Situhuna, nandangi reh me bencana ku doni enda. Enggo ipersingeti Jesus kita. Igelari Jesus bencana e “kiniseran si mbelin.” (Matius 24:21) La kita banci ngelak arah bencana e nari. Tapi lit si banci silakoken gelah banci selamat. Kai e?

Sanga khotbah Jesus bas deleng, nina “Teruslah pelebe Kerajan [Dibata] ras kai si benar menurut Dibata.” (Matius 6:33) Kai maksudna?

Teruslah pelebe Kerajan Dibata. Maksudna, pentingen siakap Kerajan Dibata asangken kai pe. (Matius 6:25, 32, 33) Engkai maka bage? Perban manusia la ngasup ndungi kerina masalah. Kerajan Dibata ngenca si ngasup ndungisa.

Teruslah pelebe kai si benar menurut Dibata. Perlu siusahaken asa ngasupta ngikutken undang-undang Dibata. Engkai? Perban adi kita si nentukenca apai si benar ras apai si salah, hasilna pasti la mehuli. (Kuan-kuanen 16:25) Tapi adi siikutken kai nina Dibata, meriah siban ukur Dibata janah sigejapken ka gunana bas geluhta.​—Jesaya 48:17, 18.

Teruslah pelebe Kerajan Dibata ras kai si benar menurut Dibata. Ikataken Jesus maka lit pagi kalak si sibuk ngayaki kebayaken. Banci tenang akap  kalak e adi nggo melala senna. Lit ka si sibuksa ngurus urusenna tiap wari, piah lanai lit waktuna mpelebe Kerajan Dibata.​—Matius 6:19-21, 25-32.

Tapi erjanji Jesus adi sipelebe Kerajan Dibata, pasti icukupi Dibata keperlunta. Janah bas wari si pepagi banci sidat pasu-pasu si la erkeri-kerin.​—Matius 6:33.

Bas abad pertama, terus ipelebe murid-murid Jesus Kerajan Dibata. Amin gia bage, lit nge masalah kalak e janah susah denga akapna. Tapi tetap kalak e terlindungi. Kai maksudna?

Perban ikutken kalak e undang-undang Dibata, kalak e la kena masalah bagi si inanami kalak si la nggit patuh man Dibata. Tek kel murid-murid Jesus man Kerajan Dibata. Emaka, uga pe beratna masalahna ngasup kalak e ngalakenca. Janah ibereken Dibata ‘kengasupen si luar biasa’ gelah ngasup kalak e ngadapisa.​—2 Korinti 4:7-9.

Pengikut Jesus bas abad pertama ngikutken kata-kata Jesus guna mpelebe Kerajan Dibata. Beritaken kalak e Kerajan Dibata ku japa pe. (Kolose 1:23) Gundari, lit denga nge si mberitakenca?

Lit! Iteh Saksi-Saksi Jahwe maka lanai ndekah ikernepken Kerajan Dibata me doni si jahat enda. Emaka erusaha kel kalak e ngikutken kata-kata Jesus enda, “Berita si meriah kerna Kerajan e iberitaken pagi man manusia i belang-belang doni guna kesaksin man kerina bangsa, kenca si e reh me kedungen e.”​—Matius 24:14.

Kenca begindu berita si meriah enda, kai nge atendu si ilakokenndu? Usihlah kalak i Berea (sada kota i Makedoni) bas abad pertama. Sanga begi kalak e berita si meriah kerna Kerajan Dibata arah Rasul Paulus, semangat kel kalak e ngalokenca. ‘Iperiksa kalak e Kitap si Badia’ alu megermet guna mastiken tuhu ntah lang kai si begina. Kenca si e, idalankenna kai si ipelajarina.​—Perbahanen Rasul-Rasul 17:11, 12.

Kam pe banci bagi kalak i Berea. Adi pelebendu Kerajan Dibata ras kai si benar menurut Dibata, kam banci terlindungi. Bas masa depan pe banci aman janah dame geluhndu seh rasa lalap.