Tapi lit ikataken bas Pustaka kerna sada malekat si mberontak. Malekat e dungna igelari Setan si Iblis. Ikatakenna maka la lit hak Dibata merentah manusia. Menurut Setan, riahen akap manusia adi la iperentah Dibata. Si sedihna kel, orang tuata si pertama eme Adam ras Hawa ngikutken Setan janah ilawanna Dibata.​—Kejadin 3:1-6; Ketangkasen 12:9.

Akibatna, lanai kalak e banci tading bas Taman Eden. Bene ka arapen kalak e nggeluh si rasa lalap bage pe kesehatenna si sempurna. (Kejadin 3:17-19) Sanga si e, lenga lit keturunen kalak e. Tapi perbahanen kalak e lit pengaruhna man keturunenna. Nina Pustaka, ‘dosa masuk ku doni, janah dosa e maba kematen.’ (Roma 5:12) Ituriken ka bas Pustaka akibat si deban, nina, “Sekalak si erkuasa janah kalak si deban ngenanami kiniseran erkiteken kuasana.” (Pengerana 8:9) E ertina, adi manusia si merentah, pasti nge lit masalah.

Manusia pertama si merentah lit icatat bas Pustaka, gelarna Namrut. Itulakna pemerentahen Jahwe. Mulai kin jaman Namrut nari, kalak si erkuasa rusur ngerugiken kalak si deban. Kira-kira 3.000 tahun si lewat, itulis Salomo, ‘Kalak si itindih, tangis tapi la lit si nampatisa. La lit sekalak pe nampati erkiteken belinna kuasa si nindih e.’​—Pengerana 4:1.

Gundari pe bage ka. Bas tahun 2009, lit sada artikel si iterbitken Perserikatan Bangsa-Bangsa. Artikel e ngataken maka pemerentahen manusia si la mehuli eme kap “salah sada alasen utama melala masalah bas doni enda.”

Manusia perlu pemerentahen si terulin. Enda me si ijanjiken Dibata!

Enggo iban Dibata sada Kerajan ntah pe pemerentahen si nandangi nggantiken kerina pemerentahen manusia. Janah Kerajan e ‘pajek rasa lalap.’ (Daniel 2:44) Kerajan enda me si itotoken jutan kalak. (Matius 6:9, 10) Tapi labo Dibata saja si merentahsa. Enggo ilantikNa sekalak Peminpin si pernah nggeluh jadi manusia. Ise e?