SEH kel suina adi lit teman geluh si selingkuh. Memang lit si banci imaapkenna teman geluhna si nggo robah, janah ipesikapna ka mulihi perjabunna. * Tapi la soal perjabun e banci ipesikap ntah lang, tetap denga nge lit luka bas pusuh teman geluh si ihianati. Uga carana gelah luka bas pusuh e banci tertambari?

Enterem kalak si terapuli sanga mbaca Pustaka amin pe ceda denga kel ukurna. Dungna, tek kalak e maka idah Dibata nge iluhna mambur janah iteh Dibata uga getemna pusuhna.​—Maleaki 2:13-16.

“Kune la tetap ukurku dingen aru ateku, Kam si ngapuli dingen si periahken ateku.”​—Masmur 94:19.

Ikataken Bill, “Sanga kubaca ayat e, bagi tempa manjar-anjar itambari Jahwe kuakap luka bas pusuhku. Ia bali bagi sekalak bapak si mehuli.”

“Kam setia kempak kalak si setia.”​—Masmur 18:25, Terjemahan Dunia Baru.

Nina Carmen si nggo erbulan-bulan perbulangenna selingkuh, “Amin gia perbulangenku la setia, tapi tek aku maka tetap nge Jahwe setia man bangku. Labo pernah ibanNa aku kecewa.”

“Ula kena kuatir kerna kai pe, tapi i bas kerinana pesehlah pemindon kena man Dibata i bas toto. . . . Alu bage kedamen i bas Dibata nari si banci naluken perukuren kai pe, ngarak-ngarak pusuh ras perukuren kena erkelangken Kristus Jesus.”​—Pilipi 4:6, 7.

Nina Sasha, “Mulih-ulih kubaca ayat e. La erngadi-ngadi aku ertoto janah kugejapken dame pusuhku iban Dibata.”

Mon-mon lanai ngasup iakap kalak enda ndai kerina ndalani geluhna. Tapi ernalem kalak e man Dibata Jahwe janah ibacana ka Pustaka si banci mpegegehi ia. Nina Bill, “Aminna mbue si erban aku kecewa, kiniteken ngenca si banci erban aku tetap paguh. Amin pe pernah kubentasi dalan si seh kel gelapna, lit Dibata si nemani aku.”​—Masmur 23:4.