapa, sabap bage me si ngena ateNdu.” (Lukas 10:21) Pustaka itulis gelah iangkai kalak si bujur. Kalak si meganjang rukur biasana ”kalak si pentar dingen erpemeteh” e me si rusur nalah ertiken Pustaka. Tapi kalak si ngoge Pustaka bagi ”danak-danak” si meteruk rukur janah nggit erlajar, e me si banci ngangkai Kata Dibata. Seh kal beluhna cara Dibata erbahan Pustaka!

2. Pustaka iban man kalak si nggit ndatken penampat Dibata. Menurut Jesus, manusia perlu penampat guna ngangkai ajarenna. Uga carana? Ikataken Jesus, ”Si nampati, e me kesah si badia, si isuruh Bapa pagi i bas gelarku, iajarina kam kerna kai pe.” (Johanes 14:26) Ibereken Dibata kesah si badiaNa eme gegehNa guna nampati kalak ngangkai Pustaka. Tapi, la ibere Dibata man kalak si la nggit isampati, emaka la iangkaina isina. Kesah si badia pe ngiahken kalak Kristen gelah nampati kalak si deban guna ngangkai Pustaka terbagesen.​—Perbahanen Rasul-Rasul 8:26-35.

3. Piga-piga bas bagin Pustaka banci iangkai i bas paksana. Contohna, nabi Daniel nulisken kerna wari si pepagi. Sekalak malekat ngerana man bana, ”Dage genduari Daniel, tutuplah kitab e janah tama materena i je seh ku bas pendungi doni enda.” Ratusen tahun dekahna, nterem si ngoge buku Daniel tapi la iantusina. Daniel pe la ngangkai piga-piga si ituliskenna. Iakuina alu meteruk ukur, ”Kubegi kai si ikatakenna, tapi la kuerti.” I bas waktu tertentu si nggo itetapken Dibata, banci iangkai kalak nubuaten e. Ituriken malekat e, ”Kam arus lawes genduari Daniel, sabap kata-kata enda arus irahasiaken ras ibuniken seh paksa pendungi e.” Ise si ngangkai kata Dibata e? ”Kalak jahat la ngerti ia; kalak pentar ngenca pagi ngerti.” (Daniel 12:4, 8-10) Jadi, ipebetehken Dibata i bas paksana.

Pernah nge Saksi Jahwe salah pengertin kerna isi Pustaka? Pernah. Tapi paksa ipetangkas Dibata, Saksi Jahwe pe nggit nyesuaiken pengertinna. Alu bage, kalak enda ngusih rasul-rasul Kristus si meteruk rukur nyesuaiken perukurenna paksa ipersingeti Jesus.​—Perbahanen Rasul-Rasul 1:6, 7.

Pengangkan anak diberu ndai kerna embun rehna arah pabrik, enda salah paham si sepele. Tapi, ajaren Pustaka seh kal pentingna man bandu. Erkiteken beritana seh kal pentingna, ula kam sisada mpelajarisa. Pindolah penampat guna ngangkai kai si iogendu. Daramilah kalak si meteruk rukur mpelajari Pustaka, si ngaloken penampat kesah si badia guna ngangkai Pustaka, janah si tek maka gundari ate Dibata siantusi Pustaka. Ula sangsi ngerana man Saksi Jahwe ntah pe ngoge asil risetna i bas situs jw.org/btx. Ijanjiken Pustaka, ”Pindolah pemeteh, jenari idatndu me pemeteh kerna Dibata.”​—Kuan-kuanen 2:3-5.