• Dibata si milihsa. ‘Enggo Kutangkuhken rajaKu. Kubereken man bandu kerina bangsa-bangsa; kerina doni enda kam empuna.’​—Masmur 2:6, 8.

• Keturunen Raja Daud. ‘Sekalak anak nggo tubuh man banta, anak dilaki ibereken banta. Kuasana tetap reh belangna janah kerajanna lalap lit i bas dame. Ia si nggantiken Raja Daud.’​—Jesaya 9:6, 7.

• Lahir i Betlehem. “O Betlehem . . .  i bas kam nari Kupekeke sekalak si ngerajai . . . Rayatna nggeluh alu senang erkite-kiteken kerina bangsa i doni enda ngergaken ia tuhu-tuhu.”​—Miha 5:2, 4.

• Segat ate kalak janah iukum mate. ‘Ciga ate kalak ngenen ia, la iergaken, la lit si mperdiatekenca. Tapi erkiteken dosa-dosata nge maka ia ilukai, erkiteken kejahatenta maka ia igudami.’​—Jesaya 53:3, 5.

• Ipegeluh mulihi janah imuliaken. “IpulahiNdu aku i bas kuasa kematen nari, kalak si ikelengiNdu la itadingkenNdu i doni kematen. . . . I bas tanNdu kap kesenangen.”​—Masmur 16:10, 11.

Arah kerina keterangen e, sekalak ngenca si cocok, eme Jesus Kristus. Pernah ikataken sada malekat man Maria, nande Jesus, “Ibere Dibata Jahwe ka pagi man bana tahta Daud bapana, . . . janah Kerajanna la erkeri-kerin.”​—Lukas 1:31-33.

Jesus lenga pernah merentah i doni. Tapi, nandangi merentah ia arah surga nari ku doni jadi Raja Kerajan Dibata. Engkai maka Jesus si cocokna jadi Raja? Mari siperdiateken kai si ilakoken Jesus sanga ia i doni.

•   Jesus ermediate man kalak si deban. Isampatina kerina kalak, dilaki ntah pe diberu, si nguda denga ntah pe si nggo metua, la soal ja nari kalak e reh ntah pe uga keadan ekonomina. (Matius 9:36; Markus 10:16) Contohna, pernah lit sekalak si sakit kusta mindo man Jesus, “Adi nggit kam, banci ipepalemndu aku.” Mekuah ate Jesus janah ipepalemna ia.​—Markus 1:40-42.

• Jesus ngajari kalak uga carana erban Dibata senang. Nina, “La kena banci jadi budak man Dibata bage pe man Kebayaken.” Ikataken Jesus ka, uga ateta perbahanen kalak man banta, bage ka min perbahanenta man kalak. Selain si e ikataken Jesus ka, labo saja perbahanenta si iperdiateken Dibata tapi iperdiatekenNa ka kai si lit bas pusuh ras perukurenta. Emaka, gelah banci sisenangken Dibata, arus ka sijaga pusuhta. (Matius 5:28; 6:24; 7:12) Janah ikataken Jesus ka gelah banci tuhu-tuhu ermeriah ukur, arus siteh kai si iarapken Dibata arah kita janah sidalanken.​—Lukas 11:28.

• Jesus ngajari kalak uga carana ngkelengi kalak si deban. Arah ranan ras perbahanen Jesus teriahken kel kalak ndalanken kai si ibegina. Nina Pustaka, “Jengang kalak si nterem ngidah carana ngajar. Sebap ia ngajar selaku kalak si lit kuasana.” (Matius 7:28, 29) Nina Jesus man murid-muridna, “Kelengi musuh-musuh kena.” Sanga Jesus ipakuken bas tiang pe, ertoto ia, “O Bapak, ampunilah kalak e, sebap la iangkana kai si ilakokenna.”​—Matius 5:44; Lukas 23:34.

Jesus ngenca si cocokna jadi Raja perban ia mehuli janah nggit nampati. Tapi, ndigan ia mulai merentah?