“Emaka, tetaplah erjaga-jaga sebap la teh kena wari ntah pe jamna.”​—MATIUS 25:13.

“Tetaplah hati-hati, teruslah sadar, sebap la teh kena ndigan waktu si itentuken e.”​—MARKUS 13:33.

Emaka, labo ise pe si meteh ndigan kedungen doni enda. Tapi enggo “itentuken” Dibata ndigan “wari ras jamna.” (Matius 24:36) Adi bage, banci nge siteh enggo ndeher ntah lang kedungen doni enda? Banci. Lit ikataken Jesus man murid-muridna piga-piga tanda si ncidahken maka enggo ndeher kedungen doni enda.

Enda me piga-piga tanda kerna “kedungen doni enda.” Nina Jesus, “Bangsa ngelawan bangsa pagi, kerajan ngelawan kerajan, i japa pe kurang pangan ras terjadi gempa.” (Matius 24:3, 7, cataten i teruh) Ikataken Jesus ka maka lit pagi “wabah penakit” eme penakit si meter kel menular. (Lukas 21:11) Enggo nge idahndu terjadi kai si kataken Jesus e?

Gundari, enterem kalak si susah perban perang, kelihen, gempa, ras wabah penakit si la erngadi-ngadi. Contohna bas tahun 2004, terjadi gempa si megegeh si erban tsunami bas Samudra Hindia, lit 225.000 kalak si mate paksa si e. Bas telu tahun saja, enggo lit kira-kira 6,9 juta kalak si mate i sebelang doni perban wabah penakit COVID-19. Ikataken Jesus maka adi enggo terjadi kejadin si bage, e tandana enggo ndeher kedungen doni enda.

Ikataken Pustaka maka ope lenga reh kedungen doni e, lit masa si igelari “wari-wari pendungi.” (2 Petrus 3:3, 4) Ikataken bas 2 Timotius 3:1-5 maka bas wari-wari pendungi perbahanen kalak lanai mehuli. (Nen kotak “ Si Terjadi Sope Kedungen Doni Enda.”) Pernah nge idahndu kalak si sombong, merangap, jahat, ras la perkeleng? Adi pernah, enda pe mbuktiken maka kita enggo ndeher kel ku kedungen doni enda.

Ngasa ndigan nge wari-wari pendungi e? Nina Pustaka, ‘ntisik nari ngenca.’ Kenca si e, kernepken Dibata pagi “kalak si ncedai doni.”​—Ketangkasen 11:15-18; 12:12.

Enggo tetapken Dibata wari ras jamna ndigan ateNa engkernepken doni si jahat enda. (Matius 24:36) Situhuna, labo ‘ate Dibata sekalak pe ikernepken.’ (2 Petrus 3:9) Bereken Dibata kesempaten man banta guna erlajar kerna peratenNa janah patuh man baNa. Engkai? Perban ateNa selamat min kita arah kedungen doni enda janah nggeluh bas doni si mbaru, si enggo jadi Pardis.

Enggo aturken Dibata gelah kerina kalak banci jadi bagin arah doni si mbaru bas KerajanNa. Ikataken Jesus maka berita si meriah kerna Kerajan Dibata iberitaken pagi “i belang-belang doni.” (Matius 24:14) Saksi-Saksi Jahwe si lit i sebelang doni, nggunaken miliaren jam guna mberitaken ras ngajarken arapen si lit bas Pustaka man kalak si deban. Enggo ikataken Jesus maka pendahin erberita si meriah ilakoken pagi i sebelang doni ope lenga seh kedungen doni enda.

Kentisik nari ikernepken me pemerentahen manusia. Tapi ula kam mbiar, perban banci kam selamat janah nggeluh bas doni si mbaru si ijanjiken Dibata. Bas artikel seterusna sibahas kari uga carana kam banci nggeluh bas doni si mbaru.