KALAK si pernah ngadapi bencana alam biasana sengget ia, la ia tek e terjadi, bingung ia, janah kuatir. Banci ka la tertunduhkenca. Lanai ia semangat janah perban latihsa lanai tena gedang nggeluh.

Banci saja bage perasanndu adi pernah kam ngadapi bencana alam. Banci ka akapndu lanai lit ertina kam nggeluh. Tapi ikataken bas Pustaka lit denga nge ertina kita nggeluh. Janah lit ka nge arapen bas wari si pepagi.

Nina Jakup 5:11, ‘Kalak si megenggeng ikataken ia ermeriah ukur.’ Banci saja mberat kel akapndu sanga tangtangna ngadapi bencana, tapi adi terus kam megenggeng ngasup nge kam ndalanisa.

Erjanji Dibata lit pagi masana ‘lanai lit kalak tangis, lanai lit kalak erlebuh mindo penampat.’ (Jesaya 65:19) Enda terjadi sanga nggo iban Kerajan Dibata doni enda jadi pardis. (Masmur 37:11, 29) Lanai pagi lit bencana alam. Kerina kejadin si erban kita putus asa lanai pagi siinget. Bali bagi si ijanjiken Dibata Si Madakuasa, “Kejadin-kejadin si enggo lepas ilupaken kerina.”​—Jesaya 65:17.

Cuba ukurindu: Erjanji Dibata “mereken wari si pepagi bagi si iarapkenndu,” eme kegeluhen si tuhu-tuhu ermeriah ukur i bas pemerentahen Dibata si sempurna. (Jeremia 29:11) Banci nge kam semangat ndalani geluhndu kenca ibegindu janji e? Nina Sally si iceritaken bas awal majalah enda, “Adi terus siinget kai si ilakoken Kerajan Dibata pagi, banci dungna manjar-manjar kita lupa masalah si pernah terjadi, janah megenggeng kita ndalani kegeluhen si gundari.”

Pelajarindulah kai si nandangi ilakoken Kerajan Dibata man manusia. Banci dungna reh tekna kam maka lanai pagi lit bencana alam. Alu bage, banci kam tetap semangat ndalani geluhndu amin pe pernah ngadapi bencana.