PERNAH nge lanai kapndu kam ngasup ndalani geluhndu janah mate saja atendu? Adi pernah, banci saja angkaindu uga perasan Adriana. Mbiar kel ia rusur, sedih ia lalap, janah la kapna ia ngasup ndalani geluhna.

Sekalak dilaki arah Jepang si gelarna Kaoru, ngurus orang tuana si nggo metua janah sakit. Nina, “Paksa si e, stres kel aku perban melala masalah bas inganku erdahin. Mesera kuakap tunduh janah la kupet man. Padin kuakap aku mate gelah bene kerina masalahku.”

Nina Ojebode arah Nigeria, “Sedih kuakap lalap janah dungna ngandung aku. Kudarami cara gelah aku mate.” Untunglah, Ojebode, Kaoru, ras Adriana la surung bunuh diri. Tapi lit kira-kira 800.000 kalak si bunuh diri tiap tahun.

Si mbuena bunuh diri eme dilaki. Biasana perban mela kalak e mindo penampat. Ikataken Jesus maka kalak si sakit perlu dokter. (Lukas 5:31) Emaka, adi lanai kapndu kam ngasup janah bunuh diri saja atendu, ula kam mela mindo penampat. Melala kalak si ndai stres banci dungna tersampati janah ngasup ia ndalani geluhna perban isampati dokter. Enda me si ilakoken Ojebode, Kaoru, ras Adriana. Gundari nggo reh tenangna kalak e.

Banci jadi ibereken dokter tambar, ibegikenna kalak e cerita, ntah pe ilakokenna duana guna nampati kalak si stres. Keluarga ntah pe teman arus sabar ras ermediate sanga nampati kalak si stres. Selain si e, lit ka teman si perkeleng janah lalap nggit nampati kita, eme Dibata Jahwe. IsampatiNa kita arah Pustaka.

Kalak si stres biasana perlu ndekah itambari, janah arus iperobahi kalak e kebiasanna sedekah enda. Amin pe sangana kam stres, ingetlah lit arapen bas wari si pepagi. Arapen e me si lalap iinget Ojebode. Nina, “Kutimai kel Jesaya 33:24 terjadi. ‘Lanai pagi lit si sakit’ bas doni enda.” Bali bagi Ojebode, kam pe banci terapuli arah janji Dibata maka bas “doni si mbaru” pagi, lanai lit “si mesui.” (Ketangkasen 21:1, 4) Enda termasuk lanai pagi lit si latih akapna rukur. Sitik pe lanai pagi lit si mesuita. Kerina masalahta ‘silupaken pagi kerina.’​—Jesaya 65:17.