Bagi si enggo ibahas bas artikel sebelumna, siteh maka lanai ndekah kernepken Dibata doni si jahat enda ras dungiNa kerina masalah. Tek kita maka si e pasti terjadi. Kai alasenna? Perban lit janji Dibata bas Pustaka si ngataken,

‘Doni nandangi ikernepken.’​—1 JOHANES 2:17.

Tek kita maka lit pagi si selamat perban lit ka janji bas ayat e si ngataken,

“Kalak si ngelakoken peraten Dibata nggeluh rasa lalap.”

Emaka, adi selamat ateta perlu silakoken peraten Dibata. Gelah siteh peraten Dibata arus lebe sitandai Ia.

Nina Jesus, “Adi tandai kalak maka Kam ngenca Dibata situhu-tuhu, . . . alokenna pagi kegeluhen si rasa lalap.” (Johanes 17:3) Gelah banci selamat ras nggeluh rasa lalap, perlu sitandai Dibata. Enda labo terjeng siteh maka Dibata e lit ntah pe siteh piga-piga kebenaren kerna Ia, tapi arus kita erteman ras Ia. Contohna, adi rembak ateta ras temanta, arus kita rusur ras temanta e. Gelah banci erteman ras Dibata pe bage ka nge. Mari sibahas piga-piga kebenaren si penting arah Pustaka si banci nampati kita gelah banci jadi teman Dibata.

Gelah banci kita nggeluh, arus kita man tiap wari. Tapi nina Jesus, “Manusia arus nggeluh labo arah roti saja, tapi arah tiap kata si kataken Jahwe.”​—Matius 4:4.

Gundari, banci sibaca kata-kata Jahwe bas Pustaka. Sanga sibaca Pustaka, sipelajari kai si enggo lakoken Jahwe mbarenda, si sangana lakokenNa, ras si nandangi lakokenNa.

Adi patuh atendu man Dibata, tapi mesera akapndu mpengadi perbahanen si la ngena ateNa, kai nge si banci lakokenndu? Adi bage si terjadi, mbelin kel datndu gunana adi tuhu-tuhu tandaindu Dibata.

Cuba ukuri pengalamen sekalak diberu, sikatakenlah gelarna Sakura. Mbarenda, pergeluhna la beres, rusur lakokenna perbahanen seks si salah. Sanga mulai ia erlajar Pustaka, pelajarina kerna perentah Dibata si ngataken, “Minterlah tulak perbahanen seks si salah.” (1 Korinti 6:18) Emaka ertoto Sakura mindo gegeh man Dibata, dungna banci pengadina kebiasanna si la mehuli e. Tapi tetap denga ia arus erjuang ngelawan godan. Nina, “Adi reh perukuren si salah e, mis aku ertoto janah kuturiken kerina man Jahwe. Sebap kuteh labo aku ngasup ngadapisa sisada. Perban rusur aku ertoto, reh rembakna aku ras Jahwe.” Bali bagi Sakura, lit jutan kalak si enggo nandai Dibata. Bereken Dibata gegeh si iperluken kalak e guna erban perubahen bas geluhna, janah ngelakoken kai si erban meriah ukur Dibata.​—Pilipi 4:13.

Adi reh bagesna sitandai Dibata, reh rembakna Ia ras kita. (Galati 4:9; Masmur 25:14) Alu bage, banci kita selamat masuk ku doni si mbaru. Tapi uga kin pagi doni si mbaru e? Kerna si e, ibahas kari bas artikel seterusna.