Nina Jesus, “Bangsa pagi ngelawan bangsa, ras kerajan ngelawan kerajan. I japa pe terjadi pagi gempa si megegeh, kurang pangan ras lit penakit si mekelek i bas erbage ingan.” (Lukas 21:10, 11) Bali bagi garis-garis si mbentuk sidik jari, kejadin-kejadin e pe mbentuk sada tanda si jelas. Arah sidik jarina banci siteh ise jelmana, janah arah kejadin-kejadin enda pe banci siteh “Kerajan Dibata nggo ndeher.” Payo kin kejadin-kejadin enda ndai radu terjadi i sebelang doni? Mari siperdiateken buktina.

1. PERANG

Tahun 1914 terjadi perang si seh kel belinna. Lenga pernah lit perang si bage! Rusur ikataken ahli sejarah, tahun 1914 eme tahun si ngubah kegeluhen manusia. Engkai? Perban bas tahun e terjadi perang doni si pertama. Bas perang e igunaken me tank, bom si idabuhken arah pesawat, senapan mesin, ras gas beracun si munuh nterem jelma. Kenca si e, bas perang doni si peduaken mulai me ipake senjata nuklir. Mulai tahun 1914 ngayak gundari, lit lalap perang si nggo munuh jutan kalak.

2. GEMPA

Menurut Britannica Academic, tiap tahun lit kira-kira 100 gempa si megegeh si parah akibatna. Nina Badan Survei Geologi Amerika Serikat, “Arah data si nggo ipepulung mbarenda nari (kira-kira mulai tahun 1900), iperkiraken lit 16 gempa si megegeh terjadi tiap tahun.” Lit si erpengakap maka situhuna gempa labo reh rusurna terjadi. Perban reh canggihna nge alat pendeteksi gempa maka siakap reh rusurna terjadi gempa. Tapi situhuna, gempa si megegeh memang terus terjadi i sebelang doni. Akibatna, nterem kalak si menderita janah nterem ka si mate.

 3. KURANG PANGAN

Kurang pangan rusur terjadi perban perang, korupsi, krisis ekonomi, ntah pe perban la rani sinuan-sinuan. Menurut “Laporen bas Tahun 2018” arah Program Pangan Dunia, “I sebelang doni, lit 821 juta kalak si la bias panganna janah 124 juta kalak si kelihen.” Selain si e, perban kurang gizi lit kira-kira 3,1 juta anak-anak si mate tiap tahun. Bas tahun 2011, arah kerina anak-anak si mate i sebelang doni, hampir setengahna mate perban kurang gizi.

4. PINAKIT

Nina sada buku si iterbitken Organisasi Kesehatan Dunia, “Mulai tahun 2001, melala kel pinakit si berbahaya. Mulihi ka lit pinakit si ndekah, bagi kolera, pes, ras demam kuning. Janah lit ka pinakit si mbaru bagi SARS, erbage jenis influensa, MERS, Ebola, ras Zika.” Mbaru-mbaru enda pe lit pandemi COVID-19. Amin gia nggo maju ilmu kedokteran, la banci ipepalem manusia kerina pinakit.

5. PENDAHIN ERBERITA I SEBELANG DONI

Ikataken Jesus ka tanda si deban. Nina, “Berita si meriah kerna Kerajan e iberitaken pagi man manusia i belang-belang doni guna kesaksin man kerina bangsa, kenca si e reh me kedungen e.” (Matius 24:14) Gundari, mberat kel masalah manusia. Amin gia bage, lebih waluh juta kalak arah erbage negri si mberitaken berita si meriah kerna Kerajan Dibata. Si e iberitaken bas 240 negri janah bas lebih 1.000 bahasa. Lenga pernah terjadi si bage.

Kejadin-kejadin enda sangana terjadi gundari. Kai ertina e? Nina Jesus, “Sanga idah kena kerina enda terjadi, arus iteh kena maka Kerajan Dibata nggo ndeher.”​—Lukas 21:31.

Adi sinen tanda si ibereken Jesus janah siperdiateken perhitungen waktu si erpalasken Pustaka, siteh dungna maka nggo ipajekken Dibata KerajanNa i surga bas tahun 1914. a Bas tahun e me ilantikNa Anakna eme Jesus Kristus jadi Raja. (Masmur 2:2, 4, 6-9) Kentisik nari, Kerajan Dibata me si merentah doni enda janah imasapkenna kerina pemerentahen manusia. Kenca si e, iban Kerajan Dibata doni enda jadi ingan tading si mejile man manusia seh rasa lalap.

Kentisik nari, terjadi me bagi toto si iajarken Jesus, “Rehlah min KerajanNdu. Jadilah min peratenNdu i doni bali bagi i surga.” (Matius 6:10) Kenca Kerajan Dibata pajek i surga tahun 1914, kai si nggo ilakoken Kerajan e? Janah uga pagi keadan manusia adi nggo merentah Kerajan Dibata ku doni enda?